أولا اتمنى من المشرفات ما ينقلون موضوعي لقسم الاطفال.. لان نااااااادر اذا احد يقرا الموضوع هناك او يدخل قسم الاطفال ..
نبداعلى بركة الله.. امس قريت في المنتدى موضوع جدا رائع وهو ذكرياتنا ايام الطفوله ...
واغلبنا عاش اياااااااااااااااام حلوه كل ماتذكرها رجعت له السعاده .... كلنا نتمنى هذيك الايام ترجع ...
بعد ما قريت الموضوع .. قلت فكره حلوه اسولف فيها مع عائلتي الصغيره ..
خصوصا بنتي الكبيره باول ابتدائي تحب الذكريااااات ...
سولفت لها يوم كنا نلعب حريم .. ويوم كنا نلعب كوره وامثل اني كابتن ماجد .. وسولفت لها يوم كنا نلعب ملاهي ..
بعدين قلت لها كنا نلعب مدرسه .. قالت صدق انكم فاضين مانصدق نخلص من المدرسه تجون تلعبونها
بعدين جت سالتني سؤااااااال واحرجتني ...
قالت امكم كانت تخليكم تحوسون البيت ماتقولكم كل شوي رتبوا ... امكم تخليكم تلعبون مع الاولاد لحالكم ؟؟
ماعرفت ارد عليها .. لاني انا وبصراحه موظفه وماعندي شغاله ودايما ابغى البيت مرتب ...
مساكين جيل ذا الوقت كل شي ممنوووع ... وكله نخاف عليهم ..
ماغير قدام التلفزيووون والا على الايباد ..
والله اني حزنت عليها ... اقول انا ذكرياتي كلها حلوووووه .. هي ياعمري ايش تتذكر..
اذا قلت لهم روحوا العبوا تجي تقولي مااعررف العب.. عندها ججميع الالعاب ليقوو وباربي وعرايس بس يمكن لانها لحالها واختها صغيره...
لكني اذا شفت عيال جماعتنا ... اقول ان بنتي ارحم منهم ... مجتمعيين جمعه كبيره وكل الاطفال معهم ايباد والا ايبود ولا واحد يكلم الثاني ... نسبة غير بسيطه من الاطفال صار فيهم مشاكل نفسيه والا توحد .. والسبب الاهل مشغولين اما بوظايف او دراسه او بالبيت .. حتى ربات المنزل مايعطون اطفالهم وجه .. مشغوله بالتلفون والا على النت ...
اي تذكرت سالفه.. مره من المرات كانت عازمتني اعز صديقاتي وبنتها كبر بنتي .. وقالت لي تعالي وجيبي بنتك تلعب مع بنتي وجيبي معها ايباد ؟؟؟ قلت لها وشلون تلعب مع بنتك واجيب ايباد .. قالت لي اي كل وحده معها ايبادها ويلعبون مع بعض ؟؟ حتى ناخذ راحتنا ونسولف مايزعججونا ..
وبنتي الصغيره عمرها سنتين ماشاء الله تبارك الله مناشبتني على الايباد .. تدخل على الالعاب وتلعب وتركب وتدخل يوتيوب وتتفرج كرتون ... وماتتكلم ولا كلمه حتى ماما وبابا توها تقولهم :"(
انا ماابغى بناتي يصيرون مثل الجيل الجديد مايعرفون يركبون جمله على بعضها ... بنات بصف سادس واول متوسط ماسكين البلاك بيري ويضحكون لحالهم كنهم مجانين .. اسالها كيف حالك ماتعرف حتى ترد زين ...
يتكلمون ويسولفون بالنت والبلاك بيري لكن وقت الحقيقه مايعرفون حتى يردون السلام ... كل كلامهم طلاسم oh my god والا loool ..
المهم طولت عليكم انا كتبت الموضوع ,, حتى نتناقش كيف نقدر نشغل اوقات فراغ اطفالنا بعيد عن الالكترونيات .. وشلون اخليهم يحبون العاب اول مثل حريم والا سوق ولا خرابيط ..
بذكر لكم تجربتي ..
انا ادخل عيالي الروضه من يوم يكملون سنتين .. في الروضه اغلب وقتهم لعب والوان ويقصون لهم قصص.. ادري بتقولون بدري وحرام .. انا بالنسبه لي اشوف اني اوديهم الروضه احسن من اني اخليهم عند شغاله وبالروضه يتعلمووون واقل شي مايجلسون قدام التلفزيون والا على الايباد ..
بعد المدرسه ياكلون وجري على التلفزيون .. كانت اول بنتي تتفرج على نيكولودين قناااة فاشله تعلم الاطفال الغباء والتصرفات السخيفه خصوصا سبونج بوب ... وانا امنعها بس تعاند المهم اني حذفت كل القنوات من التلفزيون بس خليت القنوات التعليميه ..
هذا برنامج رائع حتى انا اشوفه اتعلم من امهم كيف تتصرف مع عيالها.. اسمه كايوو
وهذا برنامج حلوووو ,, يعلم كيف الطفل الكبير يهتم بالطفل الصغير ويتحمل اخطائه اسمه ماكس اند روبي
قناة ثانيه اسمها baby tv هذي القناة تصلح للاطفال الصغار تحت سن 4 سنوات .. البرنامج ما يتعدا 10 دقايق .. والصور المتحركه بطيئه جدااا حتى ما يتشتت انتباه الطفل .. بعكس طيور الجنه وكراميش انا صراحه ماعمري شغلتها في بيتي من اول ماشفتها وانا احس انها تجيب لي الصداع فكيف الاطفال..
وهذا برنامج حلوو للطفال الصغار تحت سن المدرسه
طبعا التلفزيون ساعه واحده باليوم ايام المدارس .. بعدين ترسم والا تسوي عمل فني.. تلعب مع اختها ووانواع الازعاج .. قبل ما تنام لازم تقرا قصه.. كنت اول اشتري لها قصص بس تقراهم مره او مرتين وتطفش منهم.. اشتريت لها كتاب اسمه قصص ما قبل النوم عباره عن 365 قصه كل قصه عباره عن صفحه وانبسطت فيه مره كل يوم تقرا قصه او قصتين..
اشتريت لها كتاب اسمه ذكرياتي في المدرسه ... مكتوب فيه من اعز اصحابك ومين معلماتك ومن هذا الكلام وكل يوم تكتب فيه شوي ... وكتاب ثاني اسمه شجرة العائله ,, بعض المواقف الي مرت عليك مع عائلتك .. اين سافرتي في الصيف بس حسيته كبير على بنتي
اشتريت كتاب اسمه تجارب علميه .. فيه تجارب كثيره كلها بسيطه وسهله اسويها انا معها مره بالشهر ودي اسووي اكثر بس اتعيجز
انا مسجلتها في نشاطات خارجيه غير نطاق المدرسه ...
هذا الي اذكره حاليا .. ياليت كل وحده تعطينا افكار حتى نخليهم ينشغلون باشياء مفيده او على على الاقل العاب خارج نطاق الاجهزه ...
وسلامتكم :)
تسلمييين يا الغلا موضوع قيم
والله يعيننا ع تربيتهم في هذا الزمن صعب مره مهما حاولتي مستحيل يعيشوا مثل طفولتنا
بس انتي حاولي وصريقتك حلوه فعلاُ ما لازم نخليهم يطولوا ع الأجهزه والله انها البلا والمصيبه وع قولتك ما يعرفوا يركبوا جملتين ع بعضها
ولا اوصيك أختي الله الله بالدعاااااااء لهم
اللهم اجعلني مقيم الصلاة ومن ذريتي ..ربناء وتقبل دعاء