افضفض وأستشير

السلام عليكم
أول مرة أكتب موضوع بس كنت دايما أتابع بصمت هذا قبل مااسجل بالمنتدى
أنا كنت اتمنى أتزوج عشان أكون زوجه وام مثلي مثل غيري وماأحس بنقص لأن الوحده ماينفعها لا علم ولا وظيفه سبحان الله الله فطرنا على هالشي
تأخرت ماتزوجت على الرغم ان مافي سبب يمنع زواجي الحمدالله حسب ونسب وجمال بس سبحان الله نصيب كنت انخطب بس ماكان يصير نصيب من اهلي او مني
كنت مشتاقه اكون ام خصوصا اني احب الاطفال مره اذا شفت طفل لازم امسكه وابوس فيه واحضنه
قررت التزم بالرقيه وقراءة سوره البقره وقيام الليل
وبيوم من الايام اسمع قوله تعالى( وليستعفف الذين لا يجدون نكاحا حتى يغنيهم الله من فضله)
قلت ياربي اغنني من فضلك والله يمكن نص ساعه الا ناس يتصلون يخطبوني بالاسم وسبحان الله انخطبت اول يوم ذي الحجه وملكتي كانت بثاني ايام العيد سبحان الله
سبحان الله أول ماإنخطبت وملكت كنت ابحث عن المواضيع اللي تفيدني بحياتي الزوجيه داخلة بقوة الأخت هههه
وأول ماكنت شاكه اني حامل وادخل وأشوف شلون اكتشف اني حامل كنت اسوي تحليل منزلي ومايطلع لي لون غامق واتضايق واقول خلاص مو حامل بس كنت حاسه اني حامل ووحده من الخوات كاتبه على الخط الباهت معناها حمل اتذكر شكثر فرحت واستنيت كم يوم وسويت مره ثانيه الا يطلع واضح الللون شكثر فرحت
كنت أحس البنات هنا يجاوبوني على كل سؤال يخطر ببالي
ويوم اجهضت كنت ابحث متى اقدر احمل بعد الاجهاض على طول وكنت الاقي الجواب
وبيوم وليله بعد ماردت لي صحتي ورديت بيت زوجي تغير زوجي معاي ماكان هو اللي اعرفه احسه يابنات نافر مني مع اني جميله ومحافظه على اناقتي ونظافتي ونظافه بيتي بشهادة امه وخواته
نام بالبيت كم يوم بعدين صار ينام عند اهله
عمتي ام زوجي تقولي اكيد عين صابتكم وتحاول ترقي زوجي بس رافض يقول مافيني شي
المهم بيوم من الايام يرسل لي روحي بيت اهلك مالك نصيب عندي الله يرزقك باللي احسن مني
اتصلت على اهلي ولميت اغراضي وسبحان الله كان عندي احساس بالشي هذا مسبقا غسلت ملابسه كلها وماخليت شي بالغسيل قلت يمكن يذكرني بالخير
هو عنده انا احسن منه لما كنت حامل كان يبي ولدنا يطلع علي انا الحمدالله ملتزمه بالصلاه هو الله يهديه ماكان ملتزم
المهم لحظات هي خطبتي وزواجي وحملي جت كلها ورى بعض وسبحان الله راحت كلها مع بعض
وقت ماكنت عنده قبل طلاقي بأيام حلمت حلم غريب
فسره الشيخ في شخص بحاول يفرق بيني وبين زوجي باي طريقه المهم قال لازم احد يرقيني انا وزوجي ماكنت مصدقه لان كنت اقول مافيني شي لأني دايما ارقي نفسي ومتحصنه كنت متوقعه بس هو اللي تعبان من العين على حسب اعتقادي مثل ماكنت تقول امه وخواته
بعد ماتطلقت اهلي جابوا لي شيخ وقرا علي وبين عندي كنت اتاثر بيأيات السحر وايات تمجيد الله جسمي يتحرك غصبا عني بس ماكنت افقد الوعي الحمدالله وكانت معاي اعراض ثانيه اطلعت معاي برجوعي لمنزل طليقي قبل لا اتطلق
المهم صرت ارفض اروح للرقيه كنت افضل انا ارقي نفسي بعد ماشفت اسلوب شيخ كان يعامل المريضيات بطريقه فيها عدم شفقه كان همه الوحيد يسوي مكان فاضي عشان تقعد فيه مريضه عشان الربح المادي وكان يطرد المرافقات وحتى مايخليهن يوقفن جنب مقر الرقيه عشان مايستفيدن
الحمدالله استمريت على سوره البقره وطه والملك كل يوم واذكار الصباح والمساء مع الصلاه بوقتها
الله شفاني ماصرت احس بالاعراض اللي كنت احسها
تخيلوا كنت اخاف مني مااشوف نفسي بالمنظره احس اني مو انا
الطلاق يكسر يابنات احس اني انكسرت كنت افضل اني ماتزوجت لان كنت اشتاق له حيل ومااتخيل نفسي مع واحد غيره بس ارد اقول لنفسي هذا شخص بايع والسحر مايبرر له انه يطلق
اعرف ناس مسحورين ومع هذا صابرين على البلاء بس ماانفصلوا
كنت ادعي اني ارد له بعد ماالله يشفيني ويشفيه بس الحين ادعي له بس ان الله يشفيه بس مااتمناه يكون ابو اولادي لان ماعنده وفاء
الحين يابنات متقدم لي شخص مطلق مرتين ومن كل وحده عنده ولد وبنت الاولى تزوجت والثانيه رافضه ترد ماتبي تعيش مع امه وابوه
وانا صرت ماأمن للرجال وخصوصا هو مطلق مرتين مدري شورن علي
انا توي طالعه من العده وخايفه وكارهه شي اسمه زواج وبنفس الوقت مو صغيره انا وودي اكون ام
أسفه طولت بالموضوع بس حبيت افضفض واستشير..