حبيت انزلكم موضوع عن اشياء استفدت منها .. والموضوع مو مشارك بالمسابقة لاني ماقدمت ولاني من بلاد الرافدين فنظرا للبعد ماشاركت
بس قلت افيدكم ... ورحت للدولاب طلعت جنطة احط بيها هالمنتجات اللي من سنة وسنتين وقلت اطلع لكم الخلاصة والمفيد منهم
لاني ماستمر للاسف استخدم شي فترة واترك وارجع حسب المزاج ..وكلهم احطهم بجنطتي الحبيبة ..
قبل ابتدي قولوا بسم الله ماشاء الله .. واسأل الله ان يفرج همي ويكتب لي الخيرة من امري ويشفيني شفاءا لايغادر سقما .. قولوا آمين .
وطبعا اكو اشياء مادري اذا تتوفر عندكم بس الاقيها بمحلات المستحضرات التجميلية ببالمولات وببعض الفنادق والمناطق الراقية ببلدي .. ان شاء الله تلقوها وراح اكتب بدائل لها من خلال اطلاعي .
اول شي ابتدي باجهزة التنظيف اللي جربتها ..
هذا الجهاز ينظف ويعمل شفط لرؤوس السوداء والاوساخ عجييب كتنظيف للخشم خاصة
وبيه من الخلف فتحة تعبيها ماي وزر تصعدينه للاعلى ويشتغل يرش الماي وانتي تحركينه على المكان اللي حابة تنظيفه وهو جهاز مصغر للي بالعيادات
وهو ماركة بانسوينك .ويشتغل على الشحن الكهربائي
الجهاز الثاني جهاز تقشير وتنظيف البشرة من ماركة ان سفن ومعه جل خاص تحطينه قبل تشغلين الجهاز
والجهاز يشتغل على البطارية وفيه درجتين درجة خفيفة ودرجة اقوى .. والجل في منه لكل نوع بشرة انا بشرتي مختلطة وحسيت هالجل شوي دهني واكو جل للبشرة الدهنية والمختلطة ..
نجي للكريمات ..
اول كريم لحب الشباب وجل خفيف يناسب البشرة الحساسة هو تقيمي له زين ينفع لحبوب الدورة لكن ماينفع لحب الشباب
الكريم الثاني من نوفوديرم فيه وقاية من الشمس وحسيت حلو كتغطية مثل كريم بوندس واولاي وهو صناعة المانية وعجبني كبديل لكريم الاساس
وتونر اولاي التونر اي تونر نصيحة استخدموه للرؤوس السوداء بالخشم اول خمس ايام تلاحظون زيوت تطلع لان تنفتح المسامات
ويطلع كل الدهن اللي مسبب رؤوس سوداء اولاي عجبني وينفع للي رؤوس السوداء خفيفة عندها او متوسطة بس اللي كثير انصحها بشي طبي
لاني جربت تونر بيوسكرين كان روووعة واخذوا مخصص للبشرة الدهنية من بيوديرما او بيوسكرين او فيتشي لانه يجي اقوى وينظف زين
اما الاخير فهو ماسك من ريو بالكولاجين وصناعة انجلترا وجدا عجبني يعطي نضارة واشراقة الباكيت بيه خمسة ماسكز ..
هذا فوم فريش بيوتي سستم من ماركة سويدية عجبني بشرتي مختلطة وحساسة وكان تمام وحسيته ينور الوجه من اغسله
مدري كيف تحصلونه مكن طلب من النت او ممكن تاخذوا بديل ايف سان لوران عندهم فوم فريش .
وهذي سيروم وكريم كافيار سويسري .. انا قلت بشرتي مختلطة واذا استخدمت الكريم وحطيته عند الذقن يسبب لي حبوب واذا استخدمت السيروم يجفف لي خدودي ويحسسهم
فصرت استخدم السيروم للمناطق الدهنية لانه عبارة عن سائل واستخدم الكريم للخدود والحمد لله بهالطريقة ناسبني طبعا الكريم والسيروم رووووعة
احس الصبح لما احطه بالليل بشرتي مرتوية ومرتاحة وفيها امتلاء بسيط صحي ..
هو الكريم اربع وعشرين ساعة ممكن ليل ومكن نهار وهالشي يميزه الصراحة
وهو مكتوب عليه لمعالجة الشيخوخة المبكرة ومعالجة اثار الضغط النفسي والقلق وقلة النوم ويعطي نضارة هذا اللي مكتوب ومكوناته رائعة ..
مادري اذا ماكو عندكم فهو كريم كافيار سويسري البديل تحصلونه عند ماركة لابريري لانها ماركة سويسرية وكريماتها من الكافيار .
هذا كريم مقشر وسن بلوك الاثنين من ايزيس فارما .. المقشر تقشيره بسيط مو مثل ريتن
انصح كل وحدة تريد تقشر بشرتها بيه وهو يصلح للبشرة المختلطة وعادية ودهنية
ويقلل المسام ويصفي ويعطي تفتيح بسيط .
السن بلوك يناسب البشرة العادية والجافة لان بمنطقة الذقن طلع لي حبوب لكنه جدا رااائع ويعطي لوون خفيف هو مابيه اساس بس يعطي لون خفيف
وينعم البشرة بدون تزييت .واللي بشرتها دهنية تاخذ عامل 25 من الشركة مخصص لها .
يتبع ..
هذي اشياء استخدمها مزيلات عرق .. من غارنييه حلو واستخدمه استخدام يومي وجدا عاجبني
اما درايكلور مرة بالاسبوع بالليل ينحط والصبح ينغسل وهالمزيل روعة . وطبي ايرلندي .
اما مرطبات الشفاه اللي بعلبة من الشايع هو كويتي وفتح فترة عندنا بالفاملي مول باربيل واخذت منه هالمرطب
يجنن ويرطب ومن اول استعمال انسي تشققات مثل الجل كانه فازلين بس ريحته تجنن وفيه نكهات اللي بالصورة بالفواكه وسعره رخيص .وهالمحل جربت منه عطر مآثر وكان حلو ومعطر مفارش نسمة يجنن .
اما الثاني بالمرز زبدة الكاكاو يجنن يجنن يرطب وفيه واقي شمس
ومع الاستمرار يفتح شتريدون اكثر ..
هاي مرطبات الجسم اروعهم فازلين الموحد الصحي نتيجته ممتازة
اما اناشتير ماليزي وجبته عشان ريحته روووعة ريحة جمميلة
وجرجنز حسيت بس ترطيب يعني زين ..
اما يوكو فهو كريم للايدين يجنن .
اخر شي منتجات الشعر ..
الكريم الطويل الرصاصي والشامبو ماركة سويدية والكريم رائع للي شعرها دهني او عادي مايزيت وملمسه وريحته حلوة .. والشامبو خالي من مادة السولفيت جربته كم مرة وحلو اهم شي مابيه مادة السولفيت ..
وسيروم لوريال بعد روعة وخفيييف عجبني ...
وكريم غارنييه نتيجته مقاربة للسويدي بس ذاك احلى شوي منه .
اما امبولات فولتن جربتهم فترة وشفت شعر صغير نابت بس ماكملت صارت لي ظروف .
انتهى ولله الحمد وان شاء الله بس بعد هالتعب احصل دعوات حلوة .