استغفر الله صرت اتضايق من القرآن ، تعالي ادخلي عطيني خطه

السلام عليكم بنات

مشكلتي مو اجتماعية بس ماعرفت وين احطها هي مشكله تخصني

انا اشتغل في مكتب يفصل بيني وبين ثنتين من زميلاتي بحواجز بحيث ان الحاجز مايكون لين السقف يعني ثلاثة أرباع الجدار وكل مكتب له باب منفصل.

شرحت لكم المكان عشان أوصل لكم معلومه وهي ان اي همسه في هذا المكتب يسمعونه اللي بالمكاتب اللي جنبه.:09:

وانا احب الهدوء لما اشتغل بس الله يعينا في مابلانا ،، معانا وحده العشره صعبببه معاها
لان صوتها عالي وعدوانيه وياويل اللي يقرب منها ،، وفوق هذا انا من النوع المساااالم الي مالي حس وبطبعي هادية ،، وبنفس الوقت أكره الشعور الي يجيني انها مستقويه علي واراددها لكن بهدوء وهالشي ما ينفع معاها ، مثل مايقولون هي ماتمشي الا بكسر الراس.

المهم، اللي صار يا خواتي ان وحده من الزميلاات اشتكت عليها عند العميد انها مو قادره تشتغل من الازعاج لان فيه شغله ثانيه تسويها وهي انها تفتح القرآن في كمبيوترها من الصبح لين العصر الله يهديها بدون مراعاة اللي حواليها،يعني الواحد اذا يبغي يسمع شي يسمعه لحاله مو لازم يسمع اللي حواليه ويسمع وقت واحد مو طول الوقت، لكن مافي فايده من الشكوى بالعكس صارت عدوانيه اكثررررر.

وجيت انا كلمتها ابي اتفاهم معاها، وقلت لها ان لازم تراعين ان حواليك فيه زميلات يشتغلون فياريت تكوني هاديه قامت قالت ( اصلا انا هاديه اما القرآن ما تقولي ما تشغليه انا مابعرف اقعد الا وهو مفتوح) قلت لها شغليه لكن قصري على الصوت من فضلج ، قالت انا مخفضه عالصوت وبينت انها هي الملاك ماسوت شي ، قلت على خير.

بالايام الجايه مره تقصر ومره ترفع الصوت على حسب المزاج، اما صوتها بدت تتكلم بهدوء احسن من اول.

المشكله اللحين، اني صرت استغفر الله اتضايق من القرآن لاني احس انها جابرتني على هالشي وطول اليوم وانا اشتغل من الصبح للعصر ، اسمع بس شي يتكلم بدون ما اتدبر كلامه ولا انصت له، او مثلا حابه اني اسمع اذكار الصباح او اناشيد او سورة معينه او اي شي يخطر في بالي ما أقدر هي فارضه عالجميع انه يسمع اللي هي تسمع طووول اليوم .شوروا علي شسوي مع هالانسانه، يمكن عندكم خطه اسويها معاها ، لاتقولون لي كلميها لان ما ينفع معاها احس مره بنفجر فيها ، لان للصبر حدود وانا الوحيده اللي اعاملها زين من بين زميلاتنا.