اشتقت لكي يا فانكوفير Vancouver

سبحان الله فانكوفر شئ خيال
من يستطيع ان يتخيل مدينة جميع اشجارها مكسوة بالورود البيضاء والوردية والبنفسجية ، وعندما تهب الرياح تتساقط بعض تلك الورود فتكسو الطرق والشوارع بطبقة من اوراقها فتجعلها اشبة بلوحة فنية وتحفة لا مثيل لها ، وعندما تستنشق الهواء الممزوج برايحة هذه الورود تكون كمن لم يستنشق هواءً طوال حياته مهما طالت او قصرت.

هذا الخيال الحمد لله عشته ومن اجمل لحظات حياتي

وينها فيه هالمدينه في امريكا؟

فانكوفر من المدن السياحيه المشهوره غرب كنداااااااا:26:

[

°ˆ~*¤®§(*§ الجزء الأول §*)§®¤*~ˆ°



الساعة الثانية صباحاً من يوم الاثنين التاسع عشر من شهر ديسمبر عام 1994 اقلعت طائرة الخطوط الجوية البريطانية من الرياض الي الي لندن وانا على متنيها في طريقي الي فانكوفير.






هذي بعض الصور لمطار هيثرو في لندن من الجو والارض.


وصلت للصالة رقم (4) من مطارهيثرو في لندن الساعة السادسة صباحاً بتوقيت لندن ، يعني بعد حوالي (6) ساعات طيران ، اول ما شفت مطارهم انبهرت وندهشت من حجمة وكثرت المحلات والمطاعم ، في وقتها كنت ما قد شفت مطار بالحجم هذا وبديت امتر المطار رايح جاي وشريت لي حوالي خمسمية دولار كندي من الصرافين الموجودين في المطار(الدولار الكندي في ذاك الوقت يساوي حوالي 2.50 ريال) ، بعدين دخلت صالة خاصة بالمسافرين القادمين من الشرق الاوسط ، صالة حلوة وجميلة فيها المشروبات والماكولات مجانية وفيها تلفزيونات وتلفونات و دورات مياه مزودة بدش للي يبغا يتروش وفيها ايضاً غرفة داخلية كبيرة مزودة باسرة للي يبغا ينام.

عند الساعة الرابعة عصراً (يعني بعد انتظار في المطار دام حوالي 10 ساعات) صعدت الطيارة المتوجهة الي فانكوفير



هذي صورة من الجو ونا في الطريق الي فانكوفير



وهذي صور لجزر ثلجية من الحدود الشمال شرقية لكندا

وصلت فانكوفير بعد (9) ساعات طيران حوالي الساعة الرابعة عصراً من نفس اليوم بتوقيت فانكوفير(لا تستغربون وقت الوصول لان مسار الرحلة من الشرق الي الغرب يعني قاعدين نمشي عكس الوقت. وفارق التوقيت بين لندن وفانكوفير ما بين 8 الي 9 ساعات ) وخلصت من الجوازات (الحقيقة كان تعامل حقين الجوزات قمة في الاخلاق ، يعني تصورو اول ما يقولون لك هو الحمد لله على السلامة ومرحبا بك في فانكوفير وفوق هذا كلة الابتسامة من الاذن الي الاذن) (نسيت اقول لكم اني كنت رحت للسفارة الكندية في الرياض عشان اخذ تاشيرة الي كندا ، بس قالو لي ان السعودي ما يحتاج تاشيرة اذا كان بيجلس في كندا لمدة لا تزيد عن 6 اشهر . طبعاً في الوقت الحالي وبضغط من امريكا السعودي محتاج ياخذ تاشيرة ق

صور لمطار فانكوفير



هذي خريطة كندا و الخط الازرق يفصل بين الحدود الكندية والامريكية



هذي خريطة توضح مقاطعة برتش كلومبيا ولي تقع فيها فانكوفير



وهذي خريطة مدينة فانكوفير

بعد ما استلمت شناطي اخذت لي تكسي وقلت للسواق (السواق كان هندي من اسيا) ودني لم فندق يكون رخيص السواق ما صدق خبر و وداني الي فندق راعية ايضاً هندي وكان اسم الفندق موتيل 2400 (Motel 2400) (مشوار التكسي من المطار الي الفندق كان 20 دولار) وكان الفندق على شارع اسمة كانقز واي (Kingsway) في شرق مدينة فانكوفير ، كان سعر الليلة في الفندق حوالي (40) دولار كندي ، على طول حطيت شناطي ونمت من تعب المشوار.

اصبحت ثاني يوم حوالي الساعة (7) الصبح ، وكان ذابحني الجوع والفندق ما فية مطعم ، سألت موظف الاستقبال في الفندق عن اقرب مطعم ممكن افطر فية ، فقال ان مطعم مكدونلدز موجود على بعد تقريباً 1 كلم ويقدم المطعم فطور!!! (انا الحقيقة ما كنت ادري ان مكدونلدز يقدم فطور) اخذت منه الوصف لموقع المطعم ودقيتها مشي ، وكان الجو بارد وخشمي من شدة البرودة احس انة مثلج ويبي يطيح (بس تبون الصراحة بردهم ماهو شي عند برد الرياض الي ياصل العضم ويخلي الواحد يرتعش تقل غصن شجرة ناشف) ، ونا في الطريق للمطعم كنت شايل هم قطع الشارع مع كل الثلج الي مغطي الشوارع وكنت خايف اتزحلق ونا اقطع الشارع وتصدمني سيارة .

طبعاً انا ما اعرف ولا تعودت على شي اسمة قطع الشارع من عند الاماكن المخصصة لعبور المشاة ، ورحت ووقفت على طرف الشارع احتري السيارات تعدي وقطع الشارع ، انا ما امداني انزل من على الرصيف وحط رجلي على الخط الا وكل السيارات وقفت!!! انا يوم وقفت السيارات طاح قلبي ولا كنت ادري وش السالفة وبديت اتلفت وراي قلت يمكن فية وحدة مزيونة والسيارات وقفت لها ، لكن الغريب ان السيارات هذي وقفت يوم شافوني اصحابها عشان اقدر اعدي الخط بسلام (عندهم الشخص الي يمشي على رجلية هو ملك الطريق ولازم توقف لة السيارات اذا قطع الطريق حتي لو كان مخالف وقطع الطريق من الاماكن الغير مخصصة لعبور المشاة. مهوب زينا في الرياض الله يخلف علينا اذا وقفت سيارتك عشان تخلي واحد يقطع الطريق نزل عليك صاحب السيارة الي وراك وصفقك).

وصلت مطعم مكدونالدز . يوم مسكت سرى مع الناس عشان اطلب لقيت ان الفطور همبرقر بيض و بطاطس مبشور ومقلي. طبعاً الفطور كان غريب بس ما عاق وكلته ولا تركت منه شي. الاكل كان بحوالي (3) دولار.

يوم خلصت من الاكل رجعت مشي للفندق ، ونا ماشي في الطريق للفندق لعب بي البرد(انا غلطتي اني ما جبت معي الفروة السورية) وقلت اوقف احد التكاسي الي كانت تمر ، شفت لي كم تكسي وحاولت اوقفهم عشان يوصلوني بس ما وقفو وكانو يناضروني بنضرة غريبة الله لا يوفقهم ، وصلت للفندق و رحت لموظف الاستقبال وسألتة عن السبب في ان التكاسي ما توقف اذا اشرت لها فقال انه ممنوع توقف لاي شخص في الطريق وانة اذا بغيت تكسي لازم اتصل عليهم وهم يجوني وين ما كنت.

خليت موظف الاستقبال في الفندق يتصل على شركة التكاسي ، وخلال (3) دقايق كان التكسي عندي. طلبت من سواق التكسي (سواق التكسي المرة هذي كان افريقي) يوديني لم محل استاجار منة سيارة. اخذني السواق الي محل هيرتز لتاجير (Hertz Rent a Car) السيارات وخذت لي قراند ام (Grandam) وكانت مجهزة بفرامل اي بس اس (ABS) وحرصت على ان السيارة تكون مجهزة بالفرامل هذي عشان السيارة ما تزحلق اذا فرملت في الثلج ، اخذت السيارة بسعر (45) دولار في اليوم شامل التامين (طبعاً كنت ماخذ معي من السعودية رخصة دولية ، وكانت ايضاً رخصتي السعودية مترجمة من الخلف للغة الانجليزية) ، وشريت ايضاً من محل التاجير خريطة لشوارع فانكوفير بثلاثة دولار.

بديت الف الشوارع والاحيى القريبة من الفندق ، ونا قاعد الف بدا الثلج ينزل وينزل وصار الثلج كثيف وخفت من كثر الثلج ، فقررت ارجع للفندق. الثلج استمر ينزل طول اليوم وطول الليل ، ونا مغير صاك على نفسي في غرفتي.

اصبحت ثاني يوم ولا نزول الثلج قد وقف ، بس كانت الشوارع كلها مغطية بطبقة بيضا من الثلج والسيارات الي في الشوارع قليلة جداً. قال لي موظف الاستقبال في الفندق ان الثلج الي نزل على المدينة كان الاسوا من سنين طويلة، وانهم في المدينة اعلنو اليوم وبكرة اجازة.

انا ما كان عندي نية اني اقعد في الفندق حتي لو كان الثلج كثيف في الشوارع ، سألت موظف الاستقبال عن الاماكن السياحية في المدينة فعطاني مجموعة كبيرة من البروشورات.

اول محل رحت لة كان وسط المدينة وبالذات شارع روبنسون السياحي (Robson St) ، الشارع هذا كان كلة محلات ومطاعم وصرافين عملة ، بس الموت ان كل مواقف السيارات في الشارع هذا وفي وسط المدينة بالكامل كانت بفلوس (طبعاً ما اكتشفت الشى هذا الا بعد ما اخذت مخالفة بقيمة 20 دولار) ، وقفت السيارة (سعر مواقف السيارات كانت بحدود 3 دولار في الساعة) وبديت اتمشي في الشارع كانت اغلب المحلات ماركات عالمية مشهورة و غالية. و مطاعم من كل شكل ونوع (ياباني ، صيني ، ايطالى ، امريكي ، كندي ، هندي ..... تعبت وجعت ونا اكتب انواع المطاعم)