استرخص نفسي وكاني مو مع زوجي

السلام عليكم ورحمة الله وبركاته 
بذكر قصتي مع زوجي وبحاول اختصر عشان لما تعطوني حلول تكونون فاهمين وضعنا
انا مالي احد بهذي الدنيا غير امي وامي مالها احد غيري زوجتني وانا بثاني ثانوي لانها تبي رجال يسندنا ويحمينا هالرجال مو من منطقتنا ويعرف جارنا وهو دله علي وقال انه مطلق زوجته تزوجته وبعد الزواج اكتشفت انه كذاب مو مطلق زوجته بس كانوا متزاعلين وهو تزوجني عشان يربيها ماكان موضح نيته لنا تزوجته بدون حفله بدون شهر عسل بدون اي شي جاني لبيتنا واخذني انا وامي لبيت ثاني وبس مافرحت زي كل البنات ولا لبست فستان ابيض ولا انزفيت ولا اي شي كان يقولي تونا عرسان مابي عيال وبعدها فصلني من المدرسه بحجة انه يبي ياخذني معاه لمنطقتهم واسجل وادرس هناك معاملته لي كانت خاليه من الحب والعطف والحنان عمره ماسولف معاي ولا عمره مشاني ولا سفرني ولا حتى اخذني مطعم اوضح اكثر كان ماخذني للفراش وبس ماشوفه الا اخر الليل المهم بعد زواجنا تقريبا خمس شهور انا حملت بالغلط جابلي حبوب اجهاض وحاول فيني بالطيب اني اجهض ورفضت رفض قاطع لانه حرام ولان نفسي اصير ام هاوشني وطلع برا البيت رجع المغرب كنت ارتب الغرفه فجاه مسكني ويضرب بطني بركبه وظل يضرب لما شاف الدم امي كانت منهاره عند باب الغرفه تسمع ضرب وبكاي وماتدري باللي يصير داخل شاف الدم وطلع وخلاني يحسبني سقطت بس ربي كتب له عمره جلست بالمستشفى 3 ايام على المثبتات والابر والراحه التامه واعشاب امي والحمدلله ثبت بعد ما طلعت من المستشفى قالي زوجي انتي طالق وانا ماعاد ابيك وانا راجع لمنطقتي خلاص وكل هذا يحسبني مسقطه مايدري اني باقي انا ماقلت له خفت اذا عرف اني لسا حامل يضربني ثاني لما وصلت للشهر الرابع ارسلت له رساله اني مازلت حامل وقذفني وصار يتكلم بشرفي ويقول انقلعي دوري اب السفاح اللي ببطنك انا ولدي سقط وشفت الدم قدام عيوني وكلام كثير صورت السونار والاوراق اللي تثبت ان الجنين عمره 4 شهور يعني هو نفسه الجنين اللي قبل شهرين وظل منكر ويلعب باعصابي لما ولدت وتبهدلت بهدله ربي العالم فيها كنت طفله وام لطفل ومسؤوله عن امي واشتغلت بصالون نسائي عشان اصرف وصرت اطبخ وابيع ويوم نشبع وعشر ايام نجوع ولدي كان تعبان من قل تغذيتي وابوه ماشافه من انولد ولا يصرف عليه ولا اي شي وسنتين وهو راميني ويقولي انا مطلقك لا تكلميني ولا تطلبين مني شي ومن قبل شهر بس عرفت انه ما طلقني بالصدفه ولما سالته قال ايه صح انتي لسا زوجتي واذا ما تبيني روحي اخلعيني 
المهم انه عذبني وبهدلني ودمر مستقبلي الحين عمري 19 سنه ومامعاي غير شهادة اولى ثانوي كنت عايشه بفقر وحسره وحرمان وخوف امهد ولدي بجلال صلاه ومرات احفظه بقماش عشان مامعاي فلوس اكرف كرف الحمير عشان اصرف على امي وولدي وبنفس الوقت اسدد دين لابوي الله يرحمه بينما هو فلوسه ما تحرقها النار وعايش حياته وهو اللي دمرلي حياتي وحطمني وخلاني اكره كل الرجال واخاف منهم واكره الزواج واكره حتى نفسي كنت شاطره ومتفوقه بدراستي وطموحه وبكل بساطه جلسني بالبيت وراح وتركني 
الان هو جايني ويقول انه ندمان وانه ظلمني ويبي يرجعني ويبي يعوضني وياخذني معاه لمنطقته ويقول من هذي السنه تكملين دراستك ويقول اسوي لك زواج عندنا واسوي واعمل وانا الحين معاه وهو فعلا متغير وصاير طيب وحنون معاي بس انا مو قادره اتحمله ولا احبه يقرب مني جروح الدنيا بقلبي منه مو قادره اتحمل حضنه ولمساته مو قادره اعامله زين وهو كان يدوس ببطني وكان يقذفني بشرفي وكان راميني سنتين وهو عارف وضعي زين احس نفسي رخيصه عشان رجعت له اتقرف من نفسي واحس بالذنب اذا لمسني اتهرب منه قد ما اقدر وقلت له ان دورتي 14 يوم عشان يبعد عني اكبر فتره واجيب ولدي وانومه بحضني ومرات انام عند امي واقوله نمت وانا مو حاسه ما ادري اذا فهمتو علي او لا بس استحي اشرح اكثر من كذا
اللي ابيه منكم عادي اسوي حفلة زواج بعد ماصار عندي ولد ولا لا مع العلم ان جماعته كلهم مايعرفوني ولا عمرهم شافوني للان حتى امه وخواته ما يعرفوني انا نفسي البس ابيض وانزف ويصير لي حفله زي كل البنات وبنفس الوقت احس خلاص راحت علي كيف اسوي زواج و عندنا ولد عمره سنه ونص !!! وابي منكم تعلموني كيف اتعامل مع زوجي بعد كل هذا وابيكم تدعون لي واعتذر طولت عليكم