اسالكم بالله عطوني رايكم المستشفي يقلون نزلي الجنين جعل ربي مايحطكم مكاني

السلام عليكم ورحمة الله وبركاته 


بنات بخبركم باخر اخباري محتاره حيل حيل حيل يارب اختر لي وله الخيره الحسنه 

انا سبق ونزلت لكم موضوعي نزلت علي مويات الجنين في الاسبوع 18 وصلت للمستشفي وسوا لي كذا اشاعه واكدوا لي ان المويات حول الجنين صفر لاكن الجنين كويس وفيه نبض وجلست عندهم تحت المضادات والملاحظه وقالوا اذا وصلتي للاسبوع 23 والجنين لسه عايش بنولدك 
جت لي دكتوره الصباح قالت امورك كلها ماشيه بس بقولك ماعندي اي امل انه يعيش ومابي اكذب عليك بيكون وزنه اقل من 5 جرام وفرصه عيشه نادره جدا قليل الي يعيشون بهذا العمر فخليني اسوي لك طلق صناعي ونزله قالت راح تتعبين علي الفاضي ماعندي اي امل انه يعيش خصوصا موياته لحد الان صفر 
والله من قالت لي ونا ماسكت بس ابكي صليت ودعيت ربي يختار لي وله الخيره الحسنه بواسع رحمته انا مستمره علي موية زمزم وسورة البقره بس تعرفون الي خلت بقلبي غصه فقدتني الامل مره قالت خذيها مني ماراح يعيش ابد وزنه حيل ضعيف وزن كيلوا ونقول احتمال يعيش فما بالك باقل من نص كيلوا 

انا من حملت ومعي نزيف اهملت بيتي وعيالي ومن بيتي لبيت اهلي ماتهنيت لا انا ولا زوجي وسويت عمليتن وحده ربط وحده وقفوا فيه نزيف ثم تنومت ثلاث ارباع وقت حملي عندهم نفسية اولادي دمار من كثر دخلاتي للمستشفي يعني ربي اعلم وش كثر عانيت لجل هالحمل لان مجربه طعم فقد الضنى بنتي تخيلوا سويت اشاعه وقالت بنت ومن الفرحه رحت لبسمة الولو وسويت اشاعه ثانيه وخذت صور وسي دي لها وكنت في اخر السادس واخذت لها اجمل ملابس التقديم واجمل المفارش وجتني ولاده مبكره وبدل ما اشوفها في فستان التقديم قدموها لي في كفن الله لايذوقكم مراره فقد الضنى اللهم لك الحمد كما ينبغي لجلال وجه وعظيم سلطانه ثم حملت ثاني مره ورجعت عند كذا مستشفي من خوف تكرار الي صار وقلت اول ماتعدى السادس باخذ الاغراض مابي اعشم نفسي ويتوفي وفعلا دخلت السابع ومن الفرحه وربي يومي كلها سجود شكر اللهم لك الحمد عديت مرحله الخطر لاكن قدر ربي اكبر من كل شي جتني ولاده ورحت ونا مرتاحه نفسيا السابع الحمد لله بيعيش وفعلا دخلت غرفة العمليات وريحني كلام الدكتور قال اسبوعين بنخليه في العنايه ثم خذيه وولدت قيصريه خوفا عليه من الطلق يخنقه ولاكن تفاجات بعد انه توفي جت تخبرني وربي مانزلت ولا دمعه خلاص ننصدمه وش الي صاير فيني يارب رحمتك مافيهم الا العافيه تعبت نفسيا صرت اتجنب كلام الناس من اشيل طفل يقلون الله يرزقك من غير تلاطيخ الكلام الي توصل لي وش اتتي مسويه وربي يعاقبك عليه حسبي الله وكفي مادروا ان هذا ابتلاء من واحد احد هو ادري بي وارحم بحالي من امي فالخيره فيما اختار ولدي طبعا بعد ماتوفي رفضوا المستشفى دفنه بناخذ عيناة نشوف وش سبب وفات اجنتك وجاء ذاك اليوم الي اتصل علي زوجي وقال للولد معي في السياره بروح اغسله ونصلي عليه مانسي ذاك اليوم خريت علي ركبي وقلت له طالبتك طلبه تجيبه اودعه قبل وفعلا جابه ضميته وشميته ودعيت الله يجمعني به وباخته في جنات نعيمه كنت اشوفه وربي ماكنه متوفي حتي اني احط راسي عبي صدره ابي اتاكد هو صحيح مافيه نبض لان شكله هيىه مو متوفي وكنه ملفوف في مفرش راح زوجي ومعه قلبي وضحكتي وسعادتي الا اني ادرر ان لله وان اليه راجعون اللهم عوضني خير مما فقدت اللهم الهمني الصبر والسلوان 

علشان كذا الدكتوره اليوم تتكلم ونا خنقتني العبره وتذكر كل هم وضيقه وظرف مر علي يوم وفاة اولادي يارب رحمتك التي وسعة كل شي يارب اللهم اجعلني مما صبر علي بلاءك اللهم لاتشمت اعداءي بداءي حطمتني قالت مافي اي امل يعيش قالت تبن تنتظرين انتظري بس ماراح تستفيدين من جلستك شي في المستشفي لان ماتقدر نوصلك الا للاسبوع 23 يعني اول الشهر السادس 

سامحوني طولت عليكم بس نفسيتي منهاره حيل  كل ماتحرك جنيني حطيت يدي عبيه وبكيت اكثر ربي لاتحرمني منه والله اني راضيه بقضاء الله وقدره شوروا علي وش رايكم اسلم امري لله ثم لهم  يوم الاحد او اتمسك في جنيني واصبر تكفون قولوا لي مالي غيركم اهلكت نفسي بالبكاء 


يارب اختر لي وله الخيره الحسنه فانت تعلم ولا اعلم وانت عالم الغيب