افتتاح موقع عالم آدم!!!! لحقوا على أزواجكم!!!!!

بسم الله الرحمن الرحيم...

تم افتتاح عالم آدم ليكون منافساً لعالم حواء!!! ولكي يفضفض فيه الأزواج ويتبادلون الخبرات في التعامل مع زوجاتهم..

واخترت لكم بعض المواضيع عشان تتطلعون عليها..

الحقوا علي يا شباب! زوجتي انقلبت علي وتبا تسير بيت اهلها!!

ويردون عليه الشباب...
العضو (..) "ياخي خلها تولي وانا بزوجك أحسن عنها وعلى مسؤوليتي...إلخ"
والعضو (....) يقول "والله أريحلك ياليت اللي عندي تسير بعد.. سير رحله ويا الربع ولا سافر مكان واشكر الله على هالنعمه.."
أما العضو (...) فله رأي مختلف.. "الله يعينك أخوي فكر يمكن انت مسوي شي وما قدرت تصارحك.. راجع نفسك.. عودها على المصارحه.. حسن علاقتك معها ويكفيك تدش البيت بورده حمرا وبطاقة اعتذار وبتردلك مثل أول وأحسن.."
-----------------

اللي يبي يقهر زوجته يدخل ويقرا

والعجيب في هالموضوع انه محصل الرقم القياسي في عدد الزوار!!!
----------------

محتار بين أمي وزوجتي!!

واندهش الكاتب يوم لقى أغلب الاعضاء يشكون من الشي نفسه..
---------------

زوجتي ما تبتسم!!

ويرد عليه العضو (.....) "الظاهر وايد معطيها ويه.. هالحريم ما ينفع وياهم إلا العين الحمرا.. جرب وشوف كيف بتبتسملك 24 ساعه.."

أما العضو (.....) فيقول.. "يمكن كانت تبتسم وما عطيتها ويه عشان جيه كشرت.. جرب يوم تبتسملك تقول لها اللـــــــه ابتسامتج أحلى ابتسامه شفتها.. وصدقني بتلاقيها كل يوم تتدرب قدام المرايه على ابتسامه حلوه تستقبلك وتودعك فيها"

أما العضو (....) فيقول... "شوف والله هالرومانسيه ما تنفع لحريمنا.. الشرع حللك أربع خذ وحده ثانيه واشكثرهن الحريم اللي ما تفارقهن الابتسامه الحلوه.. في كل مكان"
--------------

شو رايكم غلط اساعد مرتي في شغل البيت؟

العضو (....) "نصيحه لوجه الله تعالى: لا تفتحلها المجال.. حتى المنديل ارميه عالأرض لا تتعب عمرك وتحطه في الزباله.. ترا يبكبر راسها عليك.. اسأل مجرب!"

العضو (....) "بسألك انت ليش متزوج.. ياخي هالحريم يتدلعن لا تعطيها ويه"

العضو (....) "يا اخوان ليش مكبرين السالفه.. اتقوا الله في نسائكم.. واجعلوا رسول الله قدوتكم في تعاملكم معهن.. أنا شخصياً أساعد زوجتي في غسل المواعين وافتخر بهالشي.. ويوم اشوفها تعبانه أغسل ملابسي .. وأساعدها في الكوي.. وبالعكس ما زادها هذا إلا حباً واحتراماً لي.."
-------------

زوجتي ما تقدر ظروف عملي!

العضو (....): "حاول تشجعها على الاشتراك في معهد أو دورات أو دروس تشغلها في فترة غيابك... واشرح لها ظروف شغلك وان هالشي غصب عنك وانك تتمنى لو تقدر تغير الوظيفه بس مستمر لان امتيازاتها كبيره... إلخ وراح تتفهم ان شالله"

العضو (.....): "انت تداوم وتتعب حق منو؟!!! الله يصبرنا على هالحريم نتعب عشانهم ولا يقدرون.. الله يكون بعونك وانا بصراحه هونت ما بعرس"

العضو(.....): "أنا كنت اعاني من هالشي ومثل ما قال اخوي (....) شجعتها تشترك في دورات مختلفه وصاارت تشغل فراغها بأشياء مفيده في غيابي وتحسنت علاقتنا"

العضو(....): "تقدر ولا ما تقدر... عجبها اهلا وسهلا.. ما عجبها مع السلامه :mad: "
-----------------

كيف تكسب زوجتك

صفات الزوج المثالي

كلمات تكسب بها قلب زوجتك

فوائد الزواج وإيجابياته

...إلخ من المواضيع

----------------

أكيد انقهرتوا من بعض الردود.. وأكيد الأغلبية قال والله لو زوجي اللي كتب هالموضوع ما أسامحه... وأكيد البعض قال الحمد لله زوجي ما يدش النت انا واثقه انه ما يقرا هالأشياء....إلخ


بس لا تخافون بنات.. هالشي تصورته في الخيال.. ولا ما فتحوا منتدى وماهم بفاضين حق هالمواضيع.. الحمد لله

وحبيت أكتب هالموضوع لغرض وأهداف في نفسي أرجوا أن تكون وصلتكم..

أولاً أبي كل وحده تتخيل لو هالمنتدى فعلاً موجود شو بيكتب زوجها؟ وتحاول تصلح نفسها قبل لا يضطر زوجها لأخذ نصيحة من قد لا يخاف الله فيها..

ثانياً لو كلنا قبل لا نكتب موضوع.. أو نصيحه.. نتخيل لو نحن مكان الزوج... شو بيكون رايه أو نظرته.. ونحاول نصلح المشكله بينا وبين أزواجنا.. ويزاها الله خير اللي تكتبلنا الخطوات اللي اتبعتها عشان نقتدي بها..

ثالثاً قبل كتابة أي موضوع أو رد.. هل هالموضوع بيكون في ميزان حسناتي أم سيئاتي.. هل سيرضى الله عني بعدما كتبت هذا؟.. ما هو شعور زوجي لو قرأ ما كتبت؟هل ستكون نصيحتي سبباً في إعمار بيوت أو هدمها؟ وهل أخلصنا النية الحسنة واجتهدنا في ذلك..

وأنا متأكده ان الجميع فرح يوم قرا العناوين والردود اللي في صالح الزوجه.. :27:

فلا تحزنوا وتستغربوا إن غضب الزوج لوجود المواضيع اللي تحرض الزوجه أو تفسدها..

ولنتعاون ليكون عالم حواء.. وكل المنتديات الأخرى..وحتى نصائحنا لمن نعرف.. طريق لإصلاح البيوت.. وطريقة لزيادة ميزان حسناتنا..

اعتذر عن الإطاله.. وأترك لكم التعليق..:24: