استفسارعن المنتو الكذاب وتفريزه

حبيبتي ادهني الصينيه بزيت ولفي الرقاق بلحم مفروم مع بصل وشوويه طماطم مقطعه صغييره مره والبصل بعد صغيير مرره واذا خلصتي فرزيها وغطيها زين بكييس
واذا بتسوينها ممكن تحطين شرايح بصل او بطاطس وحطي خلطت المنتو الجبنه والماجي والمويه وبس

حلقات البطاطس والبصل نحطها تحت المنتو في اخر الصينيه ؟
ومشكوره رباب الله يسعدك
نبغى طرق اخرى خاصة في طريقة المويه اللي تنطبخ فيها المنتو

أظن وأنا ما ادري أن قصدك على البخار ما اظن أنه موية؛ أما طريقتنا اخذتها من قريبتي ومرة لذيذة الصراحة شرايح سنبوسة محشية عصاج ؛صينية تحطين فيها طماطم وبصل شرايح وتصفين فوقها الرولات ؛وتغطينها بطبقة من : علبة قشطة وملعقة أو ملعقتين جبن سايل ومخلوط معهن نصف كاس مرقة دجاج ؛ودخليها الفرن يمكن نصف ساعة من تحت وبعدين حمريها وبالعافية ؛وطريقة تفريزها الي اعرفها زي تفريز السنبوسة :يعني تحشين الشرايح عصاج على شكل رولات وتعلبيهن وتفرزنيهن ووقت ما تحتاجينهن بس قطعي تحتهن البصل والطماطم وصفيهن وغطيهن بالطبقة البيضاء وعلى الفرن 

مشكورة عزيزتي ام اليوسفاني لا ما اقصد طبخه بالبخار لا اقصد المنتو الكذاب اللي طريقته زي ما ذكرتي بس انا للي اقصده المويه او المرقة اللي نطبخ فيها رولات المنتو عشان يستوي كيف نسويها وايش نحط عليها وحده قالت لي انها تحط طماطم مطحونه مع زيت وفلفل وكمون وناس تحط مويه وماجي فقط وانت قلتي قشطة ومويه وجبنه سايله الله يحزاك خير وانا احترت ايش افضل طريقة تخلي طعم المنتو قريب جدا من المنتو الاصلي عشان كذا فضلت اعرف تجارب اخواتي في عالم حواء في هذا الموضوع

سويه برقائق السمبوسة انا اقطعها بالنص واحشيها لحم مفروم مطبوخ مع بصل مفروم وملح وفلفل اسود وكمون والفها وارصها في صينية ومرات ادهن الصينية بزيت وصبي عليها موية مغليه مع شوي ملح اذا حابة او ماجي ولا تكثري المويه وغلفيها بقصدير وحطيها في الفرن من تحت
ولما تقدميها رشي عليها فلفل اسود وكمون مطحون حسب رغبتك

اذا حابة تفرزيها لفيها عادي وحطيها في علب او صحون بلاستيك وغلفيها عدل عشان ماتمسك فيها الروايح ولما تبغي تستخدميها خرجيها وحطيها في صينية واطبخيها