اريد طريقةعشاء خفيفة ولذيذة

عليكم السلام يا رغد الخير .....فيه طريقة روعة نفس طريقة المطاعم وهي حلوة وسهله بس لازم تشترين الاشياء هذا وان ما قدرتي بعطيك طريقة ثانية ما تكلف .
الطريقة الاولى:
تشترين الشوربة الجاهزة من أي سوبرماركت كبير وأقصد بالشوربة هي الا بودرة وتضيفين الماجي وقليل من النشأ وظرف الشوربة وعلى النار شوي وهي تخلص بسرعة وأشتري معها بساكيت يسمونها بساكيت السوووووب تحطينها بجوار الشوربة وعند الاكل تكسرينها في الشوربة تطلع رووووعة ..هذا بالنسبة للشوربة بعدين طبق السلطة تأخذين صحن مقسم شكلة حلو وتقطعين فيه خس وتنثرين عليه جبن كرفت الازرق أو تشترين خلطة جاهزة أسمها الف جزيرة ترا هي روعة ...وتقطعين فلفل صغار وجزر مبشور ونصف حبه ذرة اما مبشورة أوعلى شكلها وتغلين حبة بطاطس وعشر حبات مكرونيا معها ملح خفيف وشوية ماجي وتحطينها مع السلطة وأربع قطع جح مربعات بدون القشر .. وثلاث حبات خوخ جاهز وأذا تحبين تضيفين خيار وحبة فراولة وغيره..

اما الطبق الاساسي فهو طبق التاكو تأخذينه نفس الشي من السوبرماركت هو جاهز بس تسوين لحم مفروم مع بصل وفلفل أخضرفقط وطماطم حتى ينضج الحم ثم نضعه من على النار وتكونين مجهزة طماطة مقطعة صغار وخس وجز مبشور طبعا بدون طبخ وجبن كرفت مبشور
لأول شي تسخنين التاكوا في الفرن عشر دقايق بعدين تطلعينه وتحطين شوي لحم مفروووم وشوي طماطم وجزر وخس وجبن تم تصبي علية شوي من السلطة الموجودة في علبة التاكوا وتنثرين حولة من السلطة المتبقية ...
أما المشروبات فأحلى شي معه البيبيسي بس نستبدلة بعصير الشامبانيا الموجودة في المنتدى لانها رووعة ... وادري أني طولت عليك بس يالله باااااي ..وأن ما أعجبك أتمنى البنات يفيدونا ويكتبون انواع للطبخ الخفيف .

تحياتي :cook:

رغد الخير

حياك الله

مافيه أخف ولا أسرع من النواشف

ولما تضعين طبق البيض ... غيري فيه ... يعني مو كل يوم نفس الشكل

يعني مرة بيض مع بصل محموس على النار وملح
ومرة قرص بيض واطويه بحيث يكون نصف دائرة واحشيه بحشوة من البصل والطماطم والفطر المحموس على النار والفلفل البارد ... أو جبن شرائح سيذوب مع الحرارة ... المهم على حسب ذوقك
ومرة بيض عيون
ومرة بيض مع بصل اخضر
ومرة شكشوكة
وفيه حركه شكلها حلو ... اخفقي البيض مع شوية ملح
و قطعي الطماطم شرائح دائرية .... وبس حمي في المقلاة مسحة زيت وضعي البيض عليها وخلي النار اقل من المتوسطة
وضعي شرائح الطماطم بشكل مرتب وغطي المقلاة بأي غطاء يناسب مقاسها وبس وماتاخذ وقت وتستوي وتطلع منتفخة تهبل وهني وعافية عليك :)

ومرة سوي فول ... نوعي في أشكاله
ومرة سوي عدس يكون خاثر ويؤكل بالخبز ... اذا ماتعرفين الطريقة اسأليني
ومرة سوي ساندويشات ... أشكال وأنواااااع

وممكن تقدمين أنواع من الشوربات
موجودة في المنتدى ... فقط سوي " إجراء بحث "

بالنسبة للمشروبات
يوم قدمي مع العشا شاهي وحليب ابو قوس مثلاً
ويوم قدمي حليب طازج مع أي نكهة تحبينها
ويوم قدمي كاباتشينو تلقينه في قسم المشروبات لذيييذ جداً



وعلى العموم المنتدى مليااااااااان ماشاء الله تبارك الرحمن
روحي لقسم المقبلات والسندويشات
و بتلقين أفكار كثيرة ان شاء الله :27:

ام دحومي الله يعافيك انا ابغى طريقة العدس الخاثر اذا ماعليك كلافه

أبشري يا لــــــــــــولي :27:

العدس الخاثر :

كأس من العدس الأصفر أو البرتقالي ( أنا أفضل البرتقالي)
ماء ...
لما تحطين العدس في القدر تضعين عليه الماء بحيث يكون الماء أعلى من العدس بسنتيمتر واحد ... وتخلينه على نار بين المتوسطة والهادئة
الين تشوفينه بدا ينهرس

ياخذ له تقريباً ثلث ساعة ممكن تزيد لو زدتي الكمية .. الله أعلم

في هالأثناء كشني بصلة صغيرة مقطعة في قليل من الزيت واذا بدأت تذبل أضيفي طماطة متوسطة مقطعة أيضاً
وأضيفي ملح وقليل من البهارات ... أو ماجي وتستغنين عن الملح والبهارات

غطي الكشنة وخليها على نار هادئة

المهم اذا حسيتي ان العدس خلاص بدا ينهرس ومويته قلت

حطيه في خلاط الطماط مع الكشنة

ورجعيه على النار شوي بس قد انه يحتمي

وقدمية مع الخبز

وبالهناء والعافية

ولو تبين تسألين تفضلي ... لا يردك إلا لسانك :42:

وعلميني اذا جربيته وش يصير عليك :cook:

هلا حبيبتي ام دحومي مشكوره ياعمري ماقصرتي حياتي
اختي اذاعندك طريقة حلا سهله وغريبه الحقيني لان دوري في القهوه يوم الأثنين الجاي والمدرسات الله لايوريك كل يوم وحده اجيب حلا احلى من الثاني ومابغى اصير اقلهم تكفين ألحقيني بحلى زين وغريب
ماعليش تراني ماانعطى وجه :27: باااااااااااااااي