اسهل طريقة لمعالجة الشعر التالف **

السلام عليكم

هلا خواتي اشحالكن ان شا الله طيبات

ما ادري خواتي انتوا تعرفون هاي الطريقة والا لا بس اللي تعرف فهنيئا لها وان شا الله انها استفادة من هاي الطريقة السهلة لمعالجة الشعر التالف واللي ما تعرف ان شا الله بعد انها تستفيد من الطريقة اللي راح احطها

بنات انا شعري من النوع الجاف يعني الشعرة مالتي ما شا الله جافة وقوية يعني يباله مط لين ما تنقطع بس المشكلة ان شعري بهت وطاح بسبب بعض المشاكل النفسية اللي مريت فيها مؤخرا واللي ادعي ربي انه ينهيها على خير ولا يردها ابدا وبعد بسبب الصبغات اللي هرت شعري وجففته زيادة للأسف

عموما انا رديت الحين على طريقة اسويها يوم اشوف شعري مرة مهري لاني للأسف الشديد انسانة ما اواظب على شي ينفعني الا لما احتاجة يعني اذا وصلت للنتيجة اللي اباها عادي بتركها وبرد لاهمالي مرة ثانية والله يعين ابو العيال على شكلي بس :D

المهم الطريقة اللي اتكلم عنها هي انكم تيبون الزيوت او الزيت اللي تستخدمونها وتخلطون وياه ملعقة كبيرة عسل يعني انا اخربط زيوت مع بعضها في علبة واحط فوقهم العسل والزيوت اللي احطها هي زيت زيتون زيت عافية زيت نارجيل زيت جوز الهند زيت دابر واذا خايفين من الريحة يااما تحطون هيل في العلبة اللي تخلطون فيها الزيوت او قرنفل على راحتكم وبعد زيت الخروع علشان التساقط المهم وبعدين احط فوقهم ملعقة عسل كبيرة علشان تعطي شعري اللمعان اللي كان فيه اول عموما هذا اللمعان اكيد ما راح تحسون فيه من اول استخدام لكن بعد شهر من الاستخدام يعني بعد 4 مرات اكيد ان شا الله راح تلاحظون الفرق وبعد ما اغسل شعري احط زيت مجدد حيوية الشعرمن الهمالايا علشان تطويل الشعر لاني مليت من الشعر القصير وعلشان الكثافة والتنعيم ومثل ما هو معلوم لكم او لبعضكم على الاقل انه ما شا الله مفعوله ينبان في خلال شهر ينبان ان الشعر بدأ ينعم اكثر من اول ويكثف ويطول يعني الصراحة واااايد فادني انا وعيالي هذا الزيت :)

عموما اللي حابة تجرب الطريقة هاي لازم على الاقل تستخدمها لمدة شهر وبعدين ان شا الله بتحس بالفرق ولا تنسون تخضون العلبة مالت الزيوت والعسل كل ما ييتوا تستخدمونه علشان يتوزع العسل في العلبة :27:

وان شا الله اني ما اكون ضيفة ثقيلة في منتداكم المميز :27:

اختكم في الله

ام ناصر