استأذن الاخت نور الليل والاخت المنتظره في النقل

بسم الله نبدا

س/كيف كان تعلقك بزوجك قبل زواجه؟

بسم الله الرحمن الرحيم وبه نستعين ونصلي ونسلم على سيدنا محمد وعلى اله وصحبه اجمعين

اختي نور الليل اشكرك من كل قلبي على هذي الاستضافة التي كان هدفها الاول والاخير نقل تجربتي التي تمر بها كثير من المتزوجات هنا بالمنتدى
وذلك للفايدة ويشهد رب العالمين اني ماوافقت على ذلك الا من اجل راحة الزوجة الاولى وحتى تبتعد عن كل خطا وقعت انا فيه وتحاول تبني حياتها بعد زواج زوجها على السعادة وراحت البال.

ج/ كنت متعلقة به جدا وكنت اعتبره ابوي واخوي وزوجي وصديقي وكل حياتي وكنت احس اني مااقدر اعيش بدونه.


س/ وهل كنتي تتوقعين زواجه بامراءة غيرك؟
ج/ لا وكان هذا من سا بع المستحيلات مع ان ضروف زوجي كانت تفرض علي اني اتوقع زواجه باي لحظة لكني مجرد ماافكر اني اشوف زوجي مع وحدة غيري اتمنى الموت . وانا اشوف في المنتدى كثير بنات يقولون لو تزوج زوجي اموت فانا كنت مثلهم اتوقع موتي قبل لا اشوفه عريس.

س/ ماذا حصل بعد ذلك؟
ج/ حصل الي مااقدر اقول الا سمع وطاعة له وهو امر الله عزوجل بزواج زوجي...نعم تزوج زوجي.

س/ ماهو شعورك عندما اخبرك بعزمه على الزواج؟
ج/ صراحة يابنات انا اتكلم من خلال تجربتي حسيت بدوران الارض تحت اقدامي وحسيت بدوخة وحسيت اني بعالم ثاني مااعرف اوصفه لكن تماسكت
وزوجي حس بي لكن بدا يهديني ويقسم لي انه ماراح يتغير وعطاني كلام اقنعني فيه قال ابي عيال هل تحرميني
انتي تقدرين تساعديني بموافقتك وقال انا مابي الا طيبة خاطرك والا كان تزوجت من زمان واذا رفضتي خلاص ماراح اتزوج
ووعدني بوعود كثيرة وقال لي كلمة للحين ماثرة فيني لو رفضتي زواجي فانا ماراح اتزوج لكن ماراح انسا انك حرمتيني من خوض تجربة فيها امل لي بالانجاب في هذي الساعة قلت له الله يرزقك روح تزوج.

س/اخت منتظرة ليلة عقد قرانه ماهو موقفك؟
ج/ كنت متماسكة حتى اذن العصر وشفت زوجي يلبس ملابسه جبت الطيب والبخور
وطيبته وقلت .اللهم اجرني في مصيبتي واخلف لي خيرا منها.
وطحت على الكرسي ابكي....زوجي خرج من عندي متنكد ماعلق ولا بكلمة
قضيت هذيك العصرية بالنوم نمت مدري وش حصل علي بس نمت. جاني بعد المغرب وصحاني وطيب خاطري وانا قلت له مبروك و طلعنا نتعشا برا
وانا ماتكلمت والا كلمة ضاع الكلام رجعنا بالليل ونمنا وحلمت بكوابيس ( الزوجة الثانية )
جلست على هذا الحال يومين او ثلاثة ثم رجعت طبيعي
استمرت فترة خطوبته شهرين في خلال هذي الشهرين تعلقت به اكثر واكثر يمكن حب التملك وخوفي انه يضيع مني.

س/موعد زفافه ماهو شعورك في هذة الليله؟
ج/وجاااااااااااا موعد الزفاف كانت ليلة الزفاف عندي اهون من ليلة عقد القران
يمكن لان جاراتي وقريباتي التفوا حولي وما اتركوني لوحدي.

س / اخت منتظرة هل جلستي في بيتك ليلة الزواج؟
ج/ لا رحت عند قريبتي وجلست عندها اسبوع.

س/ ماهو موقفك من ضرتك بعد الاسبوع ؟
ج/ كان عندي حب استطلاع اني اشوفها كان ودي اشوفها واشوف تعاملها مع زوجي.

س/ طيب زوجك وش موقفه منك بعد زواجه؟
ج/ حسيت زوجي ماتغير بالعكس زاد غلاي عنده اكثر واكثر.

س/ متى بديتي تغارين؟
ج/بالبداية كان الموضوع طبيعي وهذا بفضل ثم فضل صديقات لي وقفوا معي
بعد كذا بدت نار الغيرة تحرق قلبي حين اشوف زوجي يروح لها او يشتري لها او يسافر معها
وهذي نصيحة لكل زوجة اولى راح تشوفين التغير من زوجك في البداية ولهفته على الجديدة اكثر لكن هي فترة وتعدي.

س/ كيف تغيرت حياتك بعد كذا؟
ج/تغيرت حياتي بعد ما عمتني الغيرة وصرت متهورة مااعرف الصح من الخطا كل ماجا زوجي عندي بديت اعاتبة
وهذي نصيحة ثانيه للزوجات اتركي العتب العتب ما يريحك الا بالعكس يشحن قلب زوجك عليك كره.

س/ هل استفدتي من نصايح صديقاتك لك؟
ج/ انا كنت اسمع نصايهم من اذن واطلعها من االاذن الثانيه
وصلت بي الغيره اني اراقب زوجي بكل صغيرة وكبيرة وهذا الي اتعبني زيادة.

س/ وزوجك كيف كانت ردة فعله؟
ج/زوجي تحملني شي كثير وصبر علي ويشهد علي اني كنت مجننته مااخليه يرتاح عندي من كثر العتب واللوم حتى بدا الرجال يكره ليلتي ويرتاح عندها.

س/ وضرتك ماهو شعورها؟
ج/ضرتي تمسكنت حتى تمكنت كانت تريحه اكثر مني ومهما شافت منه انه مفضلني عليها ماكانت تعلق بكلمة وهذا الي خلا زوجي يقف بصفها.


س/ تجي مرحله الطلاق كيف قدر زوجك يطلقك؟
ج/ عندنا مثل يقول كثر الدق يفك اللحام من كثر مااطالب زوجي بالطلاق جا اليوم الي قدر يقول لي فيه طالق مع العلم انه حاول اصلاحي اكثر من عشرات المرات .وكان دايم يقول انا مقدر الظروف الي تمرين فيها عشان كذا متحملك.

س/ وش حصل بعد الطلاق؟
ج/ رجعت افكر بعقل اكثر من قلب وعواطف وما كنت انا لوحدي كان معي اخوات وقفوا بجنبي وساعدوني اني اقدر اتغلب على محنتي بالصبر والرجوع لله

س/ هل حسيتي عندما ذكر زوجك كلمة طلاقك مثل الي حسيتي به عندما اخبرك بزواجه؟
ج/ الصراحة لا كن موضوع زواجه اشد على نفسي من طلاقي.

س/ ماذا حصل بعد ذلك؟
ج/ بقيت اسبوع افكر في حياتي وش سويت انا حسيت ان الوقت الي كان في فترة مابعد زواج زوجي الى اللحظة الي زوجي فيها طلقني اني في عالم اخركل هذي الفترة ماكنت بكامل وعيي كانت الغيرة مسيطرة علي جعلت زوجي كل همي في الحياه
نسيت ربي ونسيت نفسي ونسيت مستقبلي ونسيت صحتي
ومثل ماقلت لكم كان همي زوجي وزوجي تغير تغير بالمرة ماهو زوجي الي اعرفه شخص ثاني.... بديت افكر صح.

س/ كيف رجعتي لبيتك منتظرة ثانية؟
ج/موقف الطلاق هزني هزة قوية وخلاني استعيد شي من عقلي.

س/ ماهي مواصفات منتظرة الجديدة؟
ج/ رجعت لبيتي الشكل شكل منتظرة لكن الشخصية وحده ثانيه اول شي علاقتي بربي زادت والحمد لله صار همي رضا ربي...
ثاني شي نفسي قبل اي احد ثاني وراحتها وصحتها ....ثالث شي بعدت عن مراقبة زوجي وزوجته ......رابع شي عطيت زوجي حقوقه الواجبة علي بحد الاعتدال
اذا حصل منه تقصير في حقي او شفته فضلها علي وكلت امري لله وما عاتبته ولا كلمته ابدا حتى هو شاف التغير مني وهذا لي يبيه كل رجال يبي راحة باله.

س/اخت منتظرة ماهي نصيحتك لكل زوجة تزوج عليها زوجها؟
اختي نور الليل انتي تعرفين اني كل يوم استقبل رسايل من زوجات مرو بتجربتي ويطلبون النصيحة .
فنصيحتي لهن اتباع مايلي وهو زبدة هذا الموضوع كله:
1_اخذ العظة والعبرة من قصتي وقصة كل زوجه اوشكت على فقد زوجها منها.

2 _قوي علاقتك بالله سبحانه واتعالى يابنات والله اني وجدت الراحة في قربي من ربي وذلك بكثرة التسبيح والاستغفار وقيام الليل وقراءة القران ((الا بذكر تطمئن القلوب ))حتى لو حسيتي من زوجك جفا او صد من نفس اللحظة قومي وصلي واستغفري وراح تشوفين فرج الله تعالى عليك.

3 _الصبر ثم الصبر ثم الصبر وانا ادري ان هذا صعب لكن حاولي تصبرين نفسك اشغليها باي شي تذكري قوله تعالى(( يوم يوفى الصابرون اجرهم بغير حساب))
ادري ان كلمة الصبر بسيطه لكن تنفيذها صعب لكن تذكري الاجر والثواب الي اعده الله لك واتذكري الجنه وانك في منزله المجاهدة في سبيل الله.

4 - النية الحسنه اجعلي نيتك طيبة حتى مع ضرتك مثل مايقول المثل ابو نية يغلب ابو نيتين وهذا مجرب شخصيا مني.

5 - العتاب وما ادراك ما العتاب لا تعاتبين زوجك على تصرفاته لان اي رجال مايبي احد يقول انه غلطان في تصرفاته.

6_ اهتمي بنفسك وبيتك في حدود المعقول خليك نظيفة انيقة بدون مبالغة واتركيك من الليالي الرومنسية الي ماتودي والا تجيب شي اذا الرجال مايهمه هذا الشي لانها مؤقته وبعد كذا ينسا كل الي سويتيه علشانه.
اما اذا زوجك يحب هذا الشي سويه له لكن لا تكثرين منها لان حلات الشي بقلته
واخيرا مااقول الا الله يعيني ويعينكم على البلا الي نمر فيه وراح تستمر الحياه.

س/كلمة اخيرة اخت منتظرة؟
اشكرك اختي نور الليل واشكر كل اخت وقفت معي او حاولت تساعدني ودعت لي بظهر الغيب والشكر ثم الشكر لامي والدة اختي نور الليل واختي ام الهنوف واختي ام عبد الله الي كانوا معي خطوة بخطوة في حياتي والله يجزاكم خير


وجزاك الله خير اختي منتظره على موافقتك على هذة الاستضافه. وعلى رحابة صدرك.


(((اللهم سخرلها زوجها وارزقها الذرية الصالحة)))

اسأل الله العظيم رب العرش العظيم ان يفرج هم اختنا منتظره وهم كل مسلمه وان يرزقهن الذريه الصلحه ويسخر لهن ازوجهن اللهم امين

اسأل الله ان يثبتك ويصبرك ويعوضك خيرآ ويفرج همك ويسخر لك زوجك


وانت اختي وجود سلمت يداك ,الله لا يحرمنا من وجودك