حبيباتي اليوم حابة اتكلم عن موضوع .. كيف نحل مشاكلنا بأفضل طريقة ..
القسم مليان مواضيع كل واحد فيهم له قصة مختلفة ومشكلة مختلفة و ظروف مختلفة .. لكن حلها كلها واحد ..
انا دائما اشعر بالندم على سنين عمري اللي فاتت بدون ما الجأ لهذي الحلول بطريقة موقنة و واثقة ، ساعات اقول صغر العمر وقل الخبره لكن اي فتاة عشرينية خلاص تعتبر كبيرة المفترض وتعرف كيف تحل مشاكلها بشكل صحيح ..
مرت علي مشاكل لكن للاسف ما التجأت للحلول هذي بالطريقة الصحيحة كنت استشير من اثق فيه وهالشي امر مهم نبحث عن ناس ثقات لكن برضو هم ما بيدهم شي ، انت بيدك الحل ..
الحل بسيط جدا هو
((((((( الالتجاء الى الله عز وجل )))))))
جد احس احنا لاااااهين بحياتنا بطريقة صارت العبادة ما نستشعر فيها والذكر والقران ما نعرفه الا برمضان كأنه باقي الشهور اجازة ..
احس لو بنواجه اي مشكله او لما نحس بمجرد شعور عدم ارتياح لامر من امور الحياة ونلجأ لله بالدعااااء و الصلاة وا لذكر و الصدقة فورا قبل اي شي ثاني .. لازم نتوكل على الله لان من توكل على الله فهو حسبه .. لما ربي يتولانا ونوكله امرنا توكل صحيح وبيقين وثقه صدقوني راح تفرج .. عندي ثقة ويقين ان اي مشكلة ولو كانت مستحيلة حلها هو الدعاء ، لا تقولين ربي كتب لي خلاص برضى انا ما اقول اعترضي على الله لا ابدا اقول ادعي الله بالخير والخيره و الاصلاح و التيسير و الهداية و الرزق .. دااائما ادعي ان ربي يدبرك بأحسن التدابير ويحل لك مشكلتك بحكمته وخيرته سبحانه ..
لازم قبل كل شي نكون عندنا اساس قوي بقولها بعدة نقاط :
- لازم واهم شي تكون ثقتنا بالله هي الاساس وحسن ظننا بالله هو الاقوى ، تذكرو ان الله عز وجل قال انا عند حسن ظن عبدي بي فليظن بي ما يشاء ، لحظتها خلاص انا بديت احل المشكلة اللي اعيشها ايا كانت ظروفها ومصاعبها ، ليه لان ربي هو اللي قدر لي هالشي وهو ايضا قدر لي اني اثق فيه واحسن الظن فيه لرفع هذا الامر ..
- الامر الاخر ربي تبارك وتعالى لا يعجزة شي في الارض ولا في السماء تتوقعون اللي رفع السماء وبسط الارض بيعجز عن انه يحل مشكلتك حاشى لله عز وجل .. اذا قضى امر فإنه يقول كن فيكون ، فلا تقولين هذي المشكلة مالها حل او مستحيل يصير لها حل او مستحيل هالشخص يتغير لا ابدا .. ربي عز وجل قادر وفضله واسع ..
- اول ما تحزنين وتقع عليك مشكلة على طول قومي توضي واحسني الوضوء و فلي سجادتك و صلي ركعتين واسجدي لله وانت موقنة تماما ان لا كاشف لهمك ومشكلتك الا الله ، وقولي لربك كل شي بخاطرك مع الاخذ بالاعتبار بأداب الدعاء ..
- خلي لسانك لا يفتر من الذكر سواء استغفار ، صلاة علي النبي ، حولقة ، تسبيح وتهليل ، ادعية الكرب ، دعاء ذي النون .. كل هذي الامور كفيلة ان الله يفرج عنك ويفتحها عليك من كل جهة ..
- بعدها استشيري من تشائين وتثقين برأيه وحكمته ..
- هذا موضوع كتبته من فترة عن الدعاء و طريقته للي حابة تستزيد بالموضوع هذا ( https://www.hawaaworld.com/showthread.php?t=447699... ) ..
يا بنات انا احس بندم شديد على مواقف كثير مرت ولا لجأت الى الله حق اللجوء ، لكن دام احنا لسا عايشين لازم نعيد طريقة حلنا لمشاكلنا ايا كان نوعها وشكلها ، بكل بساطة عندنا ربنا تبارك وتعالى اي وقت نحتاجه نلقاه رحيم وسميع وبصير بحالنا وبضعفنا ، والاهم ان الامر كله بيد الله لا بيد زوجك ولا اهلك ولا صديقتك ولا حتى نفسك .. انت بيدك شيء واحد بس توكلين امرك لله وتفوضينه اليه عز وجل ، وربي ما راح يخيب رجاك ابدا ، بس ببساطة ثقي فيه ولا تدعين فتره بعدين تقولين ربي ما استجاب لي لا ابدا ربي استجاب لك بس بطريقته اللي يشوفها خير لك ..
وبكذا يكون الموضوع انتهى .. اتمنى يفيدكم .. اسأل الله ان يرزق كل وحدة ما تتمنى و يسخر لها من حولها و يفرج همها و ييسر امرها .. اللهم امين .. اللهم صلي وسلم على رسول الله وعلى اله وصحبة اجمعين ..