ارجوووووكم ساعدوني.. مالي بعد الله الا انتم.. نفاسي كرهني بيتي وزوجي وكل شي

السلام عليكم
انا قربت اطلع من الاربعين..
ولاشريت ملابس ولا سويت خلطات ولا اهتميت ولاشي..
مشكلتي الرئيسية الارهاااااق قسما بالله ما انام..
ولدي صياح ونياح طول الليل.. واضطر اجلس معه للظهر..
تخيلوا من الليل الى الظهر!
علما باني جالسه عند اهلي.. لكنهم مهتمين بس بأكلي وخدمتي..
وسبق تكلمت عن هالموضوع.. ومعاناتي مع النفاس..
ما ادري هذا اكتئاب مابعد الولادة والا ايش..

المشكلة الحين اني المفروض اخلص نفاس بعد يومين..
لكن مالي رغبة ابدااااااااا ارجع بيتي.. كارهه نفسي وزوجي وكل شي..
فوق كذا مابعد طهرت.. فاستأذنت زوجي اجلس اسبوع زيادة ووافق..
لكن فعلا مالي رغبة ارجع ابدا.. وهو مو فاهم اي شي من اللي احس فيه..
مرات يتصل علي ولا ارد.. لاني لو رديت بقول طلقني..
وهو ماله ذنب.. بس انا كارهه الدنيا بما فيها..
وسبب اكتئابي الرئيسي اني مو قادرة انام زي البشر..
ولهالسبب صار حول عيني سواااااااد.. وألم برقبتي وشحوووب بوجهي..
وربي لما كنت حامل كنت اجمل بكثير من الحين..
وزوجي كان كل شوي يطمني ويقول بترجعين عروس بعد النفاس..
لحد ماصرت كارهه نفسي الحين وقربت افقد الثقة بنفسي..

والمشكلة لو قلت هالكلام لاحد من اهلي مايفهموون قصدي..
امي مثلا على طول تقول: يعني شايفتني مقصرة؟
رغم اني ما اقصد ابدااا اتهام اي احد..

انا اللي قاتلني اني حاسه بضياااااااع واشوف نفسي كبرت وطقيت الستين..
صرت كئيبة وقبيحة وشكلي مرهق..
احس ماعدت انفع اكون زوجه.. انتهت صلاحيتي..
ولاني قادرة افهم وش السر بأني اشوف حريم بعد النفاس كأنهم عرايس..
يعني معقولة ما اقرفهم البيبي وهلكهم سهر وصياح..
يابختهم ماشاء الله تبارك الله..
وانا ولدي خلص طاقتي كلها.. صار مالي رغبه بأي شي..


لو وحدة منكم مكاني -لاسمح الله- وش كان ممكن تسوي؟