اصنفها ضمن دائرة الغير معقول!

من ضمن الاشياء اللي فعليا اعجز استوعبها واعتبرها شيء مؤسف حقيقة،، لما اشوف شخص كبير في العمر خصوصا اذا كان أم او أب وتحته رعية مسؤؤل عنها وتصرفاته تفتقد للنضج والحكمة تماما
سؤال يخلق نفسه :
معقول مامرت عليه دروس في الحياة ؟


شخص عدى مرحلة المراهقة عدى مرحلة الطيش وبداية الشباب المفروض و الطبيعي يكون وصل لمرحلة النضج و الرشد
لكن وبكل اسف مايكبر فيه غير عمره...
بينما عقله عالق في مرحلة عمرية مبتدئة.

تُقبل بعض الأخطاء والتصرفات لما تكون صادرة من شخص مراهق و صغير في العمر
و نرجعها للتغييرات اللي تكون غالبا في مثل هالعمر وللطيش والاندفاعية اللي تتسم بها هذي المرحلة .

لكن شخص بلغ عمر النضج وقارب الثلاثين والاربعين وتلاقيه
اندفاعي مايعرف يحتوي الموقف ،
مايعدي غلطة مايتجاوز عن خطأ ، ماعنده تحكم في اعصابه، لازال غير ناضج في تعامله مع الناس ،نتن في اقواله وتصرفاته .مايتعفف عن بعض التصرفات اللي من الخطأ تظهر من شخص واعي وراشد سيء ظن بالاخرين لا اهداف لا انجازات لا شيء يعزز فيه قيمته كـإنسان .


وش فايدة العمر اللي يمشي اذا مازال العقل ثابت محله اتسائل بشكل حقيقي.
وش قيمة المصاعب اللي مرينا فيها وتخطيناها طالما ما احدثت داخلنا اي تغيير؟ لا هذبت عقل ولا انضجت فكر !
ماهو تساؤل ولا تنبيه ولانصيحة مجرد اندهشات وتعجبات فكرية تدور في ذهني حقيقةً
هل من المعقول ان الإنسان قد يتعرض لكثير من الاحداث والتجارب ويخرج مجرد من الفائدة ولاتظهر عليه اي معالم تغيير وتأثير؟ شيء مرعب لو كان حقيقة.
الشراكة الزوجية تحمل المسؤلية ،الأموووومة تربية طفل هذي المسؤؤلية الطبيعي انها تخلق داخلنا الصبر سعة البال قوة التحمل ،الاحساس بالمسؤؤلية


المواقف اللي يمر فيها الإنسان ويتعرض لها من مرض قريب موت عزيز ،مواقف تمر بحياة الانسان ويوقف على أحداثها او يكون العنصر الاساسي فيها ،مواقف واحداث مختلللفة متنوعة
هل من المعقول انها قد تمر على الإنسان ولا تغير فيه جزء بسيط من اخلاقه وتفكيره وشخصيته!
لو فعلا ممكن فـ مااعتقد فيه فشل يماثل مثل هذا الفشل

فشل الإنسان من تعلمه من كل الاحداث والمواقف اللي يمر فيها.إخفاق هائل .
شفت نموذجين واقعيا خلقت داخلي مثل هــالتساؤلات .

كيف من الممكن ان الإنسان قد يكبر بالعمر لكن بدون اي معالم تؤكد ان هالإنسان وصل لهالعمر عدا مظهره الخارجي وعمره المثبت في الهوية فقط .