اسال الله ان يفرج هم من تدخل موضوعي وترد

السلام عليكم ورحمه الله وبركاته
حبيباتي بنات عالمي انا ماعرف بالمقدمات راح ادخلكم بالموضوع ع طول

قبل فتره نزلت موضوع عن بنت خالتي وراح اختصره للي مايعرفه
لما انخطبت لطليقي وتزوجته بنت خالتي وامها جننو امي على احنا كنا نبغاها وليه ماقلتولنا قبل الخطبه الرسميه عشان نخطبها ولدنا يبيها وعلى هالكلام انا انهيت هذا الاختلاف كله اني اتصلت ع خالتي وقلت لها (ولدك ماينعاب فيه شي لكن خطبه على خطبه ماتجوز وبعدين ابوي اعطى الرجال كلمته وولدك الله برزقه باللي احسن مني) خالتي اتوقعت انا انهم اقتنعو بكلامي لكن يابنات حقدو عليه وبعد ماتطلقت خالتي وبنتها صارو كل ماقابلوني انا وامي يدقون بالكلام (لو اخذتي ولدنا ماطلقك ) (وبنتك ربنا وراها رفضت ولدنا وعزت الغريب وطلقها) (واخر شي اخته تقولي ماتعرفين وحده تكون طيبه وشاطره بس ها مانبيها مثلك مطلقه )ومن هالكلام اللي يجيب المرض المشكله والله ماخطبوني الابعد مانخطبت ولاقبل مانخطب مافكرو فيني بالعكس كانو يقولون بنزوجه مدرسه ومن هالكلام
امي مسكينه تاكل بقلبها وماترد ابدا وانا اسكت لخاطرها لانها تزعل مني اذا رديت عليهم

الحين يابنات خطبو لولدهم والله اني فرحت له كانه واحد من اخواني ومااتمنى له الا كل خير
المشكله يابنات خالتي وبنتها جننونا يتصلون على امي يبونها تروح معاهم تختار الشبكه وهدايا للعروس
ولما قلت لامي مالنا صلاح هم يدبرون امورهم امي زعلت مني وتقولي انا مابيهم يقولون عليه مقهوره على ولدهم ولا امي يابنات كانت تتمناه لي ومن داخلها زعلانه ادري تقوم بالليل وتصلي اسمع صوتها تبكي وهي على سجادتها مو لانه بيتزوج لا لانهم يجرحونها كثير بطلاقي
اليوم خالتي جات زارتنا هي وبنتهاوقالت لأامي وحنا قاعدين ابيك تروحين معاي السوق عشان نختار اثاث لبيت العروس
رديت عليهم وقلت ليه انتم تاثثونه هي العروس بيتها وهي تختار اثاثها واذا هي متنازله وتبيكم انتم تاثثون انتم فيكم الخير والبركه ليش امي تروح معاكم خالتي بغت عيونها تخرج من راسها وقالت انتي مالك صلاح ولعلمك مانبيك تدخلين بيتها عشان لاتنحسين ولدي وعروسته ماله داعي تاخذين رقمها وتصاحبينها لاتخربينها علينا بافكارك ولاتروحين تزورينهم فبيتهم اخاف تقلبين المواجع لولدي؟
والله يابنات مابيني وبينه اي شي ياناس حتى صوته والله ماعرفه ويمكن لو شفته بالشارع من غير امي ماعرفه ؟والله تمنيت الارض تنشق وتبلعني حسيت اني مسويه جريمه انصحوني وخففو عني الله يسعدكم

واللي بتجرح او تتريق اتمنى ماتنسى (كما تدين تدان)