افضل علاج للتسلخات عن تجررررررررربه

بسم الله الرحمن الرحيم
السلام عليكم ورحمة الله وبركاته
اليوم حبيت اشارككم تجربتي مع ولدي في موضوع التسلخات اللي تقلق كل ام و تخليها في حاله من التوتر والحيره والالم لان اللي يوجع طفلي يوجعني
ولدي عمره 10 شهور و نص و فجأه صار عنده اسهال شديد سبب له تسلخات فظيعه مره
كان مع كل مره يتبرز فيها يصرخ ويبكي بشكل يوترني اروح اشيله واغسل له ويبكي من المويه و اجلس متوتره مابيدي حل جربت كل شي
زيت زيتون كريمات نشا سودو واجلس اقول ان شاء الله بيطيب هالمره ويرجع الوضع كما كان وممكن اسوأ
لدرجة صار عنده جرح في مؤخرته صرت احط عليه لاصق جروح علشان مايوصله شي ومع ذلك مانفع مجرد ما يتبرز يتلوث اللاصق ما كأني حطيت شي
طبعا اسباب هذا الاسهال كل شوي يفتيني فيها الدكتور مره براد مره تسنين مره ميكروب واستخدمت الادويه اللي اعطاني طبعا تعرفون في هذا العمر استفراغ لاي شي مايعجبه وتعبت
فوق اني حامل وتعبانه كل شي غيار وغسيل مناشف وملابس يا الله كيف تعبت في الايام اللي راحت الله يكتب الاجر
ماراح اطول عليكم اكثر ابعطيكم الحل اللي افادني الحمد لله ومازلت مستمره عليه وشفت له نتائج روعه جدا اللهم لك الحمد ولا ننسى قبل كل شي التوكل على الله والدعاااااااااء
اولا يبيلك تجيبين الاتي
فازلين
نشا
مفارش بلاستك زي حقت المستشفى اللي وجه قطن ووجه بلاستك زرقا تكون غالبا
الحفاظات تكون من النوع الممتاز لا تسترخصين في طفلك انا استخدم بيبي جوي جدا ممتازه
بودره الاطفال نوعيه جيده انا استخدم جونسون
صابون دوف سواء الازرق او الوردي القطع
اخلطي ثلاث ملاعق كبار فازلين مع اربع ملاعق كبار نشا في علبه قزاز بغطا
قبل الغيار افرشي المفرش وشيلي الطفل شيلي حفاظته بدون فرك وبعد ماتغسلين له بالمويه اغسلي بالصابونه علشان يروح كل اثر للميكروبات حتى لو في جروح مايضر ان شاء الله بالعكس تنظف وتتعقم
بعد كذا حطي البيبي على المفرش وجففي جسمه بالضغط مو الفرك انتبهي لا تفركين توجعينه
طبعا التجفيف كل مكان ورا وقدام وداخل المؤخره واتركيه على المفرش فتره يتعرض للهوا ولايكون الهوا بارد مره انتبهي
بعد كذا جيبي الحفاظ حطيه تحته وجيبي الفازلين وخذي بطرف اصبعك وابدأي ادهني طبقه خفيفه جدا على كل المنطقه مو بس الجروح بعدها رشي بودره بكميه معقوله على كل الحفاظ واقفلي بس لاتشدين خليها واسعه ع الاخر و ياسلام لو جبتي قياس اكبر شوي بعد كذا انتبهي تقفلين البربتوز او تلبسينه شي ضيق
قبل لا انسى انا طلعته في الشمس مره وحده حوالي ثلث ساعه وترا الجروح تتعقم وتتقفل سبحان الله
اذا تقدرين تطلعينه اكثر من مره افضل طبعا بس لايكون على جسمه اثار كريمات يعني ممكن بعد الشطف بالصابون والتجفيف
النقطه اللي لا تقل اهميه
عليك بالزبادي والموز نتائج رووووعه اعطيه موزه وبعدها بكم ساعه زبادي عادي بدون اضافات يشد بطنه و يهدي الاسهال ايا كان سببه
صدقيني اذا طبقتي تمام بيروح التسلخ وابعدي عن كريمات الكورتيزون ماشفت منها الا زياده التسلخات اعوذ بالله مثل كيناكومب و فيوسدين وطقتها
وفي الختام ما ابي منكم الا دعوه بظهر الغيب ان الله يسهل ولادتي ويحفظ ولدي ويسخر لي زوجي
والله لايوريكم مكروه
اختكم ام راكان