ارجو الدعاء لأمي بالرحمه والمغفره وجنة عرضها السموات والارض

السلام عليكم ورحمة الله وبركاته
قرأت موضوع وهو في الرابط التالي

http://forum.hawaaworld.com/showthread.php?t=2134122


اثر فيا بصوره كبيره وحبيت اذكر امي واطمع في دعائكم لها انه ربي يرحمها ويغفرلها يارب ويرزقها الجنه بغير حساب

يارب لك الحمد كما ينبغي لجلال وجهك وعظيم سلطانك
الحمد لله على كل شيء
الله يرحم امواتنا واموات المسلمين جميعا يارب
امي قبل وفاتها رحمة الله عليها كانت تعبانه شوي لان قضت اخر رمضان في مكه تصلي التراويح والتهجد في الحرم وما ترجع الا قريب الفجر للفندق
ورجعت عاالمدينه ليلة العيد ومن رابع يوم العيد تعبت وكان تعبها بسيط بسبب قعدتها لفتره طويله في الحرم وهيا كانت تعاني من التهاب في الكلى وتتعالج وماشي العلاج كان الحمد لله ، والله يابنات انا وانا رايحه عاالمستشفى وربي احس اني بفقدها وبتموت رغم انه ما كان فيها شي كثير وعدا داك اليوم وجا خامس يوم من شوال وهيا تتألم وما تقدر تاكل وترجع كل اللي تاكله حتى المويا وسادس يوم من شوال كان يوم اربعاء اتلمينا انا واخواني واخواتي في بيتها على اساس الخميس الصباح انا راجعه الرياض لان السبت دوامات وكنت متضااايقه بصوره كبيره وبقول يمكن لأني مسااافره تاني يوم وبفارق اهلي وامي تعبانه ومن عصبيتي خاصمت بنتي وضربتها لانه نرفزتني وهيا تزنزن تبغا بنات خالتها وكانت امي الله يرحمها اخده ابره مسكنه ونااايمه فغرفتها ونحنا في الصاله قامت وخرجت على صوت بنتي وهيا تبكي وخاصمتني وحضنتها واخدتها معاها عاالغرفه
وجلسنا عادي وصرنا نشرب قهوه وناكل من حلاوة العيد وتقولنا يابنات في سبت حلاوه في الدولاب شيلوه وضيفو نفسكم ومحنا راضيين نقولها الحلاوه حقت العيد كفايه الين غلقت التلاجه
وكانت اختي جايبه عشا جلسنا اتعشينا وامي مو قادره تاكل رغم محاولتها وقمت قشرت لها تفاح وغصبت نفسها على شي بسيط والباقي عطتوه لاحفادها بعد العشا لما شفنا اصرار امي على اننا نفك سبت الحلاوه قمت انا ومرات اخويا نسوي قهوه واحنا في المطبخ نسمع صراخ اخواتي
كانت امي الله يرحمها كنها فقدت نفسها ورجع تاني وطوالي انا واخويا وديناها المستشفى
اول ما وصلنا صارو يسولها تحاليل ويشوفو اش عندها عشانها كانت ترجع كل اللي تاكله
وجلست تتألم الله يرحمها وهادا الكلام على فجر الخميس
هيا الخمسه شهور الاخيره الله يرحمها كانت تتنوم في المستشفى كل اسبوعين عشان تاخد كورس العلاج عشان التهاب الكلى
وكان يصادف اني انا اكون عندها بالمدينه بس اسافرعاالرياض تاني يوم كانت تتنوم واتضايق مره لاني مو جنبها ولما كتبولها تنويم اخواني قالولي بالمزح كل مره تسافري تدخلي امنا المستشفى وانا اشوف امي تتألم قلتلها والله مني مسافره ياامي بقعد عندك وكلمت زوجي وقلتله وجا اخد اطفالي من بيت اهلي وهيا تقولي لا ياامي روحي لا تتعطلو عشاني
العاده لما كانت امي تتنوم عادي نتلم عندها بس مو كلنا
والله يابنات فجر الخميس سته شوال كلنا في المستشفى عندها انا واخواتي واخواني وتقولنا روحو بيوتكم شوفو عيالكم ومو راضيين نتركها
زي اللي حاسين اننا اخر مره نتلم معاها وبالفعل هادا اللي حصل
كانت تتألم وما تقدر تتمدد على السرير اذا اتمددت تحس انه نفسها يوقف وترجع تجلس الله يرحمها قعدت تتلوى من الالم وكل شويا تقول انا بموت اليوم خلاص واخواني يسكتوها يقولولها لا تقولي كدا ياامي ان شاء الله ما فيكي الا العافيه وهيا تقول انتو ما تعرفو اصلا وبس تغمض عينها شوي وتنكتم وتقوم شغلنالها سورة البقره ويس في الجوال يمكن يهديها هاالشي والله يابنات كانت تقرأ مع السديس وهيا اميه تعرف قصار السور فقط كانت تقرأ يس والبقره معاه الله يرحمها وهيا شبه فاقده للوعي وكلما تتألم تقول يارب ارحمني برحمتك يارب يارب سامحني يارب يارب اشفيني يارب بس هادا الكلام على لسانها ولما جيت امددها عالسرير تقولي سامحيني تعبتك
قلتلها ياامي لو قعدت اخدمك طول العمر مااوفيكي حقك ياغاليه
ومسكينه اشتد عليها الالم وبدأت رجلها تبرد كأنه يابنات خرجت منها الروح وانا ماابغا اقول انها بتحتضر اخاف يقولولي انتي تفاولي عليها وبدا لسانها يتقل قالت لأخواني تعالو عندي انا بوصيكم وصار اخويا يسكتها يقولها ما فيكي الا العافيه ان شاء الله قمت طلبت منهم يسمعوها اش تبغى تقول وصارت توصي كل واحد وواحده فينا وبعدها اشتغلو الدكاتره رايحين جااااين عليها وهيا مو قادره تتمدد من الالم الين صار الظهر بس اخواني طلبو مننا كل واحده ترجع بيتها لعيالها وانا خرجت من عندها
وهيا خلاص مره تعبانه قالو بيدخلوها العنايه قام اخويا قلها اذكري الله ياامي قالت لا اله الا الله محمد رسول الله وخلاص دخلت في غيبوبه على الساعه اتنين الظهر دخلوها العنايه وحطولها تنفس صناعي
لما رجعت البيت صرت ارتب غرفتي واندر ملابس عيالي واقول لزوجي ملابسي كلها في الرياض اذا صار شي اش حلبس يقولي صلي عاالنبي اشبك انتي ونمت وانا هلكانه وفي قلق وحاسه اني بفقدها
نمت قريب العصر وعاالعشا قمت رحتلها المستشفى دخلت عليها واختي قامت من عندها لانه سامحين لشخص واحد يدخل عندها وصرت اقرا عليها سورة يس وبعدها بشوي جات مرات اخوي استلمت مكاني وطلبتها تقرأ سورة يس كمان وجلست تقرأ عليها ونص ساعه الا امي وقف قلبها ورجعولها نبضها الين اخواني وبابا كلهم صارو عندها بعدين اتوفت الله يرحمها فجر الجمعه 7 شوال وساعدنا في تغسيلها انا واختي الكبيره وودوها الحرم وصلو عليها صلاة الفجر ودفنوها ومعاها رضيعين اندفنو في نفس القبر الله يرحمها ويغفر لها يارب ويجعل ما اصابها تكفير لها يارب
بنات انا للان مو مستوعبه الوضع والغريب انه انا واخواتي واخواني كلنا كنا حاسين انه بنفقدها الله يرحمها يارب والى الان الوضع ملخبط الله يصبرنا يارب

الله يخليكم بنات انا نزلت قصة وفاة امي عشان اكسب دعواتكم ادعولها بالرحمه والمغفره وجنة عرضها السموات والارض والمنزله العاليه وليس ذلك ببعيد على الله سبحانه وتعالى