افطار الصائمين والمشكله اللي واجهتني تكفون ساعدوني واشتركوا معي بالأجر!!

بنات الله يخليكم ساعدوني بنصايحكم واراءكم بقولكم وش نويت اسوي والمشكله اللي واجهتني
طبعاً احنا قربنا على الشهر الفضيل شهر رمضان
ونويت اوفر ( ماء + مناديل + طيب عود ) للمصلين
طبعاً اتعاقد مع بقاله اللي قريبه عند المسجد مدة شهر واحاسبه اسبوعيا مقدما والعود من يوم يأذن العشا وانا اركب الجمر وبعد مايصلون العشا قبل التراويح يجي اخوي ياخذه للمسجد
اليوم كلمت السوبر ماركت اللي مقابل مسجدنا على اساس انه يوفر المويه والمناديل يعني على قدر الفلوس اللي معاي
قال رح اكلم الإمام وارد لك خبر
طبعاً رجعت اتصل عليه تفاجأت انه غير كلامه وكبرها شوي وقال للإمام وجبات افطار صائم وقال عددهم تقريباً 20 شخص وتكون الوجبه عباره عن ( ربع دجاجه مع رز+ حبه لبن + حبه مويه ) لكل شخص
طبعاً وافق الإمام
مع العلم ان مسجدنا قطع العاده هذي من 4 سنوات وامامنا مو كثير يهتم بهالمسائل
انا طبعاً رحمت العمّال وهالمساكين ووافقت وقلت رح اتصل على المطعم واشوف كم يكلف وارد لكم خبر
كلمت المطعم قال الوجبه بـ 10 ريال عباره عن
(ربع دجاجه مع الرز+حبتين سمبوسه+حبه لقيمات وحبه بلح الشام+ حبه لبن وحبه مويه + شوربه )
صراحه حلو وعجبتني بس المشكله حسبتها كم تكلف خلال الشهر 30 يوم × 20 شخص × 10 ريال = 6000 ريال >>>>>>> احترت من وين اجيب المبلغ كبير مره علي :(

على فكره قال ممكن احسبها لك الوجبه بـ 8 ريال بس بدون لبن وماء وهذا اخر كلام عندي

انا اللي معاي 2000 بس
مع اني بحاجتها شوي بس فكرت ان التجاره مع الله هي الأربح بالدنيا والآخره ورح اتبرع فيها للصائمين بس المشكله ماتغطي ابداً
وش اقول وش ارد عليهم اوافق ولا انسحب مع امنيتي افطر هالصائمين وربي شاهد بس كيف ؟؟
تكفون ساعدوني وش الحل وهل فيه طريقه ثانيه لاتبخلون علي بالحلول والله لايحرمكم الأجر ورح اشكركم معاي بالاجر لانها عني وعن والدي ووالد والدي واهل بيتي وعن بنات حواء ولعامة المسلمين ..

لاتنسون ترفعون الموضوع ياللي تمرون عليه ولو بدعوه لتيسير الأمر :(
رد1
بنات انا رديت هنا حتى الكل يشوفه
طيب بنات عادي لو انا الف سمبوسه وافرزنها ابدأ من الحين واجيب تمر وماء ولبن وصحون وصواني بلاستيكات واغلفها على شكل وجبات عدد 20 وجبه كل يوم نطلعها قبل المغرب
وكل يوم اطبخ 5 دجاجات بالرز واضبط الوجبات بنفسي ظنكم رح يكفي الوقت مع العلم ان ماعندنا شغاله :(

ساعدوني تكفون وكم بيكلف كل هذا بنات ابغى تفاعل وحلول الله يخليكم
ابغى الصفحات شغل رياضيات يلاه ياحلوات :22:

رد 2
شوفوا وش قررت !!
خلاص بسوي الافطار بنفسي والمبلغ اللي معاي رح اجيب منه الاحتياجات من تمر ومويه ولبن ولفات سمبوسه ولحم للحشوه وصحون وهكذا
بس باقي شي واااااحد !!!
هم طبعاً عمال ولازم يبون كبسه او شي ثقيل اذا مالقوا راحوا لمسجد ثاني وتركوا فطوري لي :(
لانه فطورهم هوعشاهم وبعدها مساكين خلاص عليها عشان كذا مساكين يدورون الادسم
مافيه بديل ويكون اوفر بالاغراض مثلا:صواني او اي شي اسرع واسهل لان مافي وقت
انتظر ردودكم