اصبر واسكت واستسلم ولا احاول اغيره من نفسي (زوجي المعقد)

السلام عليكن ورحمه الله وبركاته :،





بنات تكفون ابيكم تهونون علي وتصبروني انا زوجي انسان متشدد جدا وصرت احس انه انسان معقد ومريض من تصرفاته الغريبه من تزوجته لي ثلاث سنين وانا احس نفسي مكبوته مكبووته طفشت ورربي خلااص مانعني من كل الاشياء اللي انا احبها واستانس فيها صحباتي من تزوجت منعني اني ازورهم ولا اتواصل معاهم ولا يبيني اتواصل مع جيران واتعرف عليهم ولا على حريم اصحابه مع انو اكثر من مره طلبو اصحابه هالشي بس هو يتعذر كل مره بشي ،الزواجات ما اروح الا للقرايب الي مره اخ اخت بنت عم بنت خال زي كذا غيره لا ،صحباتي تزوجوو ولا حضرت زواجاتهم وخلفوا ولا شفت عيالهم ، المولات والاسواق ما اروحها ولا اشوفها الا في الاعياد لمن ابي اقضي وانا احب المولات واحب التسوق وكذا يكره المولات مايبي ريحتها ، حاولت معه يوديني الاسواق النسائيه او المخيمات ورفض يقول انا اخااف علييك والزمن هذا يخوف ومن ذا الكلام هو صح كلامه ومقدره خوفه وحرصه بس مو بالشكل ذا مسستتحييل كذا هو ماراح يخاف علي كثر ما اخاف على نفسي واحرص عليها وبعدين انا مو طفله واعرف مصلحه نفسي واعرف اخارج نفسي ،
حتى سطل الزباله اعزكم الله مانعني اخرجه عند الباب يقول رجولك ماتعتب برا البيت وتقعد الزباله تخمج الين يجي من برا ويخرجها ، والله بطق يابنات انا انسانه اجتماعيه واحب الناس واحب الخرجات والطلعات وكنت اطلع مع اهلي قبل اتزوج واروح واجي وانبسط بس بالحد المعقول طبعا ، وزوجي حاكرني بذا البيت ماغير يوديني عند اهله وعند امي اخر الاسبوع تخيلوا كل اسبوع على ذا الحاله الخميس عند اهله والجمعه عند اهلي وانا ربي. ماسخر لي بنات خالات ولا بنات عمات اتواصل معاهم ونتزاور واللحمدالله على كل حال وبس نفس الروتين زهقت وربي ولا تقولون ما حاولت معه الا حاولت وبشتى الطرق مافي فايده ..







مججردد فضفضه لاني طقيت واحس ابي اتكلم والمشكله كل ماقلت لامي قالت لي اصبري هذا طبعه وطبع اهله كذا بعد وماراح يتغيير

شوروا علي هل في احد مثلي زوجها وتغير او قدرت تغيره وكيف !!!!



وعلى فكره هو نمطه في الشخصيه شمالي شرقي و من اصعب الانماط