اعتبرتهم مثل اهلى وشوفوا الهديه اللي قدموها لي..

بسم الله الرحمن الرحيم

اولاً اتمنى قبولي من بينكم انا من دولة الامارات وبالصدفه وحده من الصديقات دلتني لهذا المنتدى الراقي وأنا بقول لكم قصتي اللي صارت لي مؤخراً مع أهل زوجي ..
انا متزوجه من خمس سنين وعندي بنتين ربي يحفظهم لي ويحفظ لي ابوهم ان شاء الله وعايشه في بيت أهله في قسمي الخاص وكل شي ماشي تمام وعلاقتي بهم وايد طيبه خاصة امه لكن اخته الله يهديها هي سبب المشكله اللي صارت .. البنت عينها قويه وصحيح اني اتكلم معاها عادي بس هي المظاهر شاغله كل تفكيرها مع انه من الناحيه الماديه حالة اهلي الحمد لله أحسن بكثير من حالة أهلها وفوق هذا شايفه نفسها علي..

هذا من أربع شهور قالوا لي يا فلانه نبغيج اتدورين عروس حق ولدنا اللي هو حماي أخو ريلي وانا بحسن نيه ما خليت وحده من صديقاتي ما سألتها وكنت كل ما شفت وحده في صالون او مركز وتدخل مزاجي أروح لها وأسالها يمكن يصير النصيب بعد ....ومن فترة اسبوعين رحت لهم البيت بالصدفه عشان آخذ بنتي من عند جدتها عشان أحممها وأشوف اخت زوجي لابسه هذا اللبس الحلو وحاطه الميكب الصارخ وقاعده ترش لعمرها العطور بأشكالها وألوانها وأنا بالصدفها سألتها :انتي رايحه تزورين بنات عمك... قالت لي لا لا رايحه ازور اختي الكبيره صار لي فتره ما شفتها مع انها كانت عندها قبل 5 أيام تقريباً لا ونايمه عندها بعد.....

وعمتي المسكينه كل ما كانت بتبطل حلجها وتتكلم قاطعتها بنتها وقالت لها بسرعه راح نتأخر ........

بالصدفه عرفت من الشغاله انهم رايحين يخطبون بالسر وما يبغوني أعرف وهم طابخين السالفه من اسبوعين تقريباً طيب ليش تخبون عني أنا مرت ولدكم وعشرة عمر معاكم والله الغريب عرف وأنا وزوجي آخر من يعلم والله ان دموعي ما وقفت اتصل لي زوجي من مكان شغله وما قدرت أمسك نفسي من الصياح وزوجي سوا مشكله في البيت وانا أحب عمتي واعتبرها مثل امي بس مادري شو معنى هذي الحركه اللي سووها والله اني متضايقه عطوني الحل خاطري أبوس عمتي على راسها مع انهم هم الغلطانين بس والله ما يهون علي انها تقطعني مره وحده صار لها اسبوع ما دشت عندي الصاله أفكر قبل لا أسير بيت أهلي أمر عليها وأسلم بس والله كبيره الحركه اللي سووها....