استحلفكم بالله تدخلون وتنصحوني،،

السلام عليكم خواتي
بنات اقسم بجلال الله انها ضاقت علي الارض بما رحبت،،، كل يوم سالفه جديده وكل يوم همً جديد
زوجي كل يوم انا وياه من مشكله لمشكله،، اطنشه يومين ثلاث وارجع اراضيه رغم ان الحق يكون عليه هو
اراضيه عشان بس ارتاح ماابي مشاكل ومااحب اكون مهمشه بحياته
للأسف نفخته وكبرت راسه ع الفاضي
اللي يزيد قهري قهر انه يحرض عيالي علي،، قبل يومين عيالي تعبثو بجازي وعلق معي الجهاز ، حاسبتهم وقلت ياويل اللي يلمسه،، اول ماجلسنا نتغدا ولدي علم ابوه،،واهله طبعاً كلهم جالسين
تدرون وش رد عليه قال ولا يهمك اجيب لك جهاز بس لاتحط فيه اسم امك،، سو لها حظر بجميع برامج التواصل وارتاح،، انقهررررررت من كلامه لولدي ،، لان بالاصل زوجي مسوي معي كذا وحاظرني،، كل مازعل راح سوا حظر ،، ماني عارفه ليه،،
لكن قهرني انه يتكلم قدام اهله كذا وكأنه فخور بنفسه،، حسيته يقولها وهو مستهتر بوجودي
يعطي ولدي دروس باالعقوق،، رحت له المجلس بعد الغدا،، وكنت مره مقهوره،، قلت ليه تحرض ولدي علي،،انا اتعب على عيالي وانت تخربهم علي
قال شفيك نفسيه اليوم يتكلم بكل برود،، قلت انت بار بأمك وتبي عيالي عاقين فيني،، معناته برك تمثيل اجل
وطنشته مااتكلم معه،، قاهرني،، تراكمات علي عجزت اتحملها،، قاعده بغرفه وحده عند اهله،، واخلاقه معي زي الزفت،، لاطلعات ولا وناسه
لكن عند اهله كل ممنوع يصير مجاب ،،
لما جاء باالليل سحب فراشه كاالعاده ونزل باالمجلس،، اللي صار اليوم اطلبه ابي اروح لاهلي صار لي اسبوعين ماشفتهم،، يقولي انا ماني مسؤول عنك ابداً ابداً ،، اي شي تبينه اطلبي من اهلك انا مالي شغل فيك
طيب اجل وجودي بحياته ليه،، يعني بس عشان خدمته هو واهله،، فعلاً مو ماخذه من حقوقي الزوجيه شي،، بس اقوم واكرف وانام
والحين طالع بموال ماني مسؤول عنك بشي
طيب حلفتكم بالله العلي العظيم الطلاق هنا مو حلال بحالتي
زوج تبرأ كلياً من زوجته مايبي منها غير الخدمه وبس،،
انا اقدر اكلم ابوي واخواني،، لكن قلت ابشوف الى نهاية الاسبوع الجاي،، بعدها الم اغراضي واطلع من حياته الى الأبد
العمر واحد،، وانا راح عمري وانا ادلله ولا اثمر فيه وهاذي اخرتها،،،
عطوني رايكم يابنات،، استحلفكم بالله لاتبخلون علي باالنصيحه،،،