استعبدو ولدي الله لايسامحهم

بنات انا ولدي الكبير عمره ١٠ سنين وشخصيته ضعيفه يخاف ويستحي يقول لاحد لا ...عنده خمسه اعمام وكلنا ساكنين بعماره وحده وزودوها معاي ودي اوقفهم عند حدهم يعني اي واحد بيروح مشوار ينزل ولدي يشغل سيارته اذا عندهم زبايل الله يكرمكم ينادون ولدي ينزلها تحت اذا يبون شي من البقاله ينادون ولدي يقضي لهم والبقاله بنفس الحي مع العلم ان عيالهم قريب سنهم من ولدي بس ماحد يبي يتعب اولاده واحيانا مافتح لهم او اقول ولدي نايم او يتسبح يروحون يكلمون زوجي على طول ويجي يطلع ولدي غصب ويخليه يسوي كل اللي طلبوه منه واذا طلعنا طلعه عائليه بس نرجع يبكي من الوضع كل اعمامه يوقفون سيارتهم وينادون ولدي ينزل اغراضهم من السيارات حتى شنط زوجاتهم الكبار وعربيات عيالهم وزوجي بعد اسوء منهم كل مااحد جاء بيشيل او يساعد قال والله ماتشيل خلاص ولدي بينزل كل شي لا وفوقها يقولون لاتروح تلعب خلك جالس عندنا يمكن نحتاجك انفجرت اخر مره طلعنا فيها وناديت ولدي قلت روح العب ولاتجي الا وقت العشا واذا احد ناداك لاترد عليه وتضايقو حمواتي وسلفاتي وام زوجي من كلامي لا وهو رايح يلعب قالت حماتي الكبيره انت عليك بناتي انتبه لهم وخلك معاهم قلت حبيبي روح العب ولاعليك من احد وكل وحده تقوم تنتبه لعيالها وانبسط مررره والله اول مره اشوفه مستانس وراح اتعرف على اولاد وجلس يلعب معاهم وبس رجعنا البيت وصلو كل اللي سويته لزوجي وقال هذولا اعمامه لو يذبحونه ماتقولين شي...والبلا حتى من زوجي من دخل ولدي المدرسه شال يده من اغلب مسؤلياته .كيف اتصرف ولدي كره ابوه واعمامه بشكل حتى عيال عمه مايبيهم بس يتوعد انه بس يكبر يخرج من البيت وماعاد يرجع ودي اقوي شخصيته واخليه يتصرف معاهم ويعاملونه زي غيره انا يتحسسون مني وكل ماتصرف يقولون تبي تفرق بيننا