كيف الحال ياحلوات ؟؟ ان شاء الله انكم طيبين جميعا انتم ومن تحبون...
نظرا لاختفاء الصور من موضوعي السابق وبناء على طلبكم المتزايد بان اشوف حل لاختفاء الصور
ما لقيت حل الا اني انزل الصور والطريقه مره ثانيه في موضوع جديد
كيكة الشوكولاته بحلى النحله
انا سويت كيكة شوكولاتة هند وهي فعلا راااااااائعه وهشه وسهله لكن تقدروا تسووا أي كيكه تبغوها............ومقادير هذي الكيكه
في الخلاط : كاسه سكر +كاسه زيت+كاسه ماء +4ملاعق حليب بودره +4ملاعق كاكاو بودره
تخلط بالخلاط جيدا ...وبعدين تشيلوا كاسه الاربع على جنب وتضيفي للخلاط فانيليا +2بيض وتخلطوا
تصبوا الخليط على كاسة دقيق +ملعقه بيكنج بودر وتخلطوا بخلاط الكيك وبعدين تصبوه في قالب مدور مدهون....وتدخلوه الفرن الين يستوي
بعد ماتبرد الكيكه نقسمها قسمين بالعرض وندهنها بالخلطه اللي شلناها اول من الخلاط بس بعد ما نضيف لها حوالي نص كاسه من قشطه الخفق عشان تكون ثقيله ونغطيها بالقسم الثاني من الكيكه ونتركها لغاية مانحضر الباقي
لتحضير كريمة التغليف : نخفق كاسه ونص من قشطة الخفق <الويبنغ كريم> مع نص كاسه سكر وشوي لون اخضر من ملون الطعام .....ونخفق الين تثقل
ندهن سطح الكيكه وجوانبها جيدا ونتأكد اننا غلفنا الكيكه تماما وساوينا السطح
نكون مجهزين حلى النحله وثلاث وردات دوار الشمس وأنا طبعا قبل مااحطهم على الكيكه غسلتهم مضبوط وجففتهم >>>الوردات طبعا
وطبعا انتوا عارفين مقادير حلى النحله لأني اصلا اخذته من المنتدى لكن بقولها للي موعارفه
واحد بسكوت شاي مطحون +نص علبه حليب مكثف +2 ملعقه زبدة فول سوداني +قشطه حسب الحاجه
تعجن المقادير مع بعض جيدا الى ان تتكون عجينه متماسكه لكن غير جافه
تشكل مثل نوى التمرلكن اكبر شوي ....نذوب 1 جالكسي في حمام مائي ونبداء نرسم خطوط على النحلات مثل خطوط النحله ونسوي عيون ...والاجنحه تكون لوز مبشور
ودبوس النحله شعيريه...ونتركها في الثلاجه شوي الين تتماسك الشوكولاته
نضع الورد على الكيك ونرص النحل من حوله وشوي فوقه ونضع عليه بشكل عشوائي
بعض حبات شوكولاتة مالتيزرز
لونت كريمة الكيكه باللون الاخضرعشان تكون كأنها عشب وعليها الورد والنحل يمتص الرحيق .. اتمنى تكون عجبتكم فكرتي بجمع حليين في حلى
وسامحوني لاني نسيت اصور بعض الخطوات ....
واستنوني بعد شوي بنزل الكيكه الثانيه
