توكلي على الله ومن غير تفكير روحي ل زوجك

كلنا في بلاد غربه وكلنا نشتاق لأهالينا بس ما نخلي ابونا اللي هو الزوج لوحده

حبيبتي بسرعه من دون تفكير قومي وجهزي شنطتك وايش تنتظرين يلى

:)

مشكورين الله يعطيكم العافيه بصراحه شجعتوني على السفر جزاكم الله الف خير

سندريلا الحلوه
هلا اختي معليش بتدخل شوي في امورك انتي ذكرتي انك بتخلين بناتك عند اهلك ليش ماتخذينهم معك انا ااعرفوحده مثلك تركت بنتها عند اهلها بسبب الماده بس والله عاشوا في حال الله اعلم به بس والبنت اصلا نفسيتها تعبت بالمررررررررررره والله حرام خذيهم واتكلي على ربك

وحدي مع الاخرين
معليش اختي انا الزم عليك وبالمره روحي مع زوجك لا تخلينه وتوكلي على ربك

البنات كفو ووفو
عارفه ؟ انا متغربه مع جوزى ومتأكده انه لو بعد عنى لحظه هكون فى غربه

السلام عليكم ورحمه الله وبركاته



اهلين اختي وحدي مع الاخرين بشري عساك قررتي تروحين مع زوجك وبشرتيه بالخبر الحلو تراني ادعيلك
وبعد هالغياب لاتنسين تتجهزين مضبوط عشان تنسينه السنه اللي عاشها بدونك وماعاد يكررها وحتى انتي باذن الله بتحسين بالفرق
مافيه مغترب بهالدنيا رايح وهو فرحان وعارف ان الامور سهله بس التوكل على الله وثم التعود يصير الامر طبيعي



ومعليش حابه اعقب على اخواتي العزيزات (saudi girl+الجودي2008)


احنا ظروفنا تلخبطت شوي فعشان كذا جاء هذا القرار
كنا طالعين السنه اللي راحت على حسابنا لماليزيا دراسه بامل الانضمام طبعا لزوجي ومعاي بنتين
ومااقدر ادرس لانو على حسابنا فاستقرينا واثثنا وبعد فضل الله جتنا البعثه بعد شهور من المعاناه
بس طار كل المبلغ وبذاك الوقت قرر زوجي ننقل لاستراليا عشان مستوى الدراسه واشياء كثيره معقده بماليزيا
المهم فجاه زوجي قرر اني بجلس بالحالي ياستراليا وبترجعين انتي والبنات وقلتله صعبه وتناقشنا شفت الرجال مصر
قلت بخليه براحته مع ان هالشي مو من شخصيتي بس قلت اغير الاسلوب واشوف شيصير رجعنا السعوديه
وراح هو لاستراليا


وبعدها بفتره ندم على قراره وقالي ابيك تجين بدون البنات لفتره مؤقته الاوضاع صعبه والسكن بالحجز لفتره طويله ونفس الشي الحضانه ولمن نتعود على المدينه اكثر ونرتب السكن ونسجلهم بحضانه كويسه ونعرف كيف ندير امور حياتنا بدون لخبطه
فكرت واستخرت وشاورت اهلي قالولي بالعكس لاتخافين ولا تقلقين بناتك ببيتهم وعند اهلهم
وزوجك طلبك تكونين جمبه هي فتره بسيطه وبعدها بستقروون انتم وبناتكم وقررت اني اسجلهم بروضه واجيب لهم شغاله مؤقته عشان تقوم بواجباتهم وتخفف عن اهلي شوي مسؤليتهم


طبعا كلكم بتقولون اقعدي عندهم بالبيت ولاحقه عالدراسه بس انا عشت هالوضع بماليزيا قعده البيت مع الاطفال في الغربه تجيب المشاكل والضيقه وحنا مو رايحين نخرب حياتنا لانو الرجال بيكون مشغول بدراسته لكن الزوجه بين الاطفال والصراخ والتعب ومحبوسه بهالبيت ومحد يقدر يلومه لانه جاي للدراسه لكن الهم كله عالزوجه
وحابه هالحين ادرس فقدامي خيارين اقعد بالبيت لحد مانضبط الامور والله اعلم متى واعيد معاناه ماليزيا
ولا اخليهم فتره واروح عند زوجي ونحاول نستقر وبعدها نجيب البنات


وطبعا انا اعارض الحضانات اللي بالبيت اللي اقترحتها الاخت saudigirl الله يجزاها خير بفكرتها عشان مااخلي البنات بس المشكله انو هالحضانات ماتكون بمستوى جيد اثق فيه لبناتي لانها ماتكون تربويه وتعليميه يكون مجرد انهم يمسكون الطفل لحد الاستلام وامكانياتهم بسيطه واحيانا المكان يكون ردى بعد فليش انجبر احط بناتي بهالمكان وانا لاقيه الوضع المناسب لهم عند اهلي والعنايه التامه صح راح يتقطع قلبي او بالاصح من الحين منهبله على فراقهم وهم راح يفقدوني كثير والله يستر من العواقب بس عالاقل اضمن بعد توفيق الله اني اامن لهم الحياه المناسبه
اللي يستقرون فيها معانا باذن الواحد الاحد

وبس طبعا انا قصيت لكم قصه حياتي كامله وغيرت مجرى الموضوع للاخت وحدي مع الاخرين بس لاني لقيت استغراب من البنات وانا والله مالومكم هالشي مايعتبر طبيعي بس احيانا الحياه يبغالها قوه عشان نواجهها
وربي يرزقني واياكم هذي القوه ويربط على قلبي وقلب بنياتي بهالفراق :(


طبعا المده المقترحه حاليا من هذا الشهر الى ذو الحجه بس لسى ماني عارفه متى بروح لحد مالاقي شغاله زينه
ادعولي الله يسخرلي الشغاله المريحه لبناتي والحمدلله ابشركم حاليا مبسوطين بالروضه




انتهيت <<<مابغت


واللي عنده اي تعليق او اقتراح هنا او عالخاص حياكم الله ماعندي اي مانع خواتي
وانبسط بمشاركتكم افراحي واحزاني