استشاره في وضوع خاطب

السلام عليكم ورحمة الله


خواتي ابي رايكم,

انا عمري 35 وصراحه ما انخطب الا نااادر, ولي سنتين ابد ماجا احد ولا تلفون حتى.


وجا شخص معدد, عنده 2, ويبيني الثالثه..عمره 40 ,من منطقه غير منطقتنا, يعني مارح اكون بنفس مدينة اهلي.

هو مقتدر جدا, وزوجاته تعليمهم ابتدائي, ويقول اهله اختاروهم, والحين يبي وحده هو يختارها, ومتعلمه,
ويقولي يبيني انا اصير معه بسفراته واصير زوجه ومساعده في شغله اللي كله سفر وكذا, لاني جامعيه وعندي لغات..


المشكله عايلتنا ماحد معدد,, حتى اللي زوجته ماتحمل يقعد معها ماايتزوج عليها,

انا مقتنعه في هالشخص, من ناحية انه متعلم ,وحالته الماديه ممتازه, واحس افضل من مطلق, لان المعدد خيار الطلاق بعيد عليه مو سهل زي اللي جرب الطلاق يحسه اول خيار في حال عدم التوافق.
وساعات اقول الرسول عليه الصلاة والسلام احسن الخلق تزوج وعدد..ويكفي انه حلال وشرع الله,
وغير كذا مارح اكون لحالي كثير لان يبيني اسافر معه بكل سفراته واترجمله وكذا..

ويقول مارح اقصر عليك بشي ابد

بس سالفة انه بكون الثالثه حسيت شوي قويه,, يعني لو الثانيه تهون, بس 3.. مادري, تشوفون عادي؟؟خصوصا انه توه عمره 40؟؟

واخاف يتشمتون فيني جماعتنا ,هذا اكثر شي مخوفني ..


مرره محتاره , وكل شوي استخير بس ما ادري صراحه..
واهلي منصدمين من اني وافقت مبدئيا ..تعرفون اي اهل يبون الاحسن لبنتهم, وغير كذا شايفيني وحده مدلعه , فشلون اوافق على معدد,واني مارح تحمل,




انتظر ردودكم.