اسباب خطأ السونار .. اخطا معاكي تعالي وحكينا ..

بسم الله الرحمن الرحيم


عزيزاتي قرأت كذا موضوع عن خطأ السونار .. وكيف انهم مره يقولو ولد ومره يقولو بنت .. انا اختي دكتوره ورحت لها مره وكان المركز الصحي على اخر دوام وفاضي .. وكانت زميلتها طبيبه نساء وكما تعلمون المراكز الحكوميه الصحيه صار فيها عيادات للحوامل وجهاز جديد سونار .. المهم قلت لها تعالي قوليلي ليش يخطأ السونار وكانت عندها مريضه وافقت انو نتفرج ونجرب عليها الله يسهل حملها وولادتها .. شوفو ايش قالت وبعد كدا احكموا على الدكاتره و رأيهم لما تروحو ..


المهم قالتلي اول شي حجم الشاشه وجودتها لها دور كبير .. ثاني شي مقدار مايجلسه الطبيب وهو يكشف على بطنك .. وكشفت عالحرمة وورتني قالت شوفي معاها ولد .. وحركت من جهه تانيه وسبحان الله مع الاضاءة والحركة اختفى العضو كأنها بنت .. فرجعت من زاويه تانيه تتاكد انه ولد وفعلاً من كذا زاويه طلع ولد و مع الحركة كل مايقفل رجوله بقوه يختفي العضو ويطلع على فوق فالصوره من تحت توضح انها بنت ..


الشاهد من هذا الكلام انو الطبيب اوقات عنده زحمه و شايف سونارات الين طفش .. فيشوف مره يكون فيها الطفل نايم ممكن ومقفل فيظهر له بنت .. وبنفس الوقت احيان الحبل السري يهيء لهم انه ولد .. وهو بالاصل بنت لان الحبل بين الرجول سبحان الله .. و نقطه ثانيه ترا لاتنسو ان الطب عندنا الحمدلله والشكر .. انا اذكر اني رحت لطبيبه في الشهر الثالث وقالتلي بنت بينما رحت لاخرى وسالتها جلست تضحك .. وقالت حتى لو اجهضتي في هذي الفتره مرره صعب تشوفي العضو فمابالك السونار والي زبط معاهم من هالوقت صدفه ..


شغله ثانيه .. انا زوجه اخوي بكندا وعندهم متابعه الحمل ٣ سونارات فقط تسويها طول فتره الحمل لانهم حذرين ب التعامل مع السونار .. راحت لاخصائي في عياده خاصه بالاسبوع ال ١٥ من الحمل وقالت ابعرف نوع الجنين رفض يعمل لها الكشفيه لان مايعلنو عن الجنس الا بعد الاسبوع العشرين !
لان في تشابه جدا كبير بين الاعضاء ومايفرق الا شخص متمرس جدا جدا وبرضه قد يخطيء ..
بالآخر احنا كمسلمين دايماً نؤمن ان بالاول والاخر العلم عند الله .. لكن احببت ان قبل تروحي تشتري الاغراض وتتورطي .. تتاكدي من كل النقاط الي ذكرتها وان قال لك جنس معين قوليله وريني العضو .. والله ان بعضهم اصلا يصرفونك ويبغو يمشو الناس وخلاص خاصة العيادات الخاصه الغير مشهوره ..
وكل شي بالأول والاخير بامر الله ..
وسلامتكم