اشتقت لصديقتي في الغربه ....يمكن موضوعي غريب

السلام عليكم ورحمه الله وبركاته
كيفكن صبايا
يازين الغربه وايامها ليتها تعود واحللها مضبوط
الحمدلله يارب
السالفه ومافيها اول ماطبيت ارض الغربه من سنوات عده تعرفت على وحده نفس تخصصي بحكم اننا ندرس تخصص واحد ومبتعثين من نفس المكان عطاني الدكتور رقمها واتصلت فيها وتعرفت عليها ولازالت للان علاقتنا طيبه وان ماصارت نفس القوه قبل لكن للحين بيننا تواصل الحمدلله
هذي الصديقه عرفتني على صديقه ثانيه تدرس نفس تخصصنا من دوله خليجيه ثانيه ، حبيت البنت مره مره حبوبه وشخصيتها حلوه ، البنت اهلها من طبقه اجتماعيه راقيه وابوها في دولتهم ماسك منصب كبير وناس تجار ، لكن حسيتها متواضعه مع اني كنت اسمع العكس من باقي البنات
كنا ثلاثي كويس انا وصديقتي وصديقتنا هذي ، الا ان صار حزازيات بين صديقتي وصديقتنا وتهاوشوا وكل وحده تشكي من الثانيه وانا احاول امسك العصا من النص واصلح بينهم لكن مافي مجال لان اصلا هم صداقتهم قبلي وكانوا قبلي بسنين سوى
بعدها صرت اطلع مع كل وحده ولا اجيب طاري للثانيه . وتطورت علاقتي مع البنت الثانيه ....بنات سوالفها تونس واحسها عالم ثاني يمكن لانها طبفه اجتماعيه غير يمكن لاوهم متفتحين بس كنت اتمنى نظل نتواصل دايما ....تخرجت وعملت لي حفله ماقصرت والله ورجعت انا ...بعدها رجعت لدوله الغربه احضر حفل التخرج وبنفس الوقت كانت صديقتي هذي متخرجه وجبت لها هديه لكن مشاعرها واستقبالها لي فاتر وحسيتها تقول خلاص انتهى دورنا وصداقتنا ...لدرجه لما ودعتها غصت عيني بالدموع لكن هي عادي
بعدها رجعت هنا وارسل لها وتس ماترد ساحبه
سالت عنها البنات معظمهم قالوا ماندري عنها بعد تخرجها
وبعضهم يقولون تزور ناس معيننين وقدرت اطلع رقمها من وحده من البنات لاني هي على علاقه قويه مع زوجه صديق زوجها وعطتني الرقم
لكن اخاف ارسل لها ماترد وتحز بخاطري واكره حتى الذكرى الحلوه الي بيننا
مدري انتم شرايكم
ملاحظه عندي صديقات كثر بس هذي لها معزه خاصه مدري يمكن اعجاب او انبهار بشخصيتها او اني دايما اتمنى يكون عندي صديقه مرحه ومحبه للحياه او يمكن غنيه 🙄 مدري كنت اتمنى تستمر صداقتنا لكن انا احساسي يقول انها كرهت صديقتي ومشاكلهم عشان كذا ماتبقى تتواصل حتى معي