اشك ان بنت معينة اعطتني عين، انصحوني

السلام عليكم عضوات منتدى عالم حواء،

هذا المنتدى دائما اشوف فيه مشاركات و تفاعل، و فيه كثير هنا اكبر مني و شافوا اشياء كثير في الحياة و عندهم خبرة تفوق خبرتي بكثير، فجيت اطلب نصيحة.
و بقول سالفة قبلها ممكن تكون طويلة فأطلب صبركم علي.
انا طالبة جامعية ببداية العشرين، من اخر اسابيع في الثانوية الى الان و انا عندي مشاكل في التركيز، الدراسة،الصلاة،فقدان شهية، نحف، و مشاكل صحية من فترة لفترة.
مشاكل كثيرة لمدة سنتين اعتبرت بعضها لأسباب نفسية مثل الاكتئاب، و الجسدية كنت ارجعها الى اسلوب حياتي و اكلي و كل ما حليت مشكلة تطلع ثانية.
بسبب هذي المشاكل ما قدرت اذاكر لاختبار التحصيلي و ما انقبلت في الجامعة، و هالشيء كان صدمة لكثير بالأخص اهلي لأني من الشطار و المجتهدين.
لمدة سنتين ضغطت على نفسي اذاكر مع قلة تركيزي و احساس الاستفراغ و الدوخة اللي يجيني اول ما افتح الكتاب و عدت الاختبار و الحمدلله انقبلت بالجامعة بتخصص قوي.
لكن للاسف الشديد، صحيح انها قلت و خفت لكن الى الان اعاني من التركيز و المشاكل الصحية، مشت حياتي الى الآن الين ما صار موقف خلاني اشك بسبب هذي المشاكل.
انا اروح و اجي للجامعة مع باص معين و هذا الترم الصيفي صادف ان فيه بنت معي بالباص وقت دوامها نفس دوامي، لما اطلع للجامعة و لما ارجع.
هذي البنت كنت ادرس معها في الثانوي و كانت اخر مره شفتها بعد التخرج و بعده ما تواصلت معها نهائي.
الشيء اللي صار ان البنت من اول ما تركب الباص الين ما تطلع اكون في حالة توتر و عدم راحة غريبة حتى انا استغربت من نفسي، طوال الوقت احسها تراقبني و عينها علي طوول الوقت و اكون متأكدة انها لافة راسها جهتي تناظرنيي لكن لما الف عليها القاها على جوالها! احساس مرعب، نبضي و نفسي يصيرون غير منتظمين و ما اقدر اجلس كويس، اصير ودي اهرب و ابعد عنها. لدرجة يوم من الايام وقفنا عند بيتهم و ركبت لكن ما جاتني هذي الاحاسيس و كنت مرتاحة و وضعي طبيعي، لكن بعد ما تكلمت استوعبت انها جارتهم مو هي.
زي ما اغلبكم فهم مقصدي، اشك و الله اعلم ان البنت اعطتني عين.
و اللي زاد شكي هي المواقف اللي صارت بيننا بالثانوي اللي تذكرتها فجأة بعد الحالة هذي، و المواقف هذي صارت بالضبط بعدها كل المشاكل اللي عندي.
زي ما قلت انا كنت معروفة من الشطار و دايم درجاتي ممتازة، و هذي البنت لنفترض اسمها "سارا" مقعدها امام، و اي يوم اكون فيه بقمة نشاطي و انمدح من اي معلمة يوضح على سارا انها تتضايق و تصير تتجنبني و تتعامل معاي ببرود.
و احيانا تنافسني، حرفيا بمجرد ما معلمة تمدحني تجلس تشارك كثير الين ما تنمدح هي بعد، حرفيا حاطة دوبها دوبي، لان فيه كثير شطار غيري لكن تصرفاتها هذي ما تطلع الا معاي.
و مره اخذت معي كتاب التحصيلي و كنت اذاكر بحصص الفراغ و جات تسالني عن مذاكرتي و التخصص اللي ابيه و من هالكلام و كان فيه زميلة معنا بالفصل تشاركني نفس الطموح و تكلمت معها قدام البنات مره عن التخصص، حرفيا بعدها بكم يوم سمعتها تستهزء فيني عند الزميلة هذي و تحاول تقلل مني غصب، كانت بحالة ما اقدر اوصفها، كانت معصبة و تحرك يدها بشكل غريب و ضربت كتابها بالطاولة من العصبية.
سارا حرفيا كانت "منافقة"، كانت تدعي لي من قدامي و تسولف معاي و من وراي تسبني و تستهزء فيني.
و تتكرر مواقف مثل هذي، كل ما فتحت كتاب او جلست اذاكر، تتغير ملامحها و تتضايق، كل ما جاوبت في حصة تصير تجاوب كثير، كل ما معلمة مدحتني تحاول غصب تدخل في عين المعلمة.
الشيء المخيف هي حقيقة ان بعد الموقف اللي سبتني فيه عند زميلتي بالضبط فجأة بدت هذي المشاكل، جاني فتوور رهيب ما قدرت اذاكر لا تحصيلي ولا اختبارات المدرسة، تخرجت و ما انقبلت بالجامعة و قعدت سنة في حالة مزرية لدرجة شكيت ان عندي اكتئاب، نحففت ما عاد قدرت اكل و لا اذاكر و لا اي شيء، امراض ورا امراض، و ما بديت اصحصح على نفسي الا نهاية السنة، و جلست سنة ثانية بعدها احاول اهتم بنفسي و خفت المشاكل لكن ما انتهت.
طول هالفترة كنت اعتقد سبب المشاكل انا نفسي، اسلوب حياتي او نفسيتي، الين ما حسيت بهذيك المشاعر الغريبة لما تكون سارا موجودة، فجاة رجعت لي ذاكرتي عن ايام الثانوي.
سؤالي هو، هل ممكن فعلا توتري و الحالة اللي اصير فيها بسبب عين او حسد منها؟ او اني ابالغ و ربطت شخصيتها السيئة بوضعي بشكل غير منطقي؟
صار لي فترة اداوم معها و طوال الوقت نفس الاحساس يتكرر، التوتر و احساس المراقبة و غيره.
ابغى رايكم بوضعي و نصحكم لايش اسوي، اذا وحدة مرت بموقف مشابه و قدرت تتعامل معاه يا ليت تفيدني.
و شكرا.