ارجو التفاعل من كل البنات هااااام جداااااااااااا

السلام عليكم ورحمه الله وبركاته

اتمني يا بنات انكم تتفاعلو وتشاركو في الموضوع لان يهم كثير منا

طبعا كل يوم جديد بتظهر اقنعه ووصفات جديده تضاف علي حصيله ما هو قديم

بصراحه انا احترت والسبب اننا مش بنلاقي اي نتيجه عدم الاستمرار يعني مثلا شوفت النهارده تجربه وعجبتني وقلت خلاص هتابع وهمشي عليها وبعد كام يوم الاقي موضوع جديد بشكل جديد اترك القديم واتابع الحديث وبكده عمرنا ما هنلاقي نتيجه لدرجه اننا اصبحنا فعلا مثل فئران التجارب:mouse:

يا بنات ارجوكم كل واحده تدخل وتكتب نوع بشرتها سواء دهنيه او جافه او مختلطه وتكتب كل الوصفات اللي فعلا جابت نتيجه معها وتقول ايه هي النتيجه يعني مثلا تبيض او تنعم يعني تكتب تفسير وكم المده اللي استخدمتها

وبكده هنقدر نعمل احصائيه متوازنه وهنطلع منها بانجح الوصفات الموجوده بالمنتدي وارجو من المشرفات الكرام المشاركه لخبرتهم

وانا هكون اول المشتركات

انا بشرتي مختلطه وعرفت من انها مختلطه ان بعد لما بغسلها بحس بشد خفيف في الجبين والمنطقه حول الانف وبعد ساعه او اقل الاقيها متعرقه وبها دهون ولما استخدم اي قناع الاقي الخدود وحول الشفاه تتشقق بينما الجبين وحول الانف علي العكس تكون نضره

بالنسبه للوصفات اللي فعلا نفعت معي

اولا الجلسرين + الليمون افادني لكل منطقه بجسمي من الوجه حتي القدم وكنت احطه قبل ما انام علي وجهي وعلي ايدي والصبح الاقيها نعمه جدااا وبالنسبه للبياض فتحت بس بنسبه بسيطه لكن بجد بتحسي بنضاره في الوجه من اول او ثاني استخدام علي الاكثر

والنتيجه الكليه ظهرت من بعد اسبوع

ثانيا الزبادي+الليمون عمري ما بقدر استغنا عنها بتريحني جدا لما بيظهر عليه علامات الارهاق والتعب والسهر وفعلا اثبتت نجاحها معي لان بعد انتهاء الامتحانات مباشره كان عندنا عزيمه اهل خطيبي ووالله استخدمتها قبل العزيمه بيوم رحت قبل ما انام خلط علبه زبادي او روب مع نص ليمونه وقبل ما احطه علي وجهي غسلته وفردت الزبادي علي وجهي وتركتها حتي تجف وبعدين فركتها براحه جداااا وغسلتها والله والله نتيجتها رهيبه فعلا بترجه للبشره شكلها ولونها الطبيعي تحسي انها طريه وناعمه كانك نونو

وانا حاليا بعد النتيجه اللي اكتشفتها مش بسيبها وتقريبا استخدمها كل يوم لكن بصراحه ما بيضتني حتي الان يعني هي بتخلي البشره مشرقه وانا استخدمها من حوالي اسبوعين

ثالثا من يومين بس استخدمت مكعب ماء الورد المثلج بعد القناع امسح بيه علي وجهي بعد غسل القناع وفعلا بيقفل المسامات

رابعا زيت الزيتون استخدمته لمده اسبوع بعد نزع الشعر بالحلاوه ولما طلع الشعر كل خفيف جدااااا والشعره مش كثيفه واستخدمت كريم اصاله كانت نفس النتيجه لانه بيحتوي علي نبات السعد وجدا خفف الشعر

خامسا استخدم صابون دوف السائل (الهاند كلين) لغسل الوجه بدل من الصابون لان الصابون بيخلي بشرتي باهته جدا وجافه

سادسا المقشر اللي استخدمه هو كريم سكرب من اصاله وفعلا اكثر من رائع مرتاحه جدا معاه
بالنسبه للجسم استخدم خليط من السكر الخشن مع الليمون واعجنه بزيت الزيتون

سابعا زيت اللوز حلو لما اخلطه مع نوع ثاني من الزيوت لكن احذركم من استخدامه لوحده والله سمرني جدااااا خاصه في فصل الصيف انا اساسا مش بخرج ومنتقبه يعني مش بتعرض للشمس ولما سمعت عن زيت اللوز في المنتدي استخدمته لمده 3 ايام متواصله كنت ادهن بشرتي قبل ما انام واحيانا الصبح لكن والله كان بيسمرني احس كان بقالي ساعات وقفه في الشمس

انا خلصت بس لو افتكرت اي شيء تاني ان شاءالله بكتبه

انا في انتظار مشاركاتكم

وارجو اللي تكتب عن تجربها لها تكون فعلا ناجحه ودقيقه في معلوماتها عشان الكل يستفاد وخاصه وصفات تبييض البشره لاني حتي الان لم اجد ما يناسبني

اختكم في الله مراهقه مصريه :27: