أخواتي السلام عليكم انا اسفة اني مادخل النمنتدى الا ومشكلتي معايا واعذروني لتقصيري مقدر ادخل لكثرة انشغالي..
انا اليوم جاية بمشكلة ومصدومة من اللي حصل قبل لحظات..
اليكم قصتي .. انا من يوم ماجيت بعثة واشياء كتيرة اكتشفتها في اهلي وزوجي كنت ملاحظتها قبل وانا في السعودية لكن هنا بزيادة انا امي واخوي جايين معايا عشان اخوي يدرس وانا مع زوجي المهم ساكنين في شقة واحدة غرفتين وحمامين ماعلينا المهم اخوي يفهم تصرفات زوجي انها مقصودة ومتعمدة يعني مثلا انو سوا له الايميل بالشكل الفلاني وماوضح له اي شرطة في الايميل وانو انحرج مع اصحابه او مثلا اذا قال شي زوجي بصوت عالي اخوي يفهمه انو دقه له وكذلك زوجي يفهم كل شي ضده اخوي مدلع مثلا لما يجيب الحليب يقفله بالكيس انو هو يبغا يخلصه بس زوجي يزعل طب فهمنا عيب او مثلا لما يشتري اغراض كثيرة للبيت ويبغالها تحميل اخوي يكون نايم يزعل ليش مانصحيه يجي يشيل معاه المهم اشياء تافهة لاهذا طايق هذا ولاهذا طايق هذا وامي كذلك مو طايقة زوجي كل ماسوى شي ماعجبها تأففت ياربي اش اقول واش اخلي تعبانة تعبانة وكل مين فيه يجي يسب عندي في التاني وانا ادافع هنا وهنا لما خلصت دراسة شهرين كان زوجي مو موجود مسافر المهم قلت باقسم الكتب بين زوجي واخوي عشان يستفيدو من اللي درستو وموضحتو زوجي يوم رجع قلي فين كتبك قلتله هدي قسمتها بينك وبين اخوي قسمة عدل زعل وضرب بوز لليوم التاني ودحين جا يقلي من حسن التبعل تعطيني هيا انا زوجك ولاهو؟ قلتله ع تفاهة تدقق المهم مدري اش قلت قلي صغارة عقل قلتله هذي صغارة عقل وانت هذي تفاهة ومسويها مشكلة موصغارة عقل قلب الطاولة عليا قيدو مروشني قبلها بالكلام..
يقلي سوي الغداء ادام في قدر كبير وحمي منو لما تجين من الدراسة سويت اللي قال لسا اول يوم تعشا منو وتغدا اليوم التاني ويتنقور انا ماحبو بالدجاج ومالح احسن باللحم مع انو سبق وقلي لو تسوين الادام بالدجاج تغيير مو كل يوم الواحد ياكل لحم ااااااااااااه يارب صبرني قبل شوي قلي حلي الواجب ع كومة الشغل اللي فوق راسي غسيل واجبات ليا ترقيد الولد قلتلو ماحسوي عشاء قلي طيب خلاص مني جيعان مجرد انهيت واجبي وسالتو عن واجبو قلي سوي شي خفيف مني قادر باكل وبنام دخلتو المطبخ معايا تقريبا قام بمهمة الطبخ بحكم انو يشوف نفسه افضل مني في الطبخ واني اطبخ بدون نفس مع اني والله بكسر الهاء مسوية مجهودي باللي اقدر عليه ايدامات ووو المهم دوبو لما اكل وشبع يقلي انتي من زمان ماتحطين مكياج طب اعترف لاني اخرج بره وكاشفة وجهي فما احط لما ارجع البت مرهقة وتعبانة يادوب من اكل لغسيل لولد لواجبات لزوج ويقلي انت ماتعرفين تنظمين وقتك يارب رحمتك هادا كلو مين يسويه؟؟؟ من فين اجيب التنظيم؟؟مافي مساعدة؟؟ البيت مو مرتب مع انو هو بنفسه حواس يرمي المنديل في مكانه الكاسة مايشيلها في مكانها .. هدا يوميات وانا اشيل كل يوم من بعده وارتب وقصده بمو مرتب عشان عربية الولد هنا شنطة هنا حوسته كتب لاب توب يعني مكان غير مريح للنظر فوضى..
يقلي ماقد فاجأتيني بحلى قهوة شي زي كدا طب انا جاية هنا لاقية وقت لهذا كلو ولا يقلي شدي حيلك في الدراسة واللغة عشان نقدم لك ع هدي الجامعة(للمعلومية شروطها صعبة التوفل سبعمية غير الجي ار والزحمة هدي) اقلو هادي يبغالها واحد فاضي متفرغ ماقدر لها يقلي انت متشائمة..غيرك عندو تنين تلاتة ماشين في حياتهم المهم لما جا اخر مرة من السفر يقلي اتوقعت حاطة مكياج ومتزينة وشعرك مرتبتو ويوصفو كني جنية قدامه قلتلو حاطة بس خفيف ولابسة قميص حلو ومسويتلو هديك الكبسة بس ولدي صعب اتحكم في نومه عشان ينام تعشا غسل يده ودخل ينام يقلي ايوا اتذكر سديتي نفسي صح سويتي العشاء جزاك الله خير بس الولد لسا مانام كان المفروض يكون نايم في الغرفة وتتجهزين لي وهو والله حتى العشاء ماكمله الباقي رميتو حتى حزت في نفسي وقتها انو ماناداني مع اني كنت مستعدة له ومجهزة نفسي بس قال بدخل انام لانو رحلتو كانت طويلة قلت يمكن تعبان..وبكيت ودموعي مو راضية توقف يقلي ع ايش البكاء ان سالتيني اش بك زعلان ماقلت لك وهدي الاشياء اللي تزعلني قلتله قول بس كلمة ورد غطاها مو بالكلام الجارح هادا انت لو شفت شي فيك ماقلت وشايف نفسو كامل ومو مقصر بس حتى انا عندي ملاحظات عليه بس استحي اقله او اجرح شعوره!!! المهم جدل جدل وجلس يصرخ انا اوريك كيف تمشين بالامر سوي كدا حطي كدا ويضرب في الارض..
اقلكم ودموعي مو راضية توقف كلامي ماحقدر اخلصو وبكرة مني رايحة المعهد مني قادرة اطلع واشوف الناس اللي اكتشفتو في زوجي مع الايام انو مزاجي كل ماسوي شي مايعجبه يطلع بشي لازم اللوم والخطا والتقصير مني اذا فيه حيل للنقورة يدور ع الشي ويتنقور عليه كل شي يحطه في الطاعة وانا الجال وانتي زوجتي وتسوين وتسوين..
كتبت لكم قصتي بالمختصر لعلي اجد من مرت بتجربتي وتفيدني ورجاء اذا في اخوات عندهم نية يهزئوني رجاء مابغى ينسم بدني اكثر ماهو مسموم..
مازلت وحيدة @mazlt_ohyd
عضوة جديدة
يلزم عليك تسجيل الدخول أولًا لكتابة تعليق.
الصفحة الأخيرة
هدي وروقي
ادعي ربتس هو اللي بيده كل شيء