اسم عضويتك وصورتك وتأثيره عليك

في مواقع التواصل والمنتديات وفي الحياه الواقعيه
إسمك المستعار أو إسم عضويتك أو صورتك الرمزيه أو البايو والنبذة التعريفيه عنك
حتى اللوحات والصور والكتابات الجداريه ومقاطع الفيديو اللي تشاهدها العين وتسمعها الأذن
تدرين ان كلها تحتوي على ( سبليمنال - Subliminal ) لعقلك الباطن
يعني تحتوي رسائل خفية يلتقطها العقل الباطن
ومع مرور الوقت تترسخ هذي الرسايل فيه وتؤثر على الشخص نفسياً ومزاجياً وسلوكياً
وتنعكس حتى على تصرفاته واسلوبه وتعامله ونظرته اتجاه نفسه واتجاه الاخرين
مثل بعض البنات اللي يختارون لهم اسم عضويه حزين وسلبي
تسمي نفسها المطعونه بخنجر الغدر ، المدمره ، المكتئبه ، الفقيره ، أسيرة الدموع والاحزان ... الخ
وتختار لها صوره حزينه قلب مكسور يقطر دم ، عيون تبكي ، يد مبقعه ازرق وفيها ابرة مغذي ... الخ
وتلقين حياتها مكركبه ودائمة الشكوى من الهم والغم والمرض
ولما نقرأ الاسم او نشوف الصوره نحس بضيقه او نحس بكسرة خاطر او نحس بالشفقه والحزن
فما بالكم بالشخص ذاته اللي يسجن نفسه بكل هذي الرموز السلبيه في صورته ومعرفاته وافتار جواله ؟!
يا ترى كم من الرسائل السلبيه اللي ألتقطها العقل الباطن وانطبعت فيه وتغلغلت وتشبع منها
ثم صار عقله الباطن يتجاوب ويتفاعل معها ويهيء له هذي المشاعر السلبيه ويعيشه اياها بصدق !
يمكن البعض يستسخف هذا الشي او يعتبره كلام فاضي
لكن لو نجي للواقع بنلاحظ انه فعلاً الصور والاصوات والكتابات لها تأثير حسب محتواها السلبي أو الايجابي
بدليل ان الاطفال لما يتفرجون رسوم متحركه يتأثرون بها حسب محتواها
وكذلك الالعاب الالكترونيه العنيفه اللي فيها مطاردات وقتل واعتداء على سيارات الشرطه تأثر على الاطفال
وحتى احنا الكبار لمجرد مشاهدتنا نشرة الاخبار او بعض المقاطع السلبيه للمجرمين نتأثر نفسياً ومزاجياً
ولما نشوف مشهد حب او مقطع لم شمل عائله لا شعورياً نتفاعل ونتأثر
لان ببساطه احنا كائن بشري يتأثر بمن حوله وعقلنا الباطن قوي يعمل طوال الوقت
لذلك احيطوا انفسكم بالايجابيه سواء في معرفاتكم بالنت او في اختيار صوركم او في كتابة الوصف الشخصي عنكم
او حتى في تفكيركم وحديثكم مع انفسكم بصمت لا تركزون الا على الزين والايجابي
كونوا ايجابيين عشان عقلكم الباطن يلتقط الايجابيه ويترجمها لكم في مشاعركم وحياتكم