اعيش مع زوج شكاك .. حتى الابتسامة سلبت مني (( مشكله وصلتني عالخاص))

.
السلام عليكم ورحمة الله وبركاته ..

خواتي الغاليات .. حبيت اكتب لكم مشكلتي لعلي اجد في كلامكم شيء يسليني .. ويساعدني على تغير نظرتي للأمور ..


انا متزوجة من 3 سنوات .. برجل مطلق وعنده طفله عمرها الان 6 سنوات .. وهي حالياً مع امها ..
بيني وبينه سنتين بس .. محافظ على كل الفروض في المسجد .. صايم .. محافظ على النوافل ومحب للخير ..
حالة المادية اقل من المتوسط مع اني من عائلة غنية جداً ولله الحمد ..

مشكلتي معه انه " شكااااااك " فوق ما تتصورون .. مع انه الآن خف كثير .. لكن قوة التحمل عندي في الحضيض ..!!
مع العلم يابنات اني انسانه محافظه بل اكثر .. ما ابي اقول اني ملتزمه لان عندي تقصير .. لكن يكفيه اني خريجة تحفيظ قرآن ولله الحمد والمنه على هذه النعمة ..
ومع ذلك يشك فيني .. متخيلين ..؟

والله في بداية زواجي كان تيجيه اوقات فجأة يقول لي خذي شنطتك وعلى بيت اهلك .. واقعد ابكي .. وانا مش عارفه وش الموضوع .. ومشكلته انه ما يوضح ..
يحيطك بخيوط الشك بس ما ينطقها .. وهذي مشكلة ما تقدرين تتناقشين معه ..

طبعاً كنت توني ما اعرف شيء في علوم الحريم .. وكنت انسى من نفس اللحظه .. ويعيد ويزيد في المواقف بس انا دايم اتناسا الموضوع من شدة حبي له ..

تخيلو يابنات .. كان يروح البحرين اذا حطني عند اهلي .. طبعاً انا مستحيل اشك فيه .. اولاً لاني اشوفه انسان مصلي ويخاف ربه .. ثانياً كلاً يرا الناس بعين طبعه ..
واكتشفت في النهاية انه " يشرب خمر " الان ما عاد يروح البحرين .. لكن بعد ايش بعد ما اهتزت ثقتي فيه ..

طبعاً مع كل هذا انا سااااكته حتى اهلي وخواتي ما يدرون .. يشوفونه ملاك طاااهر .. لاني اعكس لهم هذي الصورة ..
مع اني انا ماكنت اكذب هو طيب وحنووووووووووووون فوق ما تتصورون .. لكن الشك طغى على كل شيء ..

حتى بنته وربي اني كنت شااايلتها بعيوني تجي عندنا في كل اسبوعين مره طبعاً اول ما تزوجة كانت طفله بحفاظها ..
اغير لها والبسها وازينها امها الله يهديها مهملتها كثير حتى شعرها ماتغسله تجيني البت شعرها مدهن ..
وكنت ارجعها لامها متسبحه منظفه والله كانت تمر علي شهوووووووووووووووووور ما شتري شيء لنفسي لقلة المادة ..

واراعي ظروفه مع ان بنته لازم اسبوعي الملاهي والوجبات والملابس شهري من ارقى الماركات !!

ومع ذلك كنت عمياء وصماء .. تجيني من اهلي فلوس دااااااايم الوف والله .. اخذها وحطها بيده .. ومع ذلك لما ناقشته قالي كلها لك ما خذت شيء لنفسي ..!!
حتى بيتي .. وربي من يوم تزوجته ما استقبلت صديقاتي لان عفشه قديم " عفش زوجته الاولى "

طبعاً انا تحملت لكن لما ربي رزقني ببنتي خلااااااص .. صار لي بدل اللساااان عشر ..
صرت ما اتحمل شكه .. اي غلط ما اتحمله .. حتى الاوضاع المادية صرت ما اتحملها واطلب لي ولبنتي ..
لانه شهرياً يرسل لبنته 400 ريال ولامه 500 ريال غير الالعاب والملاهي والملابس والهدايا .. وانا وبنتي مطلوب منا نتحمل الظروف .. ومع ذلك وربي ان افتقر لابسط شيء من امور الزينه .. وربي لو اقولكم تنفجعون .. الحمد لله على كل حال ..

طبعاً انا الان تغيرت .. على الكل حتى على بنته .. ما صرت استميت مثل اول .. لكن الله يشهد اني عمري ما اذيتها .. لكن اذا طولت لسانها اهاوشها ..

تغيرت حتى على اهله .. صرت رسميه واخذ حقي غصب عن الكل .. لاني من النوع الساكت فخذو راحتهم حتى ما عاد يقدروني ..
تخيلو ام زوجي انزل انا وياها السوق تروح تشتري لبنته هدية وبنتي لا شرت لها ولا عبرتها ..!!
ليش ؟ مع انها تموت عليها وش الفايدة تحب بدون ما تقدر ..

من الاشياء اللي تغيرت فيها صرت اطلب اني اروح واجي مع اهلي .. لانه مانعني اروح واجي مع امي وخواتي ..
ومحرم علي السواق حتى لو كنت معهم .. والله انهم يحرمون انفسهم من الروحه والطلعه اذا اجتمعنا عشاني ..
وربي اتعب اتعب ولو اكتب عشراااات الصفحات عن شكوكه بتنهبلون شيء غير عاااادي ..

حتى النت ما غير يدقق حتى مشكلتي ما قدرت انزلها بمعرفي ..
حتى ايميلي يفتحه تخيلو لما فتحت الايميل راح قعد فتره يحوس لما طلع الرقم السري ودايم يقولي اي شيء تسوينه اي صفحه تفتحينها اعرفها ..
حتى الماسنجر مع اني ما افتحه ابد يروح يدور ويفتش .. التلفون بس يدور في الارقام وهذا رقم مين وووو ..
واذا قلت له ليش كل هذا قال عادي زوجك ويحط اعذار منه ومنه .. ويقول انتي تبين تفتحين مشكلة الشك ...!!

طبعاً انا شكيت لاهلي وقلت لهم عن شكوكه الكبيرة انهبلو .. ما صدقوا .. لان في اشياء ما يصدقها عااااقل .. طبعاً هو انهبل ما توقع مني .. وكذبني قدامهم بس هم فاهمين كل شي ..
حاول انه يغير من نفسه .. وافق فترة اني اروح واجي مع اهلي بعدين غير راية .. يحاول يسكت عن شكوكه بس ما قدر ..
انا الان عندي ايمان ان عنده وسواس قهري .. قلت له اقرأ عند شيخ قرأ مره وبعدين بطل .. ما يحس انه محتاج لتغير ..

الآن انا اعاني من زوجي وشوكوكه .. ونظرت الشفقه اللي اجدها في عين اهلي ..

تمر علي ايام هاديه واعيش بسلام بس اروح لاهلي واشوف نظرتهم لي اموت .. خواتي دايم يقولون لي اصري .. زني على راسه الرجال لازم تزنين عليه .. بس انا تعبت ..

واحد من اخواني دايم يجيب لبنتي هدايا وما يجيب لعيال خواتي .. خواتي قاموا يمزحزن معه ويهاوشونه وليش ما تجيب لعيالنا
قال بكل براءه " انتو عيالكم عندهم بس هي مسكينه ما عندها " انا وقتها مت واقفه ..!!
.
.

ودي اعيش لنفسي ولبنتي .. نفسي ما هتم لكلام احد ..

تهزني الكلمه والنظرة .. وفوق هذا وذك عندي جلد لذاااات كبير ..


دايم احط نفسي غلطانه .. واخاف اني اظلم .. مع اني اكون على صواب ..

حتى زوجي برغم شكوكه دايم اقول في نفسي اني ظلمته عند اهلي قلت بس الشينه .. مع العلم ان شكوكه غطت على كل لحظه حلوه ..

انا الان شايله هم بنته اذا سكنت عندي بعد اقل من سنه .. خايفه اظلمها معي .. وربي صرت اتغصب حبها خوف من ربي ..

حتى زوجي صرت ما احبه .. احن عليه فقط .. لكن حب لااا .. حتى اكره العلاقه احسها جحيم ..

خلاص ما اقدر اكمل ..
.
.