ارمله وما حتاره !?

السلام عليكم ورحمت الله وبركاته
يوووه من زمااان ماشاركت اشتقت لكم ي اجمل عالم
خواتي بادخل بالموضوع سيده ........
اول شي وقبل اي شي انا ارمله وعندي ثلاث اطفال
وبنظره مجتمعي اللي انا اعيش فيه تعبت والله كل من ينظر الي بنظره اني انا اللي قاتله زوجي 😩
مايدرون اني كنت اتمنى الموت بداله وللحين اتمناه انوا انا ولا هو الله يرحمه ويغفر له
تعاملت معامله قاسيه من قبل امي وابوي واخواني يكفي نظره اللي حولي حرام مسكينه ماعندها
اهلي الله يصلح حالهم مراقبه بكل وقت من جوال من طلعه من دخله حتى وقت نومي حتى الحمام ان طولت وش تسوين تدخل امي غرفتي اخر الليل تتاكد اني فيه او لا اقسم بالله اني اقعد ابكي قهر على حالي وحال اطفالي
تعبت من شكوكهم وفوق ذا ما اطلع ولا اجي الا بعد ميه اذن واذن ومستحيل اكون لحالي يعني زيارات جارات صديقات اهل زوجي مافي مو لازم مو ضروري اقعدي خليك عند عيالك حتى عيالي كارهين القعده ويمه متى نرجع بيتنا والله اني شاب راسي وانا باول شبابي
حتى عيالي ان شرى لهم اخوي لو شي بسيط اسمع الكلام منا ومنا مايصرف عليكم غير فلان خلصتم راتبه وهي لو اجمعها كل الاغراض ماتجي ميه ريال بالشهر وبنتي ي قلبي عليها مالها حق لا بلعبه لا حتى ببسكوت انتي بنت والله اوقات تجيني تبكي يمه انا مو زي اخواني ليش مايجيبون لي
المهم مالكم بالطويله معاناه لو اجلس لبكره اكتب ما عرفت اعبر او اطلع كل اللي بقليبي
تقدم لي اخو زوجي رجال كبير فوق الخمسين وعياله كبري والله ي خواتي اني وافقت ودمعتي على خدي ابي بس ارتاح قلت ماعليه اتحمله ولا اني اكمل حياتي كذا خصوصاً عيالي توهم صغار
قلت جى الفرج وياليتني ماوافقت ندمت مليون مره 😭😭
تخيلوا ي بنات بعد فتره داق على اخوي والله ما اقدر زوجتي وعيالي ماوافقوا وانا ما اقدر
اقسم بالله حرق قلبي وقهرني لا تحسبني ميته عليك الا ابي الافراج من اللي انا فيه والحين فيه واحد اسمر امام مسجد تقدم لي وانا مرتاحه له بس انه من عرق اسمر المشكله مو هنا عندي انا راضيه وابيه بس المشكله اهلي رافضين
سوالي لكل من مرت بنفس ظرفي من عاشت نفس الآمي من ذاقت مراره العيش بدون رجل هل تؤيدين الزواج لي
ولا زي ماقالوا خواتي اللي تفكر بالزواج ذي مريضه
ما الومهم لانهم مامروا بنفس اللي انا فيه زي مايقولون اللي ايده بالنار غير اللي ايده بالمويه
هل الزواج افضل لي ولا اتحمل عشان عيالي والله يصبرني ؟!
مع العلم عيالي صغار بس يفهمون ويحسون ويقولون ي ماما تزوجي خلينا نروح من عندهم