استشارة في موضوع العلاج

السلام عليكم ورحمة الله وبركاته.. وأسعدكم الله جميعا وحقق لكم أمانيكم في القريب العاجل يارب
أخواتي.. أبغى أستشيركم والله يجزي كل من تعينني وتشير علي خير.. وأتمنى أن تشيروا عليه باللي تشوفوه صواب حتى لو كان عكس اللي أتمنى..
راح أعطيكم مختصر حكايتي.. صار لي متزوجة من 7 سنوات ونص، عمري 34 وزوجي 39 وشوية.. وعنده بعض المشاكل النفسية والأسرية ومريض بالسكري.. وخلال سنوات الزواج لم يحصل حمل أبدا وبدأت مراجعات بعد السنة الأولى.. بعضها بعلم زوجي وبعضها بدون علمه.. وهو لأسباب يصعب ذكرها غير راغب في موضوع الإنجاب وغير ساعي في الموضوع أبدا.. مع العلم انه ما هو متزوج من أخرى ولا عنده أولاد.. لدرجة انه ما عمل تحليل الخصوبة الا من كم شهر يعني بعد مرور 7 سنوات على زواجنا ومش عشان صار راغب في الانجاب.. لا.. بس عشاني .. الحمد لله نتايج تحاليله وتحاليلي سليمة.. ولكن ربنا ما كتب لنا الإنجاب إلى الآن.. طبعا ما يحتاج أحكيلكم عن كم المعاناه اللي عانيتها واللي لازلت أعانيها بسبب تأخر الحمل.. خصوصا إني بعيدة عن أهلي وأعيش في منطقة ثانية. وكمان بسبب إلحاح أهل زوجي وسؤال أهلي وسؤال كل من له تعامل او علاقة معانا.. وما يحتاج أقلكم عن كم الأسئلة والنصايح والتوجيهات والدعوات اللي سمعتها.. الله يجزاهم خير.. بس من جد الموضوع مرهق نفسيا لأبعد حد.. وصرت أكره فتره المواسم زي الأعياد والمناسبات.. عشان التجمعات والأسئلة والتعليقات والحمد لله..
وبالنسبة لزوجي.. مستحيل يمشي معاه موضوع العناد.. والزن.. بالعكس يجيب نتايج عكسية جدا.. وصرت مخيرة إما اني اعيش معاه بطريقته.. يومه بمليون سنه.. أو إني انفصل عنه.. والآن بعد مرور 7 سنوات بدأ يتجاوب بشكل بطيْ لكنه رافض اني ادخل في كورسات تنشيط.. ويبغى نبدأ بالطرق الطبيعية من حجامة وأشياء طبيعية.. وإذا ما نجحت كلها نرجع لكورسات التنشيط..
بنات.. أنا عمري مش صغير.. وما يسمح لي بالانتظار كثير.. فهل تشوروا عليه اني انتظر كمان وأمشي بطريقة زوجي وإذا ما نجحت الأشياء الطبيعية أرجع للمنشطات.. وهذا الموضوع ممكن ياخذله كمان سنة ولا أبدأ بالكورسات بدون علمه.. وطبعا الكورسات مكلفة ماديا.. وأنا بعت جزء من ذهبي عشان التحاليل وراح اضطر ابيع كمان عشان موضوع العلاج.. مع العلم انه ممكن بعد ما أعمل الكورس ما يتجاوب معايه زوجي بسبب اصابته بالسكر.. العلاقة بيننا صارت في فترات متباعدة جدا.. ممكن مرة أو مرتين فقط في الشهر.. والله أنا في حيرة شديدة من أمري.. وأعيش ظروف صعبة جدا.. أتمنى مشورتكم الصادقة وأكرموني بدعوة في ظهر الغيب ولكم بمثل وزيادة.. آمين
* ملاحظة: عندي زيادة في الوزن لكنها مش مفرطة.. طولي 157 ووزني 81 وأحاول انقاصه لكن نتايج تحاليلي سليمة والدورة منتظمة وأشعة الصبغة عملتها وبينت ان الأنبوب اليمين مفتوح والحمد لله والأنبوب اليسار إما مغلق أو غالبا متشنج وقت عمل الأشعة.