السلام عليكم يابنات...يارب تكون الايام المباركة دي خير وسعادة لنا جميعا ان شاء الله...امانة تدعوالي بظهر الغيب...هقدملكم اليوم مجموعة اطباق والله والله انها تحففففة وسهلة جدا ومضمونة ومشرفه في العزومات او حتى لك انت وزوجك بس...متنوعة بين الايطالي والتركي والصيني..وان شاء الله تكون بحاجات متوفرة في اغلب البيوت مع اختلافات بسيطة...رغيت كتير ندخل على اول وصفة...(بصو ياجماعه انا اسمي هبة عشان بس لو لقيتو صورة كده مكتوب عليها اسمي لاني بنزلهم عالفيس بوك اوك ياحلوين؟؟)
كفتة حسن باشا...تركي
المقادير:
..لحم مفروم مخلوط معاه بقسماط وبصل ومعلقة زبادي وملح وبهارات ...ويكور زي اقراص البرجر الصغيرة
**بطاطس مسلوقة ومهروسة ومخلوطة بلبن وزبدة وبقدونس وفلفل احمر لو موجود...وطبعا ملح وفلفل
**صلصة طماطم متسبكة وطبعا عليها بهارات وملح وتوم مفروم وتتخفف بشوية مرق دجاج او مية خفيف....تترص في صينية بايركس الصلصة تحت في الصينية وفوقها اقراص الكفتة وعليها كور البطاطس...طعمها خطييييييييير
قبل النضج
وهنا في التقديم مع رز ابيض وعليه جزر مبشور...انا حابة التصوير اليومين دول فهتلاقوني هرياكو صور بقى
**************************************************
ستيك مشوي ولا تقولولي كارينوز ولا سبكترا
استخدمت بفتيك متبل بتتبيلته العادية(بصل ولمون وملح وبهارات مشكلة)
على نار حامية اوي حمرته من الوشين وبعدين زودت عالطاسة نص كوب مياه عشان يستوي وغطيت عليه لجد مالمياة نشفت واستوى الحمد لله حطيت جبنة شيدر سلايس على كل ستيك وغطيت تاني وبعدين فحماية صغننه في نص الطاسة وعليها حتة زبدة واغطي تااااااااااااني وبس خمس دقايق وتفتحي ودوقي الطعم اللي من الخيال بقى :pinklove2
**المكرونة الظريفة دي مسلوقة وبعدين بصلة مفرومة مع طمطم وشوية زيت وبهارات وعالنار لحد ماتتسبك تحطيها عالمكرونة وجبنة بارميزان او رومي مبشورة وشرايح سلامي او ممكن هوت دوج متقطعه طبعا تقليهم في زيت بسيط خالص الاول وفلفل اخضر...
والسلطة روسي
سلطة روسي....RUSSIAN SALAD
وبرضه احلى من اي سلطة من اللي بتتعمل في مطاعم الFAST FOOD .....بجد
المقادير:**بطاطساية وجزرة متقطعين مكعبات وبسلة ومسلوقين من غير ملح...مياة بس
الدريسنج
**معلقة مايونيز كبيرة+معلقة زبادي كبيرة+فص توم كبير مفروم او بودرة توم+عصير نص لمونة صغيرة+ملح وفلفل اسود ويتخلطو مع بعض ويتحطو عالخضار بس يكون الخضار بارد مش سخن...وتترك في الثلاجة ...حكيكي ياولاد طعمها يجنن
*******************************************************************************************
مكرونة بالجمبري والسبيط..بطعم CHINESE.ممكن تضيفي جندوفلي كمان يكون حلو جدا...
**المقادير:
مكرونة النوع المفضل يفضل اسباجيتي او فيتوتشيني(350 جم الكيس)
ربع جمبري وسط
وربع سبيط(كالماري)متقطع طبعا
ثوم مفروم او بودر حوالي 3 فصوص كبار...بصلة كبيرة شرايح-3فلفل اخضر شرايح-جزرة مبشورة-ملح وبهارات وخصوصا الكاري بودر بيدي طعم غير-
معلقتين طعام صويا صوص-كوب لبن عليه ملعقة طعام دقيق(طحين)
فلفلة حمرة للتزيين وجبن مبشور(اختياري)
الطريقة:
نتبل الجمبري والسبيط بالتوم والملح والبهارات بتاعتنا وعصرة لمون ممكن
في مقلاة تيفال نشوح البصل في قليل زيت ثم نضيف الفلفل الاخضر والجزر وننزل بالجمبري والسبيط واي فواكه بحر اخرى حابين نضيفها ثم الصويا صوص...ونغطي عليهم ربع ساعه مع التقليب واضافة الكاري بودر طبعا....في الربع ساعه نسلق المكرونة ونصفيها ونحطها في طبق التقديم...
*عند نضج فواكه البحر وتكون الماي اللي نزل منه نشف نضيف اللبن المخلوط بالدقيق...وخمس دقايق كبه ياخد من نكهة بعض ونطفي ونضيفها عالمكرونة وفوقها الفلفل الاحمر ورشة جبنة بارميزان لو حابين.......وبالهنا
*******************************************************
chicken with special beef...special cheese yummmy
دجاج بالللحوم الجاهزة ومزيج الجبن اللذيذ
**دجاج باتيه متبل ومقلي بطريقته العادية
**لحوم(سلامي-روزبيف مدخن-بسطرمة-قطع سجق شرقي)
مزيج من جبن متنوعة(موزاريللا-جبنة كريمي-جبنة تلاجة ممكن-جبن ركفور-جبن شيدر)
في صينية يوضع رشة مياة على الصينية حتى تعطي رطوبة للدجاج ولايجف
توضع قطع البانيه ونوزع اللحوم المدخنة على كل قطعه ثم مزيج الجبن بعد خلطه جيدا
عالفرن حتى تذوب الجبنة وتغطي الدجاج واللحوم....طعمها وهمي...مع مكرونة وبطاطس بيوريه غدوة سريعه وحلوة ومش شرط كل اللحوم ومش شرط كل الجبن ابدعي فيها انتي
**************************
البيكاتا بالمشروم
المقادير لحمة ستيك على عدد الافراد...كريمة جهينة للحلويات..(مبتكنش مسكرة ولا حاجة).او كريمة لباني حسب المتاح ...مشروم شرايح معلب او طازة يكون احسن-فصين توم ملح وفلفل وبس
الطريقة:اللحمة تتبل عادي بملح وبهارات وممكن عصرة ليمون وبودرة بصل ....وبعدين تتساب في تتبيلتها مش اقل من ساعتين-وبعد كده تتحط في دقيق من الناحيتين وعلى الزيت الحامي جدا عشان تاخد لون وتتشال...بعد كده نشوح المش...
روم مع رشة الفلفل الاسود وفصين التوم ...ونحط اللحمة عليهم وشوية مياه صغيرين لحد ماللحمة تستوي خالص والمياة تنشف والكريمة تتحط في الاخر.وبعدين 3 دقايق كله يغلي مع بعض وتطفي ..لاحظو ان الصوص هيتقل من الدقيق اللي حطينا فيه اللحمة وهيكون قوام الصوص مظبوط ان شاء الله...لو لقيتي الصوص سايل اوي حطي شوية دقيق متقلبين مع معلقتين لبن وعلى البيكاتا عشان تتقل شوية...وتتقدم مع رز ابيض وخضار سوتيه
اخيرا يااااااااااااارب يكونو عجبوكم وتجربوهم لانهم حلوين فعلا وممتازين كتغيير عن الاطباق العادية واهم حاجة الدعاااااااااااااااااااااء بالله عليكم
الله يعطيكِ العافية