السلام عليكم ورحمة الله وبركاته ..
صباح الخير بنوتات وحريمات :) ..

شوفو حبيباتي جيتكم بالردود إللي يارب تبرد قلوبكم ..
وطبعا الموضوع حيتفرع شوية وأنا كلامي كتير ..

بالنسبة للصوالين إللي ذكرتيها أختي نجمة ..
أنا الحمدلله خبرة في صوالين جدة والحمدلله
مالي غير في الـ top >>
رحت لصالون دنتلة من ورا صاحبتي إللي طلعتلي
هو السما .. قلت يابنت روحي وجربي والله لا يفقر أحد
( كنت طفرانة فأسترخصت أسعارهم ) !!!! خخخخخخخخخ
تعرفو الواحد تجيلو فترات قحط مادي يستخسر يسوي فتلة شنب
بعشرين ريال !!!!!! وطبعا أنا ماعندي مانع أجرب .. ووثقت في صاحبتي
ورحت لهم .. وبأقولكم دا الكلام عشان تعرفو السبب إللي خلاني
أروح بعد ماتقرو كلامي وتقولو أيش وداكي لهم ؟؟
ومن عند الباب لقيت أكياس زبالة وبساس
قاعدة تفقع فيها وتاكل !!!! وعموما هو ماهو في المنطقة النظيفة
من التحلية إللي فيها الصوالين الفخمة .. هو في حارة من حواري
التحلية إللي في الجهة التانية ( مادري كيف أوصفها هادي !!!! ) ..
قلت يابنت سمي بالله وخشي و ( يامسترخص يا متنغص ) !!!!
دخلت الصالون وبصراحة كان زحمة مع إنه وسط أسبوع ..
لقيت عالإستقبال كم وحدة ياخدوكي بالكلام الحلو وتحسي
إنك حتطلعي فلللللة .. لكن الحرمة الأساسية إللي جالسة عالمكتب
وتاخد الفلوس وتحدد الأسعار رايحة زي مدري مين :30: .. نفسها
واقفة أعوذبالله .. ماتتخاطب .. مدري على أيش شايفة نفسها؟؟
هي شكلها سعودية أو يمانية ..و الباقيين كلهم أجانب (حبوش + فلسطينيات)
رحت وقلت لها أبغا أصبغ شعري و أسوي مانيكير وباديكير .. حددت لي السعر
وكأني جاية بأسوي ببلاش .. تقول لي هاتي الفلوس دحين دحين !!!!
قلت طيب ودفعت لها الفلوس ودخلت ويدي على قلبي ..
المحل صغيييييييييييير (شقة) وصراحة ماأرتحت نفسيا فيه ..
جاتني هادي أم حسن (وللمعلومية هي فلسطينية) حقت الصبغات
وشعري كان مصبوغ لون يجنن وبشهادة كل إللي شافوني كان مكلفني
800 ريال صبغة وهاي لايت وكان لونه بلاتيني فظييييييع ..قلت لها أصبغيلي
جذور بس .. بعدين جلست تكلمني عن نفسها وحسيتها طيبة ..
قمت أتحمست وقلت لها طيب سويلي خصل زيادة على خصلي القديمة
وأصبغيلي .. قالت طيب ..
أول عيب ( سوتلي الخصل بالطاقية وأنا كنت مسوية قبلها بالقصدير
فصار الشعر خبيصة) .. وأنا أحس القصدير دقيق أكتر ويطلع أحلى ..
تاني عيب ( قلت لها أبغا الخصل بلاتيني زي خصلي القديمة قالت لي طيب
وطلعت الخصل زي لون الشمس !!!! )
وأقٌول لها الخصل صفرا ؟؟ تقول لي لالالالالا لونها شوفي بلاتيني
وتوريني من الخصل إللي تحت وتقول لي شوفي لونها يجنن زي ماتبغي
( لمن رجعت البيت أكتشفت إنها خصلي البلاتينية القديمة ) !!!
العيب التالت .. ( الحرمة صحيح إنها طيبة لكن حسيتها عفشة ويدها
تقيلة في الشغل يعني حسيتها بتنتف راسي ) وأنا متعودة عالقصدير
وماني متعودة على إنه كوافيرة تجلس وتهبد وتخبط في راسي
وأنا جالسة كأني ( بنشنج باج ) تحت يدها !!!!!!!
ومادري هو العيب منها أو أنا عشان راسي يوجعني بسرعة !!!
المهم وزبدة الكلام طلعت بشعر لونه عجيب وغريب ومخبص
وخسارة الـ800 ريال حقت الهايلايت القديم :( ..
بس عموما لقول الحق لون الشعر وشكله مقبول بس مو
باين زي شغل البروفيشينال إللي قبله !!!! وضارب على صفار
زي صبغات الأفلام المصرية القديمة ..!!!!
وماأحسها دقيقة في القص يعني شيط شيط شيط شيط
تقصقص ويلا أمشي ..
ويالهوي على الموظفات التانيين (الحبشيات) لمن شوفتهم
بيقصو للزباين خفت على نفسي !!!! والمشكلة الزباين بيطلعو
فرحانين .. الله يهنيهم .. بس أحس شغلهم تجارب في رؤوس المغلوبين
على أمرهم إللي زينا ..
وطبعا وهي بتغسل في شعري وتهبد في راسي ألين جاني
رجة في راسي وصداع .. شوفت عدة المانيكير والباديكير
(والله أعلم إنها هي إللي بيستخدموها) مصدية ومعفنة
وشكلها يجيب الصرع .. والمغطس حق الرجول شكله فيه
حاجات غريبة ( فطريات أو صدأ ) فأنا قعدت أطالع وأٌقول ياربي
دحين هما بيستخدمو هادي الأشياء ؟؟ وطبعا قلت يابنت قيدها
خربت في راسك بلاش تطلعي من هنا معوقة ولا يجيكي كزاز ولا شي
أعوذ بالله !!!!!
رحت وقلت لها بطلت ما أبغا أسوي مانيكير و باديكير ..
وقفت في وجهي أم نفس واقفة حقت المكتب وتقول لي
ماعندنا فلوس روحي سوي ( البوديكير) !!!!
ماهي راضية ترجع لي الباقي بحجة إنه ماعندها فلوس !!
قلت لها رجعيلي فلوسي وأنا أديكي حق الصبغة وبس ..
تقول لي لالالالالا جيبي حق الصبغة أول وبعدين أعطيكي
الفلوس إللي دفعتيها !!!!!!! وصراحة أخلاقها جدا سياحية !!!!
أســـتـــغــفــــــــر الــلـــــــه الــعـــظــــيـــــــــــم ..
نيجي للمكياج حقهم والتسريحات .. بصراحة أنا طلعت أعصابي
تعبانة من المناظر إللي شفتها .. وكل شوية أتفزز لمن أشوف وحدة
متمكيجة وخارجة !!!! وأقولهم المكياج مرة مو حلو .. وعشان يدارو
موقفهم يقولو هادولا طالبين كدة !!!!! بس بصراحة مرة مفقع ...
وبجد مناظر مرعبة يعني مرة كتير كتير كتير وخبيص عالآخر ..
والشعر مرة ماعجبني تحسي يحطو جل و إسبراي كتييييييييييييير
والشعر يسير نااااااااشف وشكله مرة مدري كيف !!!!
المهم .. والخلاصة .. والزبدة ..
لو تسألوني هل هو مكان ممكن ترجعي له تاني مرة ؟؟
أقولك لالالالالالالالالالا وألف لالالالالالالالالالالالالالالا
ومن جد لمن قالو ( يامسترخص يا متنغص ) !!!!!!
ولاتقولو إني أنا بأقطع رزق الناس .. والله العظيم بأقٌول تجربتي
وأمانة إللي تبغا تشوف تروح وتشوف بنفسها .. عشان لا تحملوني
ذنبهم .. إنتو سألتو وأنا قلت رأيي ..
يمكن يطلعو الناس أذواق وأحد يعجبه شغلهم ؟؟ بدليل زباينهم الكتار !!!!
أمانة إللي كانت مقررة تروح لهم تروح وتشوف وتحكم بنفسها
أو تجلس وتتفرج وتشوف رأيها فيهم .. لكن لا تخلو كلامي يقطع رزق الناس ..

وبالنسبة لريما أنا أتكلمت عنهم في موضوع من موضوعاتي القديمة
والله مادري فينو ؟؟ بس سوو له بحث في مواضيعي وتلاقوه ..
ريما شغلهم حلو .. وتحديدا بعض الأسامي ومو الكل ..
لكن لينا هي الـ top ولينا ما تشتغل غير بالمحسوبية ..
وماتشتغل غير العرايس .. وتشوفي إللي تطلع عدلة .. وإللي
تطلع يارب الستر .. وبرضو الناس أذواق ..
لكن عيبهم مواعيدهم حرررررررق أعصااااااااااااب عالآخر ..

وإللي تبغا أي خدمة بالنسبة لأي صالون أنا حاضرة ..
بس والله أنا ماأتكلم غير عن تجربة شخصية ..

وبالنسبة لأختي نجمة وإللي أتكلمو عن هادي الكوافيرة
المصرية .. مين جربتها ؟؟ وبكم ؟؟ وكم رقمها ؟؟ والأهمممم
كيف شغلها ؟؟؟؟؟ وبأمانة ؟؟؟؟؟
ولا تفهموني غلط وتحسبوني بأقطع رزق الناس لكن والله بأتكلم
عن نفسي .. والناس أذواق .........


وبالنسبة لموضوع مهم وحيوي :) ..
ليش الكوافيرات غاليين لهادي الدرجة ؟؟
يعني لو بدي أروح أسوي مكياج وتسريحة في
مكان محترم وأضمن إني أطلع مرتبة حأدفع لايقل عن
400 ريال إذا ماكان أكتر !!!!!
ياجماعة ليش الأسعار كدة ضربت ؟؟
ولو روحتي محل رخيص ماتضمني كيف يطلع منظرك
بعد ما يخلصو منك .. وأنا بصراحة أخاف لأني كذا مرة
أروح صوالين من إللي عندهم العروض هادي .. وأحس
مكياجاتهم عفنة !!!!! يعني ماهي ماركات ومايهتمو بالنظافة ..
وماتدري ألين توصلي مناسبتك كيف يصير منظرك وتسيح الألوان
في بعض وتقرفي من نفسك !!!!
ولو تيجي تفكري .. تدفعي 400 - 500 ريال بس تطلعي مرتاحة
وعارفة مكياجك مرتب وشعرك مرتب والأهم عارفة الخامات
إللي بيستعملوها وبتشوفي الأساس والكريمات والظلال والبلاشر
كله قدام عينك وماركات معروفة .. وماتطلعي وجهك لون ورقبتك لون
وصدرك لون وجسمك لون !!!! يعني بيختارو المناسب لبشرة كل زبونة ..
والأهم إنه يستمر طول الليل وماتخافي إنه يتمسح مع العرق أو الطرحة
أو يلطخ الفستان زي الأنواع الرخيصة !!!!!
( أغلب الأماكن المحترمة (الغالية) كدة ) ..
أنا ماأعرف أيش دخل موضوع × موضوع لكن إنتو جيتو على
نقطة حساسة وهي إنه الفلوس بتروح في الحرام .. يعني 400-500
ريال بتندفع في ليلة واحدة وآخرتها شوية موية وصابون وكله راح
في المجاري أكرمكم الله ..
ومو كل واحدة تقدر تمكيج نفسها مزبوط ..
وأحيانا في مناسبات خاصة تكوني مجبورة تتصلحي وتروحي
وإنتي شكلك تمام ونفسيتك تمام ....
والأخس و إللي يحرق القلب أكتر .. الفلوس إللي بياخدوها من العرايس
بالآلاف والعروسة بالذات ما تلحق تحلل مكياجها ما بيقعد أكتر من
4-5 ساعات .. مع إنهم مابيحطو شي زيادة !!!!!!
لــــــــــيــــــــــــــــــــــــــــش ؟؟؟؟؟؟؟؟؟
والله قهر قهر قهر قهر قهر !!!!!!!!
وإســـــــتــــــــــغـــــــــــلال !!!!!!!!!

سبحانك اللهم وبحمدك لا إله إلا أنت أستغفرك وأتوب إليك ..


تحياتي ..
جـــــــداويـــــــــــــة

ما شاء الله عليك يا اختي جداويه ما قصرت