اشياء جميله في حياتي و حياتك ......شاركينا

بسم الله الرحمن الرحيم

سلااااااااامي لاحلى عضوات في احلى منتدى

من زمان هالموضوع في بالي انزله بس انتم الله يهديكم سبب تسويفي في تنزيله خخخ


تدرون ليش لاني كل مادخلت المنتدى بنية انزل الموضوع تنسوني ليش دخلت وانسجم مع سواليفكم وانسى ليش دخلت سواليفكم ونااااااسه وي فديتكم وحده وحده

كني نسيت وش موضوعي

ايه موضوعي كل وحده تقول لنا اشياء جميله وحلوه تحسسها بالسعاده لوجودها في حياتها حتى لوكانت اشياء صغيره

بس لاتجي وحده تقول زوجي عيالي امي ابوي والعائله الكريمه فديتهم الله يخليهم لنا

يعني اشياء خاصه فيك شي تحبينه واللي مصره تذكر العائله الكريمه تختار واحد منهم بس ياعيالك يازوجك وهلم جرا هههه ام النذاله

طيب بما اني نزلت الموضوع ببتدي انا عشان تفهمون علي وممنوع وحده تدخل ماتجاوب ولا في عقاب ينتظرها

من الاشياء الجميله في حياتي وكل ماتذكرته احمد الله عليه اني من بلاد الحرمين واني على سنة رسول الله عليه الصلاه والسلام اكبر نعمه في حياتي ياربي لك الحمد

اصلي اصوم ماااحد يضايقني يمنعني لاني من بلد تطبق الشريعه الاسلاميه والحمد لله

البس حجابي مااخاف اخرج فيه مثل بعض الدول ولله الحمد او احد يتعرض لي او يستهزئ فيه

\ من الاشياء الجميله في حياتي اني من بلد رسول الله عليه الصلاة والسلام المدينه اللتي لايدخلها الدجال

احب مدينتي واعشقها
من الاشياء الجميله في حياتي قناتي الحبيبه و اللتي غيرت الكثير في حياتي
انها قناه المجد الحبيبه قناه ترتقي بالفكر تحترم المشاهد ولمن لايعلم قناه فيها الكثير من مفيد برامج تطوير الذات
قناه غنيه بكل ماهو مفيد والله اني استغرب من من يشتكي من قنوات الفضائيه الاخرى طيب اذا الان صار فيه بديل لها ليش ماتغيرونها اشوف البعض تقول لو فيها برامج ماهي هادفه وهدامه فيها مقابلها برامج حلوه طيب عشان واحد او نقول عشره في الميه تضحين بوجود الباقي الهدام في بيتك

امم كني شطحت

ايضا من الاشياء الجميله في حياتي وربي هداني لها هو هذا المنتدى منتدى عالم حواء
فيه سحر هالمنتدى الناس تصدع اذا ماشربت قهوه وانا اذا طولت مادخلت عالم حواء هههه
من جد هالمنتدى غير مجرى حياتي هنا نلاقي اخوات من الصعب التقي فيهم في الواقع من حكمه ودين وعقل وفزعه
تصدقون انا استمتع بقراءة ردود العضوات مثل الموضوع بسم الله عليهن وحواليهن ههههه يونسن صراحه حتى وهن يصلن لمرحلة المطاقق واحيانا مسك الشوش ياحليلهن مؤدبات

من الاشياء اللي احبها واستمتع فيها في حياتي مجلتي المفضله واصلا تركت كل المجلات من بعدها
اذا شريتها او احد ارسلها علي احس اني عندي كننننننننننز متى اخلص كل شي من يدي واجلس استمتع فيها احيانا اهدد فيها سلفتي وتشتغل النذاله معي لحد مااعطيها هي طبعا ماتستلمها الا بعد الشاهي والقهوه اللي تسويها لي
حتى بنتي تاخذها بعدي تدور سواليف نوير ومقالب المدرسه
مواضيعها حساسه حلوه مضحكه اجتماعيه كل شي يهمنا تبون تعرفون مجلة ايش

مجلة حيااااااااااااة ماتندمون عليها ابدا

تعبت من الهذره جا دوركم

شاركوني باشياء جميله في حياتكم