اطلق من الكودو بكبره ...

السلام عليكم ورحمه الله وبركاته ...

كيفكم وش علومكم ...
.بصراحه فرحت يوم لقيت تفاعل من الاخوات يوم كتبت موضوعي امس (ميني سمبوسه)

فقلت يستاهلون اخواتي الشقرديات والسنعات اكتب لهم اكثر .......مالكم بالطويله ...ندخل بالموضوع الي هو الكودو ....
المقادير
كيلو صدور دجاج مخلي من العظم
فلفل بارد اخضر او ملون على ذوقك عدد من 4 حبات
بصل عدد 1 كبير و2 فص ثوم مدقوق
صويا صوص ربع كوب عياري ....( يا سلام عالدقه ) بس الصويا العاديه الي تجي زي غرشه المويه هي احلى نوعيه وتكون خفيفه ومالحه مافيها سكر وتلاقونها في الهايبر بنده
حبحر ( فلفل حار ) حسب الرغبه
ملعقه كبيره خردل ( ماسترد) وبرضو الملعقه عياريه ...
خل او عصير ليمون الي يجي ..اقل من ربع الكوب بشوي ..
ملعقه كبيره بس مو مليانه مررره من الكزبره الناشفه المطحونه
2 ملعقه كبيره من بهار اسناد الي بالمشاوي ( ترا هالبهار شي وطعمه خيال وانا استخدمه في كل تتبيلاتي تقريبا ) وهو موجود بالسوبر ماركت
طبعا زيت للحمس وقطعه صغيره زبده للطعم

اولا ..علشان يكون الدجاج لين مرررره وينضج بسرعه ..سواء في هالوصفه او اي وصفه ثانيه .اتبعي خطواتي التاليه
جيبي الصدر وحطيه بين ورق بلاستك واطرقيه بالمطرقه المخصصه بس مو تهرينه :024: يكفي طرق خفيف
بعد كذا نجي عند تقطيع الصدر ...تفحصيه وحددي اتجاه الالياف العضليه ( شكلها ماده تشريح ههه) لان الالياف هي الي تخلي الدجاج قاسي وخاصه لو كان كبير بالسن
بعد ماحددتي اتجاهها سمي بالله واقطعي بالسكين .بشكل عمودي زي الاكس من اول الصدر لاخره ويطلع عندك في النهايه شرائح او اصابع من الدجاج وقصي هالشرائح لو كانت طويله بالنص
اخلطي المكونات السابقه بالدجاج ما عدا البصل والفلفل والزيت والزبده وحطيه بالثلاجه كم ساعه ما تضر اهم شئ مغلفه زين وابرد مكان
قطعي الفلفل والبصل بنفس حجم الدجاج
مقلاه كبيره حطي الزيت 5 ملاعق تقريبا وقطعه الزبده الصغيره واظيفي البصل لين يذبل واظيفي الفلفل
ثمن الدجاج وقليه زين على نار عاليه علشان يتحمر ..

لزوم يكون عندك خبز الكودو وتحصلينه في التميمي والعثيم ...وهو زي الصامولي بس اطررررررى واطول وعليه سمسم

تفتحين الخبزه من النص وتدهنين جهه مايونيز والجهه المقبله جبن ساثل وبعدين تحشين بالدجاج ويا سلام لما تكون الحشوه فيها شوي مرق وتتشربها الخبزه تراااااه خطير ولذيذ جدا وكفايه انك تدرين مدى نظافته وصحته بلا مطاعم بلا هم :09:

والعذر والسموحه طولت عليكم بس حبيت افيدكم واوصل لكم المعلومات بدقه والتفصيل ..وترااها سريعه بالتحضير ...لا تغركم كثره الهذره حقتي هههه:42:

وسأل الله انه يوفقنا لما يحبه ويرضاه ...:26:
دعواتكم