اسره مهدده بالانهيار

الله اليجزيكم خير ابغى حل لمشكله اختي الاتزوجت بعد حب سبع سنوات وعاشت اربع سنوات سعيده مع جوزها وهو كان طيب معاها يحبها ويلبيلها طلباتها هو كان عيبو الوحيد انو عصبي لكن هي كانت تتحملو وزقهم الله باحلى هديه مريم ولما صار عمرها سنه ونصف قررت اختي بطلب من زوجها انهم ينجبو طفل اخر وقدر الله لهم ان يكون طفلين توام المشكله وباختصار ان زوجها صار شخص تاني هي ماتعرفو ولا عمرها اتعاملت معاه من قبل على طول ثاير غاضب متمرد على كل اليصير في البيت طيب والله وبدون مبالغه انا اختي مثاليه لابعد الحدود وناكره لذاتها معاه ومع اولادو وحالها حال كل زوجه تحب زوجها وتضحي عشانو يعني هو مرت عليه ظروف صعبه و هي كانت تقف بجانبه بدون تذمر تخيلو حتى معايا انا اختها ماكانت تقولي عليه غير احلى كلام ودحين بعد هدا الصبر كلو مااستحقت غير الاهانه والجرح المهم ان اختي صار لها هي واطفالها الثلاثه اسبوعين في بيت اهلها بسبب ليله سوداء قضت اختي معاه في ابشع حال تطاول باللسان واليد وكانت هادي الله اخر صبر اختي ماقدرت تتحمل اكتر طيب هو مايسال على اولادو صار لو اسبوعين وبنتو تبكي عليه وكمان مايرسلهم فلوس وكتير حاولو يتدخلو من العيلتين وهو يرفض بالاضافه الى انو كان يبغى ان هي تجلس ماتمشي لكن بدون ما ابويا يتدخل ويقول انا احل مشاكل بيتي وقال اذا حبت تسيب البيت ماترجع تاني طيب دحين ايش الحل هي اختي تحبو وتبغاه حتى ان كان ترك شرخ كبير في قلبها هي عندها اصل والعشره ماتهون عليها بس مهما كان هي تبغى تعيش معاه معززه مكرمه وهي تستحق اكتر من كده ارجوكم ساعدوني في حل لانقاذ اسره مهدده بالانهيار وادعولها بتفريج الكرب الله يكرمكم