استشاره منكم ابي حل منطقي وعقلاني وحكيم

بسم الله الرحمن الرحيم
اتمنى يكون الجميع بخير وصحه اول مره اكتب مشكله من مشاكلي الي صارت في الفتره الاخيره كثيره جدا
اتمنى منكم ايجاد حلول التوجيه النصح أي شي يخطر على بالكم مالي في المقدمات كثير
انا زوجه من تسع سنوات لي طفلين 8 سنوات و3 سنوات
انا الكبيره في بيت اهلي يعتمد علي اتحمل المسؤليه جربت كل شي قبل الزواج الا الجنس الحمل الولاده يعني تحملت البيت الاطفال تربيتهم الحمدلله يعتمد علي وناجحه جدا
حساسه اتاثر من الكلمه دمعتي قريبه جدا انجرح بسرعه
طباخه ماهره نظيفه ولله الحمد
زوجي :
رجل طيب حنون مزاجي اناني عنيد ذو عين ناقده ولسان ناقد ايضا
تغيرت حياتنا من فتره 3 سنوات تقريبا ولكن زادت سوء في الفتره الاخيره جدا
علاقتي باهله رائعه واكثر الحمدلله
مشاكلنا كثرت في الفتره الاخيره وانا ماعاد اقدر اتحمل لي 8 شهور استخير في الطلاق
هو من النوع الي مايفلتر أي شي يمر في مخه يقوله زي النقد مثلا طريقة تعامله مع الناس راقيه لكن معي ممكن يغلط بالكلام
دائما نلجاء للنقاش اذا صارت مشكله ونطلع منها بنقاش جيد نوعا ما احيانا انا امشي عشان تمشي الحياة واحيانا هو .
يشكك في كلامي كثير مايسمع لي ابدا , أي احد يصير له معاه مشكله يجي متضايق يحط الحره فيني ودائما يردد انا رجال انا رجال . مع العلم أني ماقد شككت برجولته ابدا.
هو في اخر مره قال لي انا الشركه الي اشتغل فيها حلم حياتي بس تركتها لان طريقتها ماتعجبني وانتي زيها انا احبك بس طريقتك موب عاجبتني وممكن اتركك
انا ماعاد احس معاه بالامان ابدا دائما يزعل ويبغاني اراضيه سواء هو غلطان او لا دائما مشاكلنا على اشياء تافهه جدا جدا واذا زعل يدور اشياء عشان يجي يهاوش زياده يبحث عن شي غلط .
اخر مشكله بينا الاكل كان مالح وانا كنت صايمه قال لي بصوت عالي ماذقتي الاكل
ماينوكل قلت لاوالله عشان صايمه ايش فيه مافي ملح ؟؟! قال انامااقد اشتكيت من عدم وجود الملح االاكل ماينوكل قلت له ممكن اعطيك شي ثاني رفض واكل بعض الاكل وترك الباقي لبس وطلع من البيت في الليل لما رجع كنت مابغى الموضوع يكبر شفته يفتح الثلاجه ويسكر بعدين راح ياخذ شاور سويت له بيض وطلعت له اشياء معاها لم طلع قلت له تبي بيض صح !(يكفي هذا الشي احساس مني بالغلط) قال من قال انا ماابي شي انا ماقلت لك سوي لي شي اقدر اسوي لنفسي لاتمنين علي L رجعت الاشياء , وسكت عنه كم يوم بعد ثلاث ايام قاعد يفتح الثلاجه ويصك وينافخ وين الحليب خلص الحليب قلت أي خلص مافي وينافخ بينه وبين نفسه قلت لاتنافخ انا مااشرب الحليب وانتم الي تشربونه ولاخذته معاي بيت اهلي ولااستخدمته قال ماقلت شي انا قلت عموما وش تبي اكثر قايمه بكل واجباتي قال من قال انك قايمة بها قلت انا اقول ولا انت الي قايم بكل واجباتك وكنت الليله الي قبل طالعه مع اهلي ولما رجعنا ماكان لي محل واضطريت اركب قدام انا وولدي قال انا ماخليكم تحتدون لاحد قلت من قال دايم ندور احد يودينا مشاويرنا ودايم نضطر نركب مع الناس ودايم انا الي اروح اجيب اغراض للبيت ودايم ودايم ودايم المهم اني قلت له كلام وانا معصبه وهو استفززني وهو برضو قال كلام وقلت انا خلاص في اشياء كثيره انت منت شايفها مني وكل شي بنتقده وكل شي مو عاجبك انا ابي ورقتي وابي بيت اهلي يضلون الاولاد المشكله اذا تبيهم معاي انتضرت لين نهاية الترم واذا بتاخدهم مشيت من الان
هذي هي اخر مشكله بس عشان احطكم في الصوره
الاشياء الي تضايقني مشاكلنا كل اسبوعين مشكله نقعد 10 ايام تقريبا زعلانين
اولادي يتاثرون بصراحه انا جد جد افكر بالانفصال بضحيتين احسن مايزيدون
انا ماعندي مشكله ابدا انه ينتقد بس بلباقه بشكل افضل بطريقه حلوه عشان اتقبلها
دائما يمن علي انا وديتكم انا جبتكم انا قاعد معكم

مدري كلامي ملخبط مدري وش اكتب مدري وش احط الي يبي يعرف شي زياده يسال
اخيرا لنا اسبوعين تقريبا مااكلمه ولا يكلمني ولا ادري وش الوضع انا خلاص عفت الزواج
بس ماادري وش الخطوه الجايه وش اسوي ..؟