ارشدوني جزيتم خيرا

السلام عليكم ورحمة الله وبركاته
اخياتي في الله ارجو من ذوات الخبره وذوات الحكمه والعقل منكن افادتي في مشكلتي التي ارقتني كثيرا
انا ي خواتي بس بعطيكم نبذه مختصره عن حياتي زمان عند اهلي عشان تتضح بعض الامور ي خواتي انا عانيت حياه قاسيه نوعا ما في بيت اهلي ابوي شديد علينا وامي مومهتمه فينا منشغله بحياتها ومشاكلها مع ابوي طول عمري وانا اشوف امي تكره ابوي وتدعي بالموت عليه لانها كانت مجبوره عليه المهم
كانت اختيالكبيره هي المدلله في العايله وطلباتها مجابه واذا قالت شي كلهم وقفو في صفها المهم هي كانت تغار مني وتكرهني وتكيد لي المشاكل يوميا كنت ابكي بسببها واعاني وتمد يدها علي بعد ولا كان فيه احد يوقفها عند حدها لين كبرنا انا اجمل منها وكانت تغار من هالشي
المهم هي كانت تحب ولد عمي وكانت تكلمه باستمرار وهو يحبها بعد ولاملكو ولا شي وانا كنت لما ابي ادخل انام كانت تطردني لساعات حتى تخلص مكالمتها المهم انا هنا غلطت غلطه كبيره غيرت مجرى حياتي كليا الي هي
انا ولد عمي الي اصغر من هذا الي كلمته اختي الي اصبح زوجها الان كان شاب جميل وسيم مره وكان ابوي يقول دايم بناتي لعيال عمهن متفق مع عمي
المهم انا قررت اغلط غلطة اختي لانه وبصراحه كان عاجبني وحابته من وانا صغيره
شسويت جبت العيد رحت اخذت رقمه وارسلت له رساله ع جواله وكتبت تحت من زود الدلاخه بنت عمك فلانه مالت بس مالت مدري وين مخي كان هذاك الوقت كنت عاطفيه واندفاعيه ومتهوره بعد ورميت الحيا وراي مع اني قسم بالله كنت حيويه ولا اغلط ولاعمري كلمت شباب وربي بس قراده لحظي المهم الرجال دقها ثقل حقه
انا الي بادرت استاهل ماجاني صار يرد برسايل يستهزيء فيها مثلا انتي منو ضاحك عليك انتي مدري وش مغرور ومتكبر وصرت ماارسل لعب بمشاعري انا كنت صادقه وجايه من اقصاي وهو يتطنز علي كان حب من طرف واحد للاسف ولو اني ماارسلت احسن كان غصب عنه بعد كم سنه بيجي يخطب لانه متسمين لبعضنا وكذا
وهو كان موافق ولامعترض بس ماجل فكرة الزواج لين يكون نفسه انا استعجلت الله يسامحني
المهم ي خواتي انا تعبت نفسيا من الاهانه والموقف المحرج الي حطيت نفسي فيه وحسيت بحجم خطاي وكنت وربي حتى الليل اقوم مفتشله ومقهوره من حالي ومقهوره من ردة فعله ليش ماقال اي كلمه ترد لي كرامة نفسي ماتوقعته يكسحني ويفشلني وكذا


جلست سنه وانا اعاني من هالخطا وطحت من عين حالي المهم كانت بنت جيراننا من زمان تقولي عن واحد يقربهم وش رايك تاخذين فلان انا ماكنت ارد عليها ولكن في لحظه ظعف وعشان انسى ولد عمي والشي الي صار قلت خلاص اذا فلان يبي يخطب ترا موافقه مجنونه رسمي قسم بالله
لانه اخته كانت تدور له حرمه وع حد قولهن معجبه بي المهم قلت لاهلي ماراح اخذ ولد عمي وصارت مشاكل قلت ابتزوج غيره اذا انخطبت بوافق وفعلا خطبوني ووافقت وابوي كان زعلان يبيني لو لد اخوه انا مستغربه من نفسي قالو مو لو قلت عادي مابي حلو يطلع زي ولد عمي مغرور وشايف حاله وربي قلت بس يصلي اهم شي المهم
صارت الملكه وحتى مادخل استغربت هالشي وجلس فتره واخذ رقمي وصار يكلمني يوميا لين العرس ي بنات وهو طبعا مديون وعليه غروض ولكن هم ناس معروفين المهم محد يسبه بشي وتزوجت وليتني ماتزوجت وري تزوجت وانا احب ولد عمي وكنت حزينه حتى بيوم العرس لكن ليش كذا سويت بنفسي انا انتغمت من نفسي مو منه
انصدمت انه زوجي غير قادر الدخول علي وكل مره يفشل ولكن صبرت لاني اجهل بالمواضيع هذي وكذلك انه يقولون مربوط ومدري ايش قدامي امه وفلانه سوت له عمل لانه كانت تبيه لبنته ومدري وش طلع الاخو يبي وحده قبلي وانا مادريت وكانو يكلمون بعض وخاطبها اكثر من مره وابوها رافض ياللغباء فعلا
المهم جلست شهرين وانا وياه زي الاخوان كنت افكر اروح اتطلق بس اخاف وش اقول ماودي اكسره وافضحه واقول مو رجال والمشكله كان طيب معي وكان يترجاني اني ماافضحه ولااتكلم وانه راح المستشفى وجاب لي تقارير فعلا انه مافيه شي لكن التوتر والخوف من الفشل وانا بصراحه خفت انه ولد عمي يضحك علي ويتشمت فيني وسكتت لين يوم من الايام بمساعدتي بعد مانصحتني صديقه مقربه انه كذا وكذا سوي وشغلي سورة البقره وتجهزي ومااعرف ايش سويت زي ماقالت ع غير اقتناع تمت المساله وعدت وهو كان فرحان مره بس مااعرف ليش انا كنت تضايقه وحزينه حييل وقتها طيب ليش انا اسوي كذا بنفسي ليش
المهم لما تم الشي الي براسه خذاني وجلسني مع اهله صدمه عارضت قال ماقدر افتح بيت وامي تعبانه لازم اجي اشوفه كل اسبوع امه كانت تغسل كلى وكذا
وجلست رغم عني حتى انه ضربني لما رفضت المهم جلست سنه وحملت ببنتي كنت ميته بس يكون عندي طفل وفرحت لكن الرجال تغير الرجال كل مازال يشين وكل مازال يصدمني بمواقف طول فترة الحمل اعاني وهم ومغثه ومشاكل لين جبت وحتى بنتي طلعت ناقصه وتعبانه والحين معها فرط حركه لاني كنت اعاني مراره وجرثومة معده وتعبانه تعب نفسي وصرت احس اني ندمانه بالفعل واني ابي ولد عمي لكن قلت لا بكرا اخاف اتطلق وياخذ بنتي مابي انحرم منه وابوي يرفض الطلاق وكان يوعدني اني اذا حملت راح يجيبني عنده وراح نقرب لبعض المهم حملت وطاوعته وجبت وبعد ست شهور خذاني عنده لانه نقل نفس المنطقه الي فيها اهلي كنت فرحانه لابعد الحدود لكن ي فرحه ماتمت لاحظت ع زوجي انه كل فتره ينعزل لحاله بالدوانيه ويسكر ع نفسه الباب واذا جيت ودقيت عليه فلان وش فيك وكذا يبات بالدوانيه ولا اظن انه نيم كان ع الجوال بس ويتغير اسلوب معاملته لي سب وشتم وصراخ وضرب اذا احتد الموقف ماكان طبيعي مره يرد ينام يوم كامل ولايسوي شي لنا لو نموت
ي رب وش فيه اكتشفت انه كان ياكل حبوب وحتى انه كان ياكلهن من قبل اتزوجه ي رب انا ايش ورطت حالي فيه انا يوم كنت مع اهله كان يروح ويجي ولا الاحظ عليه شي ابد ويعطيني فلوس مع انه فقران حافي منتف من ديونه الي بسبب وبدون سبب هو عسكري وانا مخلصه جامعه المهم طلعت حامل ي بنات وربي ماكنت ابي الحمل لكن الحمدلله ع كل حال صار الوضع كل مازاله يسوء وصار ولدي الصغير الحين عمره ثلاث سنوات وصار زوجي بدال اليوم يسهر ثلاث ايام بره البيت وينام يومين متواصلين والمشكله منكر انه ياكل الحبوب ولاعمري شفت معاه شي وكل فتره ازعل واروح لبيت اهلي بعد ضرب وخناق واحلف ماارجع ولكن لما اشوف اهلي مايتحملون شقاوة عيالي ويعاملوني انا وياهم انا بس اكرف لهم وعيالي يهاوشونهم ارجع عليه اجلس كم شهر وارد عليه مع انه ابوي اخر مره اقتنع اتطلق من كثرة المشاكل بيننا قال اخلعيه بس من ضغط المعامله السيئه الي القاها ورافضين انه اسكن لحالي وهو يرجع يرسلي انه يبي يتغير وارجعي واشتريت بيت لنا وكذا المهم رجعت لكن اعاني وتعبانه نفسيا جدا
الحين عمري ٣١ومدة زواجنا تسع سنوات حصيلته ثلاث اطفال ضحيه مانعيش استقرار جاني اكتئاب وقلق وتوتر وقلة نوم وقالون عصبي ويرتفع ضغطي احيانا وهو انسان بارد خامل صرت اكرهه كره عميق اتمناه يموت شكله يفشل لبسه مبهدل معاملته معي ع طول يعصب ويصارخ ويشتم مايعرف الحوار حتى مع عياله مايتكلم الا العن والدينك ويضربهم احيانا بس الحقيقه هو يحبهم واحن عليهم من اهلي ولكن يهملهم اذا طلع وسهر بره واذا جاء نام يومين بعدها يصحصح معنا يوم ويصير حليل معنا بعدها يداوم يوم ويطلع ع وجهه سهران كم يوم وترجع الكره من جديد الله ي خواتي حت سيارته متكسره وخربانه ومو باسمه لان عليه مخالفات سبع طعش الف ماسددهن وكل تصرفاته خطا وحتى البيت الي فرحت فيه طلع شقه صغيرونه ماكانه بيت ولا اثثه لي زي الناس مع انه خذو عليه البنك ست ميه الف فوائد باقي الفلوس ميتين مادري وين راحت وين وداهن مايعلمني يقول دين والحين يجي الراتب اترجاه يتقضى بشق الانفس يتقضى يقول مابقى وراح ولاظل شي طيب عطني مصروف ماعندي نادرا يعطيني ضيعنا ضياع بديونه وفقره وسوء اخلاقه ومعاملته وحتى ولد عمي هذا تزوج ي حسرتي وعنده ولد وحامل حرمته ومدلعها دلع وانا اكل بنفسي بالحسره
والمشكله بعد انه زوجي صار معاه ضعف جنسي شديد مايقربلي الا مره او مرتين بالشهر ولا استمتع معاه بالعلاقه بشكل كاف بسرعه يقذف وانقهرت ع شبابي الي ضاع مرات اقول لنفسي ليتني هجيت اول العرس وفضحته لانه شكل كان معاه ضعف بس انا مافهمت الامور الا الحين
يا حريم مميزات زوجي الي تكاد تكون معدومه انه اذا صار معه فلوس ونادرا يصير وطلبته يعطيني ولكن مايحب يوديني سوق ولا اي مكان يتعاجز ولايحب السوق المهم وبعد انه عياله متعلقين فيه هو احسن عليهم من اهلي بشوي مع انهم مو مرتاحين حييل من المشاكل بيننا الحين وش اسوي وش الحل وانا يوميا كارهه وجوده بحياتي كارهته ي بشر كل يوم قاعده اغصب نفسي عليه عشان اطفالي وخاف يتشرودون وكذا فكرة الطلاق معششه براسي من زمان ماقدرت اشيله رحت لابوي من كم اسبوع اترجاه ابي اجيه اتطلق قال طولي بالك خليه يولي وش تبين فيه دام عندك بيت كولي واشربي وماعليك منه طلع ولا نام ولا اكل حبوب قلت ي يبه مايكفي اكل وشرب وبيت بس مو عارفه مو راضين اسكن لحالي والسكنى معهم مو مريحه لي ولعيالي شسوي افيدوني جزاكن الجنه بدون تجريح طبعا صلاته اي كلام وصاير يسحب عليها ومقصر من ناحيه ربه خصوصا بعد وفاة امه من سنه واحسه صاير ميت مو معنا لا احساس ولا شعور