اروح زواج اخويا ولا ما اروح

السلام عليكم

بنات انا زواج اخويا بعد 10 ايام
من بداية الملكه واحنا محد فينا اتدخل في اي شي من قرارات اخويا وزوجته بس يا بنات اخويا اتغير بدرجه مو طبيعيه حتى امي ما استشارها في شي ولا ياخد بكلامها ومخلي كل شي في يد عروسته واهلها واللي ماسك موضوع الزواج من الشقه للفرح امها واحنا مره مالنا اي صوت

هذي نبذه عن الموضوع

اللي سار امس

اني دقيت عليها وقلت لها انو احنا ما نبغى احد من رجالهم يدخل لا اخوانها ولا ابوها وهذا المتعارف به عندنا

وردت عليا هيا باسلوب شوي استفزازي وكانت مع اخويا في السيارة

انا كلمت اخويا الثاني يتفاهم مع اخوي الكبير ويقول له ان احنا البنات امه واخواته نبغى ناخد راحتنا في زواج اخونا ونبغى ننبسط

قام خاصم اخويا وطرده من الغرفه بس اخويا قالوا انو حرمتك كلمت اختى باسلوب استفزازي

قام يدافع عن زوجته وهي قد سبق وكلمت امي بنفس الاسلوب الاستفزازي

يا بنات يشهد الله انى ما بالغت بس انا شايفتهم قاعدين يستغلوا اخويا نتفوه والله ماعاد عندو في حسابو ريال واحنا ساكتين على اساس انو مالنا دخل نبغاه يفرح

بس الموضوع زاد عن حده

لو كانو ابوها واخوانها محترمين كان قلنا معليش يدخلو

بس والله يا بنات في الملكه حقتهم اخوها يفتح الباب على الحريم يددخل راسو ويتفرج بعذر انه يبغى يكلم امه

واخوها كبير وموظف عشان لا تحسبوني اتكلم عن مراهق

وامها من يوم الملكه ليومكم هذا ما دقت على امي ولا حتى اتصال او سلام

حتى الشبكه راحت هيا وامها اشتروها بدون امي ولا وحده من اخواتي في وحده تروح تشتري طقم شبكتها؟

الزبده انو امس اخويا الصغير اتهزء وقال انه يمكن ما يحضر بسبب انو اخويا ساكت على حركاتهم بشكل فضيع

وانا زوجي خيرني وقالي لو اخوكي مو عامل لك حساب لا تحضري زواجه وهو مهينكم مو عامل لكم قيمة قدام حرمته

وفعلا لو دخلو ابوها واخوانها ايش يطلعهم والله ما راح يطلعوا الا بعد الزفه وبنجلس احنا ام العريس واخواته زينا زي باقي الحضور ضيوف

يعني اروح ولا ما اروح؟

نبهوني اذا انا غلطانه في شي او ما معايا حق ولاحد يقول انتو اخوات الزوج دائما كدا لان انا ما اتدخلت في اي شي

بس فعلا كنا نبغى نفرح بزواج اخونا اول زواج لولد من عيلتنا