اريد نصائحكم في تصميم منزل جديد

تسلمين حبيبتي موف
افكارك جدا راقية ياليت تزيديني
والمساحة 1000

اهــــــــــــلا بك يا أختــــــــــي الرقيقة

ثقي ثقة انه مافي احد راح يرد عليك ،،، فا أنا كتبت نفس طلبك في افكار لتخطيط منزل ونزلته مرتين ولأحد يرد علي

وانتي نفس الشي محد رد عليك ؟؟؟؟ تدرين وش السبـــــــــــــب ؟ هو لا ننا عضـــــــــوات فقط ومايتنزلون يردون علينا لاننا بنظرهم مانستـــــــــاهل ..................

حبيبتي ريف المعالي
وجة نظر ممكن تكون صحيحة
لكن خلينا نعتقد حسن النية يمكن تكون الامتحانات هي السبب
ويكفي ان الغالية* موف* عبرتني
لكن عندي لك اقتراح وش رايك يكون تواصلنا عن طريق الخاص
نطرح افكارنا لبعض بخصوص الافكار في تصميم المنزل..

ما اعتقد انه السبب عضوات أو محررات أو غيره :)

بس اتوقع انه أحيان طريقة طلب الاستشارة أو المساعدة في الموضوع
فلما يكون الطلب كثير عام ومب محدد الواحد يحتاج أنه يبتدع أو يفكر كثير
وأحيان يقول يمكن ماهو هالشي اللي صاحب الطلب يقصده! وأحيان يتوه

يعني لو الواحد يكتب جميع التفاصيل عن طلبه ويحط قدام القارئات كل المعلومات اللي يتوقع
انها راح تطري على بالهم عشان يوفر وقت لنفسه وبعد يلقى نتيجة ترضيه, ونتيجه راح تفيد
اللي يقرون من بعده.

يعني لو تعيدين كتابة الموضوع أختي وتكتبين من البداية

مساحة الأرض!
عدد أفراد الأسرة مثلاً! أو عدد غرف النوم اللي محتاجينها ومحددة!
طبيعة صاحبة البيت يعني مثال لو تقولين (أنا من النوع اللي استقبل ضيوف كثير) عشان الواحد يركز على هالناحية.
أو أنا من النوع اللي قعداتنا كذا..!!

أو أقلها تقولين وشو تأملاتج أنتي من هذا البيت عشان يقدرون ينصحونج باللي يرضيج.

بالنسبه لي شي صار في بنيان بيت وندمت عليه
البيت الأول: عدم التركيز على مواقع الشبابيك يعني اللي قلل الإضاءة والتهوية.
البيت الثاني: شبابيك ملأت المكان وكانت النتيجة مافي مجال لتنسيق الأثاث بشكل جيد.

صاير العكس بالضبط .. عموما نصيحتي أنه توضعين تصاميم وأماكن الأثاث بصورة تامه ومريحة لج
يعني ماهو التصاميم اللي تي جاهزه مع تصاميم الفلل لأنها أحيان ما تتناسب مع طبيعتنا ..!!
حاولي تخليين قدامج خيارات مفتوحه في تغيير أماكن الأثاث للمستقبل البعيد عشان تبعدين الرتابه عن المنزل..

شي آخر أهتمي بتصميم المدخل (خلي يكون في مجال لتنسيقة) لأن كثير فلل الزاحد بعد ما يبني يوصل للديكور
يلقى أنه المدخل ما يتصمم بالشكل المرجو منه وحيث أنه يعتبر أول انطباع للشخص أول ما يدش بيت

هذا اللي عندي وأتمنى ما اكون بعيدة عن المقصود

اولا الاخت صاحبة الموضوع بالفعل انتي كتبتي الطلب بس ما وضحتي شي عن رغباتك واحتياجاتك
بالفعل هذا الشي يخلينا ما نعرف نرد
الاخت الي انتقدت العضوات انهم ما يردون على اي احد بدون زعل مافي داعي لكل هذي الحساسيه
احيانا الموضوع يكون مبهم ما يشجع على الرد واحيانا يكون توقيت كتابة الموضوع ما تناسب كثافة المتصفحين للموقع فلذلك يروح من غير ردود
بالنسبه لي انا اليوم متفرغه وراح اعطيكي كل الافكار الي على بالي الحين
اولا مساحة الارض تاثر على التصميم من حيث المساحات الداخليه
بالنسبه لمساحة الاحواش كيف تفضلينها بسيطه او واسعه فيه امسطحات خضراء مسبح مجرى ماء ديكورات خارجيه مثل نوافير شلالات طاوله للجلوس هل تحبين وجود ملحق خارجي
بعدين لازم يكون عندك تخيل لبعض التفاصيل و ما هي احتياجات الاسره مثلا هل الضيوف يكون تواجدهم بكثره في البيت فتركزين على منطقة الضيافه "المجالس" اذا كان ضيوفك قليل لا تحرمين نفسك من مساحة الدور السفلي عشان يومين بالسنه او تحبين تظيفين قبو بالمنزل للاستفاده منه كصالة حفلات او حتي صالة رياضيه. نجي للمطبخ هل تحبينه مغلق او مفتوح تحتاجي انه يكون واسع وايضا تظيفين "ديرتي كتشن" يعني مطبخ جانبي عشان حوسة الطبخ والقلي والصحون ايضا والشغاله
اذا كان عندك خادمه فين تفضلين غرفتها فوق تحت جنب المطبخ بر البيت وكذلك السائق
ايظا هل في تصاميم ديكوريه تحتاج شكل معين اثناء البناء الجبسيات كيف تكو تصاميمها كذلك الاضائه والاسفف والتكييف حجم الشبابيك والابواب مساحة الاسياب مواقع الحمامات ومساحاته حسب الاحتياجات غرف النوم غرف الملابس وفي ملاحظه اب انبهك عليها انه الحمام الي في نفس الغرفه ممكن يكون سبب لرائحه كريهه بالذات حمامات الاولاد لذلك الافظل ان لا تكون داخل الغرف ولو مافي مفر تكون في سيب بينها وبين الغرفه كذلك تربويا الافضل ان لا تكون الغرفه لطفل واحد افضل انه تزيد في مساحة الغرفه لتكون لشخصين كذلك مساحة دواليب الملابس الافضل تكون واسعه تعرفين كثر مقاضينا بعدين تتضايقين في المستقبل ما يصير احسبي حساب هالشغله الصاله الي في الدور العلوي يكفي انها تكون متوسطة المساحه بالنسبه للاثاث لا زم يكون عندك تخيل لحجمه وعدد القطع عشان بعدين ما تندمين يعني مثلا تحبين الستاير من ضمن الجبس تتركب
السرر والتسريحه فين مكانها بالغرفه عشان اماكن الافياش والشبابيك وكذلك المكيفات بعد لو تحبين تكون عندك غرفه خاصه للغسيل وايضا مساحة الدرج وحجمه وشكله وفي نصيحه راح تساعدك على تخيل اشياء كثير وتساعدك بافكار كثير سواء في التصميم او التشطيب انك تروحي تشوفي فلل جاهزه
هذا الي عندي الان بس سامحينا الافكار غيرمرتبه