السلام عليكم ورحمة الله وبركاته
بعد ما قريت مواضيع كثيره متزايده عن السحر
حبيت انكم تشاركوني وتنصحوني وهل انا على حق او لا
انا زوجي مسحور واول ما تزوجنا كان بس يغمى عليه ويتشنج شوي ويصحى بس كل ما له والحاله تسوء.
وتطورت حالته وصار يستفرغ دايم شي اسود وكنت اظن انه من الدخان او من البيبسي بس انا نصحته يورح للشيخ وكان يتعب عنده مره ويستفرغ كثير اثناء القراءة ويضغط على بطنه ويضربه بس هو ما يلتزم مع الشيخ .
واستمرينا 4 سنين وقت ما يروح للشيخ ولو لاسبوعين يخف ويرجع طبيعي يمكن 6 شهور ويرجع ينتكس وصار ما يصلي واخر رمضان افطر في ايام كثيره ويقول غصب عني.
المشكله الحين انه رافض يعالج ويروح للشيخ وانا تعبت وما عاد فيني وكنت احتسب واقول هو زوجي وابو عيالي وحبيبي الي ما قدر صبري وتعبي وصرت اشوف ان تصرفاته صارت تاثر على بنتي وتخاف لما يصير معصب ويصارخ وصارت عصبيه وتاكل باظافرها لما تشوفه بدا يكلمني تقول اسكتواا مع ان عمرها سنتين وشوي وما احاول انها تشوفنا وانا نتهاوش بس صار هاذا روتين يومي , ولاحظت انه من ترجع له الحاله يصير يكلم بنات على الجوال واشوف صورهم في جواله واصبر على امل انه يتغير وكان يتعذر اني انا مقصره معاه في الفراش وصرت اسوي الي يبي له واحاول اني ارضيه بكل شي والله بيشهد عليه يوم القيامه اذا قال ما ترضيني وفي الاخير وربي يا بنات انه يقوم من فراشي ويطلع يكلم وحده منهم وانا اسمع واصبر واحتسب.
واخر مره رفض انه يدفع الاجار وانا حاولت ادبر جمعيه او سلف وهو رفض وصار يحط شروط تعجيزيه وفي الاخير كلمته بهدوء وقلت ان الموضوع كله لازم انك تروح للشيخ وتترك حركات الجوال وربي بيشفيك وبيهديك بس رفض وقال جوالي محد له دخل فيه والي مو عاجبه يروح بيت اهله قلت له اذا رحت ماراح ارجع قال لا ترجعين.
انا جلست في البيت كم يوم بعد هالكلام على امل انه يحاول يتاسف او يفكر في الموضوع بس ما صار وطلعت لبيت اهلي لامر ضروري وهو الي وداني وكان عادي حتى اني ما اخذت ملابس للعيال وانتظرت انه ياخذنا في الليل للبيت بس ما جاء.
وهنا اخذت قرار ان كرامتي لازم احميها هالمره واعزها انا ما اعترض على حكمة الله وابتلاءة بس انا حاولت وصبرت وتحسبت وهو ما بذل اي مجهود لاكن الا الكرامه وهالمره لا , مع ان الموضوع تكرر في حياتنا ولما شفت الموضوع وصل للتقصير في الصلاة والصوم لجاة لاهله وكلمتهم وقلت هم ستره وغطاه بس ما استفدت شي وما سوو شي وقالوا ما يه الا العافيه.
وبعدها بكم يوم صار عزا عندهم ورحت وحضرت العزاء ل3 ايام وكان يوديني ويرجعني بيت اهلي ولا حاول انه يناقش حتى وصبرت.
بعدها بكم يوم جا يشوف العيال قررت افتح معاه الموضوع وانه اثر على بنته على امل انه يغير رايه فرفض مره ثانيه فقلت خلاص ننفصل والي ابيه منك انه تعوضني عن الذهب الي عطيتك اياه على اساس انه بتعوضني بعدين وبس هاذا الي ابيه ووافق.
وانا الحين اهلي ما يدرون عن موضوع الانفصال لاني ابي اخذ تعويض ذهبي اول لانهم مايدرون اني عطيته اياه يبيعه لاكن هاذا جزا الي تحفظ سر زوجها وتساعده الجفا.
هل اقدر اخذ عيالي منه اذا وصلوا سن 7 سنين مع العلم انه يراجع في عياده نفسيه وما اتوقع انه مؤهل انه يرعى اطفال وهل يقدر ياخذهم اذا تزوجت لاني لسه عمري 26 واهلي ما راح يخلوني بدون زواج.
ابي نصايحكم او الي تعرف موقع او رقم استشارات تفيدني لاني ابي اعرف انا وش مقبله عليه وما ابي اخسر عيالي وقيمة ذهبي.
واعتذر على الاطاله
حبيبة^زوجها^الدلوع @hbybzoghaaldloaa
عضوة جديدة
يلزم عليك تسجيل الدخول أولًا لكتابة تعليق.
حبيبة^زوجها^الدلوع
•
ما فيه ولا نص نصيحه :06:
أم يحيى
•
الله يعينك أختي ويفرج همك
هذا موقع المستشار وعندهم الهاتف الإستشاري تلقينه في أعلى الصفحة :
http://www.almostshar.com/web/
.
هذا موقع المستشار وعندهم الهاتف الإستشاري تلقينه في أعلى الصفحة :
http://www.almostshar.com/web/
.
الصفحة الأخيرة