♥ الإسورة الرابعة ♥
الغرز المستخدمة :
1. غرزة السلسلة { س }
2. غرزة المنزلقة
3. غرزة الحشو
4. غرزة العمود وهي العمود بلفة ( كمان لازم تكوني عارفة ارتفاع غرزة العمود اللي هو 3 سلاسل )
5. هختصر كلمة غرزة بحرف ( غ ).
متطلباتها :
1. إبرة مقاس 1.5 ملم
2. خيطين تطريز ( الخيوط اللي بتبقى رفيعة ) لونين مختلفين . وبإمكانك طبعا استخدام مقاسات إبر وأنواع خيوط تانية بس يفضل إنك تستخدمي مقاسات صغيرة عشان يطلع شكل الإسورة حلو ( أنا عملت الشرح بخيط صوف عشان تبان الغرز ) .
3. زرار لو هتخلي الإسورة بتتقفل بزرار .



مميزاتها :
الإسورة شكلها جميل جدا في اللبس وممكن تدخلي فيها الألوان اللي تعجبك .
عيوبها :
بتاخد وقت كتير وهتبقى صعبة شوية لو مش عارفة طريقة تشبيك الوحدات .
فكرتها :
هتعملي وحدات على قد إيدك وتشبكيهم في بعض وتمشي عليهم بعد التشبيك بحشو .

الطريقة :
1) نعمل 5 س ونقفلهم بمنزلقة
2) نرتفع 3 س ( بدل أول عمود )
3) نعمل 2ع في نص الدايرة و2س وحاولي تشتغلي على الخيط الزايد عشان تخفيه .





4) هتعملي .. ( 3ع - 2س ) 3 مرات _ منزلقة في 3 س من التلت سلاسل اللي عملناهم في بداية السطر بعدين منزلقة في كل عمود من العمودين اللي جنب ال 3 س عشان توصلي للفراغ اللي بعده ومنزلقة كمان في الفراغ ( باختصار الخطوة دي بنمشي للفراغ بمنزلقة على الغرز اللي نلاقيها لحد ما نوصل للفراغ عشان نقدر نخفي الخيط بسهولة لما نيجي نشتغل السطر الجديد ) * كدا السطر الأول خلص *

هنا عملنا المنزلقة


هنا مشينا لفراغ السلسلتين


5) السطر التاني : بالخيط التاني منزلقة في واحد من فراغات السلسلتين وياريت ميكونش اللي فيه الخيط الزايد بتاع السطر اللي فات .. نرتفع 3س بدل أول عمود - هنعمل ( 2ع - 2س - 3ع) في نفس المكان اللي هو فراغ السلاسل ونحاول نخفي خيط بداية السطر دا ونهاية السطر اللي فات واحنا بنشتغل ( يعني نشتغل عليهم ) و بعدين اعملي سلسلة

المنزلقة اللي في الفراغ اللي مفيهوش خيط السطر اللي فات


بعد ما عملنا اللي ما بين الأقواس


6) دلوقتي هنعمل ( 3ع - 2س - 3ع - 1س ) في فراغ ال 2س اللي بعده * 3 مرات ( وكل مرة طبعا هنعمل العواميد في فراغ تاني )
7) منزلقة في تالت سلسلة من السلاسل اللي عملناهم في بداية السطر

بعد ما عملنا اللي ما بين الأقواس بس لسة فبل السلسلة اللي قبل المنزلقة


8) هنمشي للفراغ اللي بعده بمنزلقة على الغرز اللي نلاقيها ومنزلقة كمان في الفراغ و 1س ونقطع الخيط * كدا خلصنا السطر التاني *

بعد ما مشينا للفراغ


9) السطر التالت : منزلقة في واحد من فراغات السلسلتين ( يعني أي زاوية أو طرف ) وياريت متكونش اللي فيها الخيط الزايد بتاع السطر اللي فات .. نرتفع 3س بدل أول عمود - هنعمل ( 2ع - 2س - 3ع) في نفس المكان اللي هو فراغ السلاسل ونحاول نخفي خيط بداية السطر دا ونهاية السطر اللي فات واحنا بنشتغل ( يعني نشتغل عليهم )

المنزلقة اللي في الزاوية اللي مفيهاش خيط السطر اللي فات


بعد ما عملنا اللي ما بين الأقواس


10) 1س-3ع-1س في فراغ السلسلة ( الفراغ اللي في نص العواميد اللي في السطر السابق )



11) هنعمل ( 3ع - 2س - 3ع ) في الزاوية و1س-3ع-1س في فراغ السلسلة ونكرر الخطوة دي مرتين كمان
ومنزلقة في تالت س من السلاسل اللي عملناهم في البداية ونمشي للزاوية بمنزلقة على الغرز اللي قدامنا و1س ونقطع الخيط
ونخفي الخيوط الزايدة



هنا أنا خافية كل الخيوط لأني كنت بشتغل عليهم بس هقص الزوايد ما عدا الأخير بتاع آخر سطر هخفيه بإبرة عادية


كدا خلصنا وحدة كاملة ( يعني مربع ) هنعمل كمان على قد ما يلف على إيدك أنا عملت 3 بس لحظة هنشبك واحنا بنشتغل

12) في السطر الأخير من الوِحدة التانية في الجهة المقابلة لبداية السطر لما توصلي للزاوية متعمليش سلسلتين لا اعملي حشو
يمسك في الوحدتين والعواميد زي ما هي يعني بس تبدلي السلاسل بحشو .. أترككم مع الصور






~ يتبع ~
( بقية الإسورة

♥ تكملة الإسورة الرابعة ♥





هنا بعد التشبيك


وممكن طريقة تانية للتشبيك هتجيبي الوحدتين بعد ما تخفي الخيوط الزايدة
وهتحطيهم كدا بحيث لما نشتغل وبعد ما نخلص التشبيك ونفرد الإسورة نلاقي الوحدات معدولة منلاقيش واحد مقلوبة


هتمسكي الوحدتين وتعقدي الخيط ومنزلقة في الزاوية ولاحظي إنك هتعملي المنزلقة في الوحدتين - 1س ارتفاع وتعملي 2حشو
في الزاوية وتمشي بـ 1حشو على كل غ لغاية آخر السطر وفي الزاوية اللي في آخر السطر هتعملي 2 حشو



طريقة تدخيل الإبرة في الوحدتين مع بعض عند التشبيك واعملي في كل غ 1حشو ( هتشتغلي في الوحدتين كأنهم وحدة واحدة )


ودا الشكل بعد ما وصلت الطرف ( الزاوية ) التاني في التشبيك بالطريقة التانية


13) اعملي س ومنزلقة في نفس الزاوية الأخيرة اللي عملتِ فيها 2حشو و1س للتثبيت واقطعي الخيط واخفيه .. أنا هنا شبكت بس وحدتين كنموذج إنت اعملي وحدات على قد إيدك وشبكي وإنت بتشتغلي


14) بعد ما شبكنا كل الوحدات ( هنا أنا عملت 2 بس للشرح ) هنعمل منزلقة في أي مكان وليكن اللي في الصورة


15) هنعمل 1س وحشو في نفس مكان المنزلقة ونمشي بحشو على كل غرزة لغاية ما نوصل لمكان تشبيك الوحدات هنعمل 2 حشو
في الناحية اليمين من التشبيك و 2حشو في الناحية الشمال من التشبيك

هنا السلسلة


الـ 2 حشو في الناحية اليمين ( مصورتش عند الشِمال )


16) هنمشي عادي 1حشو على كل غ لغاية لما نوصل لطرف الإسورة ( الزاوية ) هنعمل فيه 4حشو

هنا قبل ما اعمل الـ 4 حشو


17) بعد ما عملنا الزاوية هنمشي لغاية نص الجهة دي من الإسورة عشان نعمل خيط نربط فيه الإسورة أو نعمل مكان للزرار

هنا في المكان اللي هنعمل فيه الخيط اللي هنربط بيه الإسورة أو هنعمل مكان للزرار - عملت فيه 1حشو


18) عندك هنا طريقتين : إما تعمليي خيط تربطي بيه .. أو تعملي دايرة عشان يمسك فيها زرار
أ. ( لو هتعملي خيط ) اعملي سلاسل زي ما إنت عايزة 30 - 40 أي عدد ودي اللي هتربطي بيها عايزاها طويلة عايزاها قصيرة براحتك
وبعد ما تعملي السلاسل اعملي منزلقة في تاني س من الإبرة وارجعي على السلاسل كلها بغرز منزلقة وحشو في نفس الـ غ اللي
عملت فيها الحشو اللي قبل السلاسل ( باختصار حشو - سلاسل بالعدد اللي يعجبك وارجعي عليها بمنزلقة - حشو ) في نفس المكان

عملت هنا 5س للتوضيح


بعد ما رجعت عليهم بمنزلقة وعملت الحشو التانية


ب. ( لو هتعملي مكان لزرار ) اعملي ( حشو - سلاسل على قد الزرار 5س أو 4 أو اللي على قد زرارك - حشو ) في نفس المكان


19) كملي عادي على كل غ حشو وفي الزواية اعملي 4حشو والفراغ اللي قبل تشبيك الغرز وبعده اعملي 2حشو ولما تلفي على
الإسورة كلها اعملي منزلقة في أول حشو عملتيها و 1س للتثبيت واقطعي الخيط واخفيه .. * وبكدا تكون الإسورة خلصت *

هنا بعد ما لفيت على الإسورة كلها .. قبل المنزلقة بطريقة التشبيك التانية


الشكل النهائي للإسورة من قدام .. بس نسيت أحط الزرار


الشكل النهائي للإسورة من ورا ..


~ يتبع ~

♥ الإسورة الخامسة ♥
الغرز المستخدمة :
1. سلسلة { س }
2. منزلقة
3. عمود { ع }
4. وهختصر كلمة غرزة ب { غ } , و { ص } اللي في المعادلة اللي في بداية الإسورة ما هي إلا متغير رياضي .
متطلباتها :
1. إبرة مقاس 3 ملم
2.خيط موهير وخدي بالك إنك لو عملتِ الإسورة بالخيط دا هيبقى صعب جدا تفكي منها لو غلطتِ ، فإنت شوفي الخيط اللي يريحك واشتغلي بيه .
3. لازم تبقي متمكنة من أساسيات الكروشيه وعارفة غرزة قشور السمك ( التمساح ) ولا هيبقى صعب عليك تعملي الإسورة .



مميزاتها :
شكلها تحفة في اللبس وفيها أناقة وبتبقى حلوة بكل أنواع الخيوط .
عيوبها :
لو مش عارفة الغرزة المستخدمة هيبقى صعب عليك تعملي الإسورة بس إن شاء الله لو إنت عارفة أساسيات الكروشيه والارتفاعات وما إلى ذلك واتبعتِ الخطوات كويس هتعرفي تعملي الإسورة
فكرتها :
هتعملي سطر أساس وبعدين تبني عليه وهتعملي عدد السطور اللي إنت عايزاها ، أنا عملت 3 سطور .

الطريقة :
1) اعملي سلسلة على قد إيدك تحقق المعادلة 3ص+1 بحيث ص يكون عدد زوجي وتزودي 3س ارتفاع
يعني المعادلة الشاملة يعني 3ص+4 ( أنا عوضت عن ص ب 6 هتبقى المعادلة 3(6)+4=22سلسلة )


2) 1ع في رابع س من الإبرة



3) هنعمل 2س وهنسيب سلسلتين من تحت ونعمل في الثالثة عمودين يعني نشتغل ( 2س - 2ع ) بعد كل سلسلتين من تحت ولغاية الأخير وبكدا نكون خلصنا سطر الأساس وهنسمي العمودين اللي جنب بعض غرزة ( V ) .



بعد ما خلصت سطر الأساس


4) هنلف ومنزلقة في الفراغ بين العمودين .

هنا لفيت


هنا عملت المنزلقة


5) هنعمل 3س (بدل ع) ونعمل 4ع على الـ ع الأول في سطر الأساس ( العمود الأول في V .

الـ 3س


جهة تدخيل الإبرة


بعد ما عملت الخمس عواميد


6) هنعمل 5س على الـ ع التاني في غ الـ V وندخل من الشمال لليمين .

طريقة التدخيل في العمود التاني من الـ V


بعد ما كملت الخمس عواميد .. يعني كدا عملنا 10ع على الـ V خمسة على الـ ع الأول وخمسة على التاني


7) نعمل منزلقة في الفراغ بين العمودين الجايين في سطر الأساس ( في نص الـ V اللي الجاية )


8) هنمشي بالنمط دا ( 5ع في أول ع في غرزة الـ V وهنعمل 5ع في الـ ع التاني من الـ V ) ومنزلقة في نص الـ V اللي بعدها يعني الفراغ اللي بين العمودين . وبعدين في الـ V اللي بعدها اعملي اللي ما بين الأقواس وكملي كدا لغاية آخر V

وأنا بكمل باقي السطر


العمود الأول من آخر V عملنا عليه 5ع وهنعمل 5 كمان على التاني


هنا كملنا الخمس عواميد ولفينا


9) نعمل 3س ( بدل ع ) و ع في المكان اللي طالعة منه السلاسل ( هو مش مكان محدد إنت قدريه بالنظر )
وبعدين اعملي ( 2س - 2ع ) مرة فوق الـ V اللي اشتغلنا عليها عواميد ومرة فوق الـ V اللي عملنا فيها منزلقة السطر اللي فات

V فوق الـ V اللي عملنا عليها عواميد


V فوق الـ V اللي عملنا عليها منزلقة قبل كدا



10) لما نوصل لآخر سطر الأساس هنعمل 2س وآخر V هنعملها في طرف التلت سلاسل اللي تحت

العمودين ( V ) في الطرف



~ يتبع ~
( تكملة الإسورة )

تكملة الإسورة الخامسة ♥

11) هنلف ونعمل 3س ومنزلقة في نص الـ V من تحت يعني ندخل الإبرة من تحت زي الصورة ( الخطوة دي الهدف منها ننزل لقاع الـ V )

طريقة تدخيل الإبرة


المنظر بعد ما عملنا التلت سلاسل ( الدايرة اللي موسعاها هي المكان اللي الأبرة بتتحط فيه )


12) هنعمل 3س (بدل ع)


13) اشتغلي 4ع في العمود التاني من الـ V ومنزلقة في نص الـ V اللي بعدها



14) كملي عادي سطر البناء .. V تعملي عليها 10ع ( 5ع في العمود الأول و5 في العمود التاني ) وفي نص الـ V اللي بعدها منزلقة وكدا
ولما توصلي لآخر V انتقلي للخطوة الجاية ..



15) في آخر V هتعملي نصها الأول بس .. اعملي 4ع و3س ومنزلقة في نفس المكان اللي عملتِ فيه العواميد
وشوفي مش الـ V اللي شغالين عليه العمود اللي في الشِمال عبارة عن 3س ؟ هنمشي على كل س منهم بمنزلقة
( والهدف نطلع لقمة الـ V )

قبل آخر V


بعد التلت سلاسل


منظر الإسورة عند انتهاء السطر التاني وتقدري تقفلي الإسورة على كدا وتقدري تكملي سطر تالت


16) سطر الأساس للسطر التالت : هيكون فيه اختلاف بسيط بدل ما هنعمل 3س(ارتفاع) بس بدل ما كنا بنعمل 3س-ع في
بداية السطر وال3س ارتفاع مش هنشتغل عليها في سطر البناء وهتكون بس كدعامة للغرز اللي جنبها - وكملي عادي ( 2س - 2ع ) مرة فوق الـ V اللي اشتغلنا عليها عواميد ومرة فوق الـ V اللي عملنا فيها منزلقة السطر اللي فات

منظر الـ3س(ارتفاع)+2س و V فوق الـ V اللي تحتها




17) فوق آخر V في السطر اللي تحت هنعمل ع واحد كدعامة زي ما عملنا في بداية السطر 3س( كعمود واحد بس )



18) سطر البناء للسطر التالت : هنلف ونشتغل عادي نعمل في أول V كاملة 5ع على الـ ع الأول و5ع على التاني ومنزلقة في الـ V اللي
بعدها وكدا للأخير وآخر منزلقة هنعملها في تالت س من السلاسل اللي عملناهم في أول سطر الأساس .





مكان آخر منزلقة


19) اعملي 1س للتثبيت واقطعي الخيط واخفيه وكدا يفضل بس إيدين الإسورة



20) اعقدي الخيط ومنزلقة في نص جهة الإسورة زي الصورة واعملي عدد السلاسل اللي إنت عايزاها واقطعي الخيط وكرري
الخطوة دي في الناحية التانية من الإسورة واخفي الخيوط الزايدة * وبكدا تكوني خلصتِ الإسورة *





~ الشكل النهائي ~




أتمنى أكون افدتكم بشيء بسيط وسامحوني لو كان الشرح في نوع من الصعوبة بس والله حاولت جاهدة إنه يكون مفهوم ومفصل
عشان يكون واضح وتسعدني تعليقاتكم وردودكم وأتمنى منكم دعوة من القلب إن ربنا يوفقني في امتحاناتي ..

~ في أمان الله ~

شكرررا لك أساور حلوين يسلمووو