ماقصروا البنات بس نصيحه الافضل تقولين لأبوك يسأل كل اسئلتك
ماله داعي تسألين مو عيب فيك بس بعض الرجال يفهمونها غلط
وسبحان الله من النظره ربي يعطيك الاجابه ف لاتخافين .. الله يوفقك يارب

من حقك تسألين عن كل شي ومن حقك ترفضين لو ماعجبك ماعليك منهم هذا شي عادي والكل يتقبله ,,
واحس لازم يشوفك حتى انتي تتطمنين انك عاجبته وهو عاجبك مو زواج عمياني وماحللها ربي الا لحكمة


اذا منحرجه من اخوانك مو لازم يدخلون ابوك يكفي لان لازم احد معكم لكن مولازم العايله كلها تدخل لان حتى هو بينحرج ولا يقدر يشوفك

كل اللي سألوا ايش صار
الخاطب الاول اعتذر وراح

بس صارت نظرة مع خاطب ثاني متزوج وعنده عيال واهلي مررره مقتنعين فيه لدرجة همشوا رأيي وبدأو يحددون معه مواعيد لآنه من جماعتنا ويحبوه كثير

المهم كنت رافضة واهلي خصوصا ابوي ضغط علي بشكل قوي لدرجة يقولي طالبك طلبة توافقي قلت له اللي تشوفه انكسفت منه وكنت ذيك الاوقات اتمنى الموت ولايتم ذا الزواج وزعلانه على اهلي من قلبي واستخير باستمرار
كنت ابكي بغرفتي بألم خايفة من زعل اهلي وما بغى متزوج وكانت اختي تقول صوتك بكائك واضح وابوي وقف عند الغرفة سمعك وراح وكمان اخوي الكبيرمسحت دموعي وطلعت من الغرفة ولا احد سأل يشوفون وجهي متنفخ وعادي
امي مريضة ومع كذا تقولي لا تشيلين هم بأساعدك بحياتك باطفالك شغلك تظلين فيه وراح ازورك بالمدينة اللي بتسكنون فيها
وردي الاخير كان موافقة

جاء يوم النظرة وكان بعد العصر مباشرة صليت ودعيت وتجهزت جاء اخوي قالي قومي معي الجماعة ينتظرون رحت لأمي بغرفتها وقلت ادعي لي, شكلي زين؟؟ قالت ربي ييسر امرك وخواتي بعد يعدلون في شكلي وبسرعة مشيت مع اخوي

اصعب وقت كان المدخل احس اني باتراجع واخذت نفس ودخلت امشي ورا اخوي وجلست جنب ابوي وعيني بالأرض وعم المجلس السكون 2 اخواني قبالي واحد يناظرنا والصغير عينه بالأرض
تكلم ابوي وقال هذا الدكتور فلان وهذي بنتي احد عنده سؤال يسأل وهذاك يتمتم ما ادري ايش يقول المهم لما سكتوا قالي ابوي اطلعي وما تحركت رجع سألني ابوي تبين شي تسالين عنه قلت لا قال خلاص اطلعي طلعت من المجلس ورحت لأمي وخواتي قالت ايش ما دخلتي؟ قلت لا خلصت النظرة وماشفته ما قدرت ارفع راسي بس كل لبسه ابيض
قالت ايش ذا السرعة ما اخذت دقيقة رجع اخوي سأل الرجال شفت البنت والا ترجع تشوفها ثاني قال لا شفتها زين خلاص قاله اخوي ننتظر ردك
وقلت لخوي ابي اشوف شكله ووراني صورة بجواله
المهم اخواني وخصوصا ابوي بالمرة كانوا منحرجين اكثر مني وكنت اتوقع اني بيكون لي رأي لما اشوفه ابدأ ما حسيت بشي لا تضايقت زيادة ولا ارتحت له
المهم مر يوم
يومين
اسبوع
اسبوعين
مافيه اي رد
وقتها سألت اهلي رد عليكم قالوا لا قلت ما كان فيها شي يقول مافيه نصيب خصوصا انه ما كان فيه اي تعقيد من ناحيتهم كل ما قال لأهلي شي قالو موافقين
وفعلا اهلي وابوي واخواني متضايقين منه كثييير وقالوا خلاص انتهى الموضوع بس ماراح نساله ننتظر نشوف يرد ولا يظل ساكت
بعدها بشهر صارت مناسبة عند خالتي وحضر الرجال وعادي قابل اهلي ويسلم عليهم كان مافيه شي
بعدها بيومين خرج ابوي مشوار واتصل على اخوي يجيهم وعلى العشاء رجع اخوي معه دبلة ويقول قابلهم العريس ويقول كان مايعرف ايش رأينا وحس ان البنت بخاطرها شي >>>مدري ايش يبغى وحدها متشققة من الضحك ؟؟؟>>
وكمن انتظر حتى يقابل الشيخ عميد العايلة ويسأله عن المهر والامور المتعلقة فيه <<< لو صامل كان برفعة تلفون سأل عن كل اللي يبيه - مايستاهل ياخذ كل هالوقت
ولو كان متردد برأيه ومحتاج وقت يفكر ما كان رفض ابوي بس هالتطنيش ولما شافهم تذكر ماينفع
وجاب معه ظرف فيه المهر ومااخذه اخوي وابوي قاله يوم ونرد عليك

لما تكلم اخوي معي وأمي قلت لهم انتم عارفين رايي قال بكيفك ؟ وحتى الدبلة ماشفتها

رجع ابوي مستانس ويقول ابشركم الرجال رجع وموافق قلت السموحة انا ماني موافقه ابدا << اصلا توقعت اننا خلاص اخذنا قررانا كعائلة وانتهى الموضوع>>
زعل ابوي شوي وقال لامي كلمي بنتك تعقل وخلاص هدأ ابوي
اليوم اللي بعده قابلوه وردوا له الدبلة ولما رجعوا حتى ماقالولي خلاص انتهى موضوعه ولا كأن لي علاقة رحت سألت امي وقالت لما قالوله مافيه نصيب زعل وانصدم
وامي بعد شكلها متحسفه

وبس انتهت هالسالفة الي ربي كاتب ماتتم
والحمدلله

صارت النظرة بدون ماحسب لها حساب
المهم اللي كان ببالي واسئل وذا ماتكلمت
كنت خايفه جيت سكت هو سئلني شخبارك وكذا وطلع
على طول جت الموافقه منه
ووحده تقول اسئل وعادي وابوي موجود بعد ولا كتب ربي نصيب بينهم
لان احس صعب نسئل وذا , اذا عندك سؤال اهلك يسئلونه
وشيء اخير ماكنت مأيده النظره الشرعيه بس صارت

الله يكتب اللي فيه الخير لك