السلام عليكم
انا عضوه جديده وسجلتني بنت اختي في المنتدى لاني محتاره ومو عارفه اقرر مصيري محتاجه لمساعدتكم ودعائكم لهدايه اولادي
انا ارمله وعندي خمسه اولاد من توفى زوجي له اربع سنوات عشتها في عذاب وهم ومشاكل واتنقل من مكان لمكان كاني مشرده مع عيالي
انا ساكنه في منطقه غير منطقه اهلي بعد وفاة زوجي قررت اني ابقى في بيتي مع عيالي ويكونون قربين من اعمامهم لانا اخواني شايلين يدهم مني ومستحيل يهتمون فينا عمي مارضى ابقى قالي لازم ترجعين لاهلك بعد العده رجعت لمنطقه اهلي ولا احد من اخواني استقبلني وعمي مارضى اسكن بعيد يقول عندك اطفال صغار يمكن تحتاجين لشي او يصير شي لكم لازم يكون رجال قريب منكم ويهتم فيكم
وصرت اتنقل من سكن لسكن لين استقريت في شقه في بيت اختي وحسيت بالامان والاستقرار صارت اختي وزوجها مسؤلين عنا
كان صعب علي اروح اي مكان لحالي لاني خوافه وخجوله استحي اركب تكسي واروح اي مكان الا مع اختي او زوجها يودينا
ولدي الكبير حسيت انه تغير كثير يمكن ما عرفت اربيه او تأثر بالي صار لنا صار لسانه طويل علي وكلا يتأفف ومايعجبه العجب مع اني مو مقصره معاهم ايام انام جايعه واعطيهم اكلي ياكلونه فديتهم بروحي وقت وفاة ابوه كان عمره 12 سنه كلا ساكت ومايتكلم
صار يمد يده على اخوانه ومايسمع مني كلمه واذا احد كلمه ينزل رأسه ويسمع منهم متفوق في مدرسته والكل يمدح فيه بس في البيت غير معاي ومع اخوانه
مره مد يده علي وضربني ودفني لين طحت على الارض وقتها عصبت وطردته من البيت لاني ما تخيلت يجي يوم ولدي يمد يده وانا مو مقصره معاه خذه عمه كم يوم ورجع يعتذر مني
جاني الضغط منه
مشكلتي الحين تقدم لي رجال مطلق وعقيم من طرف زوج اختي انا رفضته لاني مافكر في الزواج رجع بعد فتره خطبني مره ثانيه واخته كلمت اختي عشان تقنعني اختي كلمت عمي بالموضوع وسالو عن الرجال والكل يمدح فيه حتى زوج اختي يقول رجال محترم واخلاق مطلق وتزوج مره ثانيه وصارت مشاكل وطلق والحين يبي يستقر يبي يتزوج ارمله ويربي عيالها معاها لانا سبق تزوج مطلقه وصارت مشاكل مع طليقها وخذ عياله وطلبت الطلاق
واختي بعد كلمت اخت زوجي الله يرحمه وصار عندهم علم والكل يكلمني ويقنعني اتزوج يقولون حرام توك صغيره ورجال ماعليه كلام ومستعد لشروطي كلها وعشان يساعدني في تربيه العيال
انا فكرت في الموضوع واقتنعت في كلامهم لانا تربيه الاولاد صعبه يبي لهم رجال له قلب والله ما انام الا وانا دمعتي على خذي كل ليله خايفه عليهم اشيل همهم من يطلعون للمدرسه لين يرجعون مرات مجلس الاباء مايقدر زوج اختي يروح لهم في المدرسه وينقهرون ولدي من يقولون له مجلس الاباء يقول انا ماعندي ابو ابوي ميت يكسر خاطري حتى اذا احد مرض من الاولاد مقدر اروح معاه لحالنا للمستشفى مره رحت قالت لي الدكتوره مره ثانيه خليه يدخل قسم الرجال لا تدخلينه قسم النسا
مقدر اروح مكان او عزومه او جمعه كلا جالسه في البيت لاني اخاف عليهم لو خليتهم مع اخوهم يضربهم جمبي ويضربهم ويربطهم وشلون من وراي لو اقول له يوديهم البقاله بس مايرجعون الا خدودهم حمرا من الكفوف مايسوا عليهم البطاطس او الحلاوه الي يشترونه صرت انا اطلع اوقف لهم جمب البقاله ويشترون الي يبون
ولدي عرف بموضوع الزواج عصب وانقهر قال لا ماتتزوجين تزوجتي ابوي ومات بس ماتتزوجين مره ثانيه تفشلينا
كلمته اختي وزوج اختي مو راضي يقول اذا تزوجت مابيها وماراح اروح معاها وتنسى انا عندها ولد
عمه قاله خلاص خلها تتزوج عشان اخوانك وانت تعال عيش معاي ومع عيالي
الكل يقولي تزوجي وحطيه تحت الامر الواقع ومصيره بيرضى بس انا خايفه عليه ما ابيه يتأثر اكثر ومابي يروح عند عمه لاني بشتاق له ابي الزواج يكون برضاه اخاف اذا تزوجت واضطر يجى معانا يطول لسانه على الرجال
والله محتاره شسوي الرجال عارف بالموووضوع وعارف انا ولدي رافض بس منتظر انا نقنعه و مقدر ضروفه ووضعه
ولدي شاف الرجال كم مره وعارفه وجلس يسولف معاه من قبل مايعرف ولدي انه خطبني
اتزوج او ارفض واعيش طول عمري في هم وخايفه عليهم
عمري 36 سنه
اكبر اولادي 16
واصغرهم 4 سنوات وسبعه اشهر
الارمله أم الابطال @alarmlh_am_alabtal
عضوة جديدة
يلزم عليك تسجيل الدخول أولًا لكتابة تعليق.
maram@
•
ماشاء الله تبارك الرحمن الف مبروك اختي الله يجعلو زوج صالح و يسعدك ويعوووضك فيه يارب
من موضوعك واضح انك مايله لراي الزواج و انك تشوفي انه اريحلك
مدامو رجال و الكل يشهدلو اتوكلي على الله واستخيري اولا واخيرا اما ولدك
يمديك تستشيري دكتوره نفسيه بالطريقه المناسبه لاقناعو
بس لا تضيعي عمرك عشان مراهق عمرو ما وصل العشرين
هذا بكرا يتزوج ولا يدري عنك
الزواج حفظ لك ولعيالك ان شاء الله وربنا الحفيظ قبل وبعد
عسى ربي يوفقك ويكتبلك الله فيه الخير ويعوضك عن كل هم عشتيه بحياتك
من موضوعك واضح انك مايله لراي الزواج و انك تشوفي انه اريحلك
مدامو رجال و الكل يشهدلو اتوكلي على الله واستخيري اولا واخيرا اما ولدك
يمديك تستشيري دكتوره نفسيه بالطريقه المناسبه لاقناعو
بس لا تضيعي عمرك عشان مراهق عمرو ما وصل العشرين
هذا بكرا يتزوج ولا يدري عنك
الزواج حفظ لك ولعيالك ان شاء الله وربنا الحفيظ قبل وبعد
عسى ربي يوفقك ويكتبلك الله فيه الخير ويعوضك عن كل هم عشتيه بحياتك
الصفحة الأخيرة
استخيري
الله يوفقك للخير