اعتبروني بنتكم وانصحوني رجاءً

السلام عليكم ورحمة الله وبركاته

انا عضوة جديدة هون بس من ايام كنت صغيرة وانا اي شي يصعب عليي ادور حل بهالمكان
اعذروني اذا رح تستصعبو فهم لهجتي لاني مو خليجية

انا امرأة متزوجة من 3 سنين ونص عندي بنت عمرها سنة ونص

انا حياتي ووضعي انا وزوجي كلو مشاكل من لما تزوجنا مادي ومعنوي وكل شي
بالمختصر كنا عايشين رغم كل مشاكلنا واخدنا بعض عن حب وكتير بنحب بعض رغم كل شي مرينا فيه واصلاً ضلينا 4 سنين لحتى اهالينا وافقو عالزواج
كان الي صدمات كتيرة وكبيرة مع زوجي خلتني ما اشوفو سند الي بس مارح اذكرها لانو مو هاد موضوعي
موضوعي هو الخيانة .. اول صدمة بالخيانة كانت وانا والدة الي 20 يوم بس
صارت مشكلة كبيرة بيناتنا وما اعترف بالخيانة وبعدها انصلحت الامور مجبرين لانو كان مشاكل خارجية المفروض نسكت ونحلها ونضل عايشين وصابرين ع بعض ولسه البيبي مولود جديد
الصدمة التانية كانت لما شفت مسج من وحدة كاتبتلو (انت بحياتك ماحبيتني)
تعاملت مع الموضوع بهدوء وواجهتو بالمسج اول شي انكر انو بيعرفها وبعدها على ما اعتقد كذب ما كان صادق معي وحكالي انو هي وحدة من قبل ما نتزوج بيعرفها وكل مدة بتبعتلو وتتحارشو وهو ما بتواصل معها
عديت الموضوع للمرة التانية وسكتت
الصدمة التالتة كانت لما تغير عليي كتير وع بيتو وبنتو وصار مهمل ونحن اخر اولوياتو ومايرجع عالبيت لنص الليل بحجة شغلو وبطلت اعرف باسوورد الموبايل وصار في دردشات مؤرشفة بالواتس اب
لاجى يوم وحكتيلو شو هدول الدردشات .. تلبك وصار وشو اصفر وصار يحاول يغير الموضوع
اصريت اني اعرف ما رضي يفتحهن ولما اخدت الموبايل منو تحول لوحش بس كرمال ما افتح واشوف وصارت مشكلة كتير كفيرة وصلت انو يضربني ويحلف يمين طلاق ووقع يومها اول يمين بينا
بعدها اعدنا وحكينا وانكر كل شي بالبداية طبعاً بس بعدين صدمني انو اعترف ورمى الذنب كلو عليي وطالعني انا السبب بتصرفو
انا بعترف اني مقصرة بنواحي معينة بس نحن عايشين بوضع صعب كتير كتير وهو بيعرف وشايف انو انا ضعيفة وطاقتي ما عم تتحمل كل هالمسؤوليات والبنت ما شاء الله كتير متعبتني
انا ما عاد عم بعرف كيف اتصرف ولا عندي كبير استشيرو
من ناحية مابدي اخرب بيتي ومن ناحية تانية حاسة اصلاً هو مخروب وما عاد يتصلح ومستحيل اوثق فيه وايام بفكر كيف بدي دوس ع كرامتي رغم كل اللي صار وسامحو وضل عايشة او كيف بدي اضمن انو يرجع لبيتو وما يكرر هالشي
انا ضايعة والشيطان عم يلعب فيني بترجاكم تساعدوني وتنصحوني شو اعمل وكيف اتصرف
للعلم انو كمان رجعت سامحتو واعتذر وحالياً عايشين ع اساس مافي شي بس تصرفاتو كلها بتدل انو لسه عم يحكي مع حدا
بترجاكم انصحوني والله يجزيكم كل خير يااارب
وبعتذر عالاطالة