اخواتى بنات عالم حواء فى البداية اب اشكر اخواتى فى الله رغد666 و ام ابراهيم و اسيرة الاشواق و الله انى لا اعرفهم لكن من اسبوعين كتبت مشكلتى فى قسم التجارب طلبا للرأى و المشورة و هما بس اللى دخلوا موضوعى و دعوا لى و يعلم الله كم كنت فى امس الاحتياج للدعاء
معليش طولت عليكم مشكلتى هى مع الامساك اعزكم الله و بالله عليكم لا تستهينوا بهذه المشكلة اللى استمرت معى و نتج عنها البواسير و شرخين مزمنين ومع تجاهل المشكلة و تحمل الالم بسبب الخوف من الم اكبر مثل الجراحة او فى سبيل الخجل من معالجة المشكلة تطورت للاسوأ فتكون عندى عافاكم الله جيوب فى المستقيم و ادت لسقوط فى العضلات لان الجيوب دائما بتكون ممتلئة بالبراز اعزكم الله و ده بدوره بيعمل تسمم فى الجسم لان كل ما طالت فترة بقاء البراز فى الجسم بتمتص منه سموم و الله انى سنين باعانى من نوبات صداع سيئة و نوبات للقولون كانت بتقعدنى فى البيت غير العصبية و ارتفاع الضغط و الالام المبرحة فى نهاية الظهر و كل دة بسبب الامساك و رغم كل دة برضوابيستمر تجاهل المشكلة و التحامل على النفس الى ان اصبت عافاكم الله بالناسور الشرجى و الله ان الالامه لا توصف و لا تحتمل و يمكن هو المبرر الوحيد اللى خلانى اتحرك و ربى كان العالم بحالى و الله يا بنات اتصلت بالدليل و قلت لو سمحت عاوزة اى دكتورة جراحة و ادانى نمرة دكتورة عندنا فى مصر مشهورة جدا و قعدت اسبوع مرعوبة و بعدين استخرت الله و رحت لها والله كل ما تكتشف شئ و هى بتكشف نصرخ يا بنتى حرام عليكى نفسك و طبعا تشخيص حالتى كان زى ما قلت لكم فى الاول و موضوع الجيوب اللى فى المستقيم هى اكتشفته كويس بعد ما خلتنى اعمل اشعة جديدة من نوعها اسمها ديناميكية التبرز و طبعا هى ما عملتليش العملية حالا لان كان عندها مؤتمر خارج مصر فكان عندى وقت انى اصلى استخارة و اكون مؤهلة و اعمل تمهيد لبناتى لانهم كانوا خايفين جدا و اول ما الدكتورة رجعت زرتها بالاشعة بتاعتى و شافتها ورغم كل الالام الناسور عافاكم الله كانت الجيوب هى العملية الجراحية الكبرى اللى عندى و على فكرة هى قبل الاشعة سألتنى عاوزة تتعالجى صح لان يا بنات فى اطباء كتير فى حالة زيى كانوا هيعملوا الناسور و الشرخ و البواسير بس الجيوب كانت هتسبب رجوعهم تانى و ممكن تسبب سقوط كامل فى الشرج اعيذكم و نفسى بالله من كل سوء .
و بسبب الجيوب دى اخدت يومين كاملين فى المستشفى للتجهيز للجراحة كنت صايمة وبيعملوا لى حقن شرجية و المستشفى خاصة بالدكتورة و اولادها الاثنين و خاصة فقط فى جراحات الشرج و المستقيم و الحوض و التمريض رائع جدا و الله يا بنات فى غرفة العمليات اول ما شفت الدكتورة بكيت خايفة من الالم بس هى طمنتنى انه ان شاء الله مافيش الم ولا الفتيل المرعب بتاع زمان بس المشكلة ان الناسور بيتساب مفتوح لحد ما يلتئم وحده و الحمد لله يابنات عملت الجراحة من عشرة ايام و اتحجزت فى المستشفى اسبوع و باكتب لكم حاليا من سرير المرض لانى لسة فى فترة نقاهة .
اخواتى بالله عليكم صحتكم امانة لا تهملوا فيها تعرفوا الدكتورة و هى بتشيل الجيوب دى لقيت و العياذ بالله ورم صغير و شالته و الحمد لله بعد التحليل كانت نتيجته سلبية بس الاهمال فى الاشياء دى بيحولها و العياذ بالله لاورام خبيثة ارجوكم اخواتى بلاش اهمال فى صحتكم ارجوكم كفوا عن الخلطات و الاجتهادات و الجؤا لاهل علم يفيدوكم ارجوكم اتعظوا من تجربتى كنت باهرب من عملية وحدة فاضطريت اعمل اربعة مع بعض بس الحمد لله الحمد لله الذى بنعمته تتم الصالحات استودعكم الله و ادعوا لى ان يتم شفاءى على خير موعدى مع الطبيبة بعد عشرة ايام اللهم لك الحمد حتى ترضى و لك الحمد اذا رضيت و لك الحمد بعد الرضا حمدا كثير طيبا مباركا فيه اللهم لك الحمد على نعمة الحمد اللهم انى استودعك نفسي و دينى و اهلى و اخواتى فى عالم حواء و السلام عليكم .
فراشة 1973 @frash_1973
عضوة نشيطة
يلزم عليك تسجيل الدخول أولًا لكتابة تعليق.
الاميره تويكس
•
يسلموووو
الصفحة الأخيرة